គន្លឹះក្នុងការអានសម្រាប់កុមារ

on Thursday, 02 February 2017. Posted in Activities

reading

ខាង​ក្រោម​នេះ គឺ​ជា​គន្លឹះ​ខ្លះៗ​ដែល​លោក​អ្នក​ជា​មាតា​បិតា​អាច​ប្រើ​ប្រាស់​បាន​ដើម្បី​ឱ្យ​កូនៗ​រៀន​អាន៖

  • រៀបចំ​ពេល​វេលា​អាន​សៀវភៅ ឬ​អត្ថបទ​នា​នា​ជាមួយ​កូន។ កុមារ​ជា​ច្រើន​ចូលចិត្ត​ការ​អាន​សៀវភៅ​រឿង​មុន​ពេល​ចូល​គេង ដែល​នេះ​គឺ​ជា​វិធី​សាស្ត្រ​ល្អ​មួយ​សម្រាប់​ការ​អាន​បន្ទាប់​ពី​ធ្វើ​ការ​ហត់​ពេញ​មួយ​ថ្ងៃ ហើយ​ចាប់​ផ្ដើម​ចូល​គេង​។
  • ទុក​សៀវភៅ​នៅ​ក្នុង​បន្ទប់​របស់​កូន​អ្នក​ដើម្បី​ឱ្យ​ពួក​គេ​អាច​អាន​សៀវភៅ​បាន​ដោយ​ខ្លួន​គេ។ អ្នក​ត្រូវ​ប្រាកដ​ថា​បន្ទប់​របស់​គេ​ជា​បន្ទប់​ដែល​អាច​អាន​សៀវភៅ​បាន ដោយ​មាន​គ្រែ ឬ​កៅអី​មាន​ផាសុកភាព មាន​ធ្នើ​ដាក់​សៀវភៅ និង​មាន​អំពូល​បំភ្លឺ​គ្រប់គ្រាន់។
  • អាន​សៀវភៅ​ដែល​កូន​អ្នក​ចូលចិត្ត​ស្ដាប់។ បន្ទាប់​មក​ទៀត កូន​អ្នក​អាច​នឹង​រៀន​ចេះ​ពាក្យ​ថ្មីៗ​ពី​សៀវភៅ​ដែល​គេ​ចូល​ចិត្ត។ លោក​អ្នក​ក៏​អាច​ប្រើ​ឃ្លា​ក្នុង​ផ្នែក​ណា​មួយ​ដោយ​រំលង​ពាក្យ​ណា​មួយ ហើយឱ្យ​ពួក​គេ​បំពេញ​ឃ្លា​នោះ​ឱ្យ​បាន​ត្រឹម​ត្រូវ។
  • លោក​អ្នក​អាច​បង្កើត​ជា​ហ្គេម​ទាក់​ទង​នឹង​អក្សរ លេខ ពណ៌ រូប​រាង និង​ពាក្យ​ដើម្បី​បង្កើន​ចំណង់​ចំណូល​ចិត្ត និង​ការ​ងឿង​ឆ្ងល់​ដល់​កូន ដែល​ធ្វើ​ឱ្យ​ពួកគេ​មាន​ការ​រីក​ចម្រើន​ការ​ចងចាំ​ និង​ចេះ​ពាក្យថ្មី​ឆាប់​រហ័ស៕

បង្រៀនកូនៗពីគុណតម្លៃនៃភាពស្មោះត្រង់

on Thursday, 26 January 2017.

s d7b08b16d2c40c0a9bc6485c4cfc02e90a6e973b

តើអ្នកគួររំពឹងអ្វីខ្លះពីកូនៗ? 

ខណៈ​ដែល​កូនៗ​ចាប់​ផ្ដើម​ចូល​រៀន​ថ្នាក់​មត្តេយ្យ កូនៗ​ប្រាកដ​ជា​អាច​ទទួល​យក​បាន​នូវ​ភាព​ខុស​គ្នា​រវាង​ភាព​ពិត និង​ភាព​មិន​ពិត។ ភាគ​ច្រើន សកម្មភាព​របស់​ពួក​គេ​តែង​តែ​ធ្វើ​ឱ្យ​ពួក​គេ​មាន​ការ​ភ្លេច​ភ្លាំង​ និង​មាន​ការ​គិត​បែប​ស្រមើ​ស្រមៃ (ពួក​គេ​ប្រហែលជា​មិន​បាន​ចាំ​ទេ​ថា​បាន​យក​ស្ករ​គ្រាប់​ពី​ក្នុង​ប្រអប់​ ហើយ​ពួក​គេ​ចង់​ឱ្យ​អ្នក​សប្បាយ​ចិត្ត ដែល​ពួក​គេ​ជឿ​ថាពួក​គេ​មិន​បាន​ធ្វើ​អ្វី​ខុស​ទេ)។  

ប៉ុន្តែ បើ​ទោះ​បី​ជា​ពួក​គេ​ដឹង​ការ​ពិត​ពី​រឿង​ប្រឌិដ្ឋ​ក៏​ដោយ ក៏​ក្មេងៗ​ទាំង​នោះ​មិន​មាន​ស្មារតី និង​ការ​គ្រប់​គ្រង​ខ្លួន​ឯង​ដើម្បី​ជៀស​ពី​ការ​កុហក​ឡើយ។ ជា​ការ​ពិត​ណាស់ កុមារ​ដែល​មាន​វ័យ​ត្រឹម​ថ្នាក់​មត្តេយ្យ​អាច​នឹង​មាន​ភាព​ភ័យ​ខ្លាច​ចំពោះ​ការ​និយាយ​ការ​ពិត។ លោក​ស្រី Jane Nelsen អ្នក​និពន្ធ​សៀវភៅ​ “Positive Discipline” បាន​មាន​ប្រសាសន៍​ឱ្យ​ដឹង​ថា “កុមារ​ទាំង​នោះ​មាន​ការ​ភ័យ​ខ្លាច ឬ​ក៏​ពួក​គេ​ខ្លាច​នឹង​ធ្វើ​ឱ្យ​អ្នក​ខក​ចិត្ត។” កិច្ចការ​ដំបូង​ដែល​អ្នក​ត្រូវ​ធ្វើ​នោះ គឺ​ត្រូវ​បង្កើត​បរិយាកាស​មួយ​ដែល​កូន​អ្នក​មាន​អារម្មណ៍​សុវត្ថិភាព​ក្នុង​និយាយ​ប្រាប់​ការ​ពិត។  

តើអ្នកអាចធ្វើអ្វីខ្លះ? 

ជៀស​វៀង​ការ​ដាក់​ងារ​ឱ្យ​កូន៖ អ្នក​មិន​ត្រូវ​ហៅ​កូនៗ​ថា​ជា​មនុស្ស​កុហក​នោះ​ឡើយ។ ការ​ហៅ​បែប​នេះ​មាន​តែ​ធ្វើ​ឱ្យ​ពួក​គេ​ចាប់​ផ្ដើម​ការពារ​ខ្លួន ហើយ​ចាប់​ផ្ដើម​ជឿ​វា និង​រស់​នៅ​ក្នុង​ពិភព​មួយ​ដែល​គេ​ហៅ​ថា​មនុស្ស​កុហក។ ដូច​នេះ អ្នក​ត្រូវ​ឱ្យ​ពួក​គេ​ដឹង​ថា​អ្នក​មិន​ចូល​ចិត្ត​ការ​កុហក ប៉ុន្តែ​អ្នក​នៅ​តែ​ចូល​ចិត្ត​ពួក​គេ​ ទោះ​បី​ពួក​គេ​បាន​ធ្វើអ្វី​ក៏​ដោយ។ អ្នក​ត្រូវ​និយាយ​ដោយ​ទន់ភ្លន់ តែ​ម៉ត់ចត់​ថា “កូន​និយាយ​ហ្នឹង​ដូច​ជា​មិន​មែន​ជា​ការ​ពិត​ទេ។ ពេល​ខ្លះ​ពួក​យើង​បារម្ភ​ពី​ការ​និយាយ​ការ​ពិត​ប្រសិន​បើ​ពួក​យើង​ខ្លាច​ពេល​ដែល​ពួក​គេ​បាន​ធ្វើអ្វី​មួយ​ខុស។” ការ​និយាយ​បែប​នេះ​បង្ហាញ​ឱ្យ​ពួក​គេ​ដឹង​ថា​អ្នក​មិន​អាច​ទទួល​យក​នូវ​ទង្វើ​របស់​ពួក​គេ​បាន​នោះ​ទេ ប៉ុន្តែ វា​ក៏​បាន​ផ្ដល់​ឱ្យ​គេ​នូវ​ឱកាស​ដើម្បី​បក​ស្រាយ​ថា​ហេតុ​អ្វី​បាន​ជា​គេ​យក​ស្ករ​គ្រាប់​ (“កូន​ដឹង​ថា​បង​ស្រីអាច​យក​ស្ករ​គ្រាប់​បាន​ពេល​គាត់​ចេញ​ពី​រៀន ចឹង​វា​យុត្តិធម៌​ទេដែល​កូន​អត់​បាន​ស្ករ​គ្រាប់​សូម្បី​តែ​មួយ​គ្រាប់​នោះ?” 

មិន​ត្រូវ​សួរ​សំណួរ​ពេល​ដែល​អ្នក​បាន​ដឹង​ពី​ចម្លើយ​មុន៖ ប្រសិន​បើ​អ្នក​ច្បាស់​ក្នុង​ចិត្ត​ថា​កូនៗ​មិន​បាន​សម្អាត​បន្ទប់​គេង​របស់​ពួក​គេ​ទេ​នោះ អ្នក​មិន​ត្រូវ​សួរ​ថា “កូន​បាន​សម្អាត​បន្ទប់​ហើយ​ឬ​នៅ?” នោះ​ទេ​ ហើយ​វា​គឺ​ជា​ដំណាក់​កាល​នៃ​ការ​កុហក។ នេះ​បើ​តាម​ការ​បក​ស្រាយ​របស់​អ្នក​ជំនាញ​ចិត្ត​សាស្ត្រ​គ្រួសារ​ និង​សហ​អ្នក​និពន្ធ​សៀវភៅ “Discipline Without Shouting or Spanking” លោក Jerry L. Wyckoff។ លោក​ក៏​បាន​លើក​ទឹក​ចិត្ត​ឱ្យ​អ្នក​និយាយ​ជំនួស​ដោយ​ការ​ប្រើ​ប្រយោគ “ម៉ាក់​អត់​ឃើញ​កូន​សម្អាត​បន្ទប់​ទេ” ឬ​ក៏ “ឱ្យ​ម៉ាក់​សុំ​មើល​បន្ទប់​បន្តិច​មើល​កូន” ដែល​នេះ​អាច​ឱ្យ​ពួក​គេ​ដឹង​ថា​អ្នក​ចង់​បញ្ជាក់​ការ​ពិត​ហើយ។ ការ​ប្រើ​វិធី​នេះ អ្នក​អាច​ដោះស្រាយ​បាន​បញ្ហា​មួយ គឺ​ទំនួល​ខុស​ត្រូវ​របស់​កូន​ក្នុង​ការ​បំពេញ​កិច្ចការ​អ្វី​មួយ​ដោយ​មិន​មាន​ការ​កុហក។ ប្រសិន​បើ​អ្នក​ចាប់​បាន​ថា​គេ​កុហក​ កុំ​សួរ​គេ​ថា “កូន​និយាយ​ការ​ពិត​អត់​ហ្នឹង?” មាន​កុមារ​តិច​តួច​ណាស់​ដែល​ឆ្លើយ​ប្រាប់​មក​វិញ​ថា “អត់​ទេ”។ អ្នក​អាច​នឹង​ទទួល​បាន​ការ​សហការ​ច្រើន​ជាង​មុន​ប្រសិន​បើ​អ្នក​និយាយ​ថា “ស្ដាប់​មើល​ទៅ​ដូច​ជា​រឿង​និទាន​ចឹង​កូន​។ កូន​ដឹង​អត់ ថា​កូន​នឹង​មិន​មាន​បញ្ហា​អ្វី​ទេ​បើ​កូន​និយាយ​ការ​ពិត។”

រក​ពី​មូលហេតុ​ដែល​ក្មេងៗ​កុហក៖ កូនៗ​ដែល​លេង​ហ្គេម ហើយ​លេង​បន្លំ តែ​បដិសេធ​ថា​មិន​បាន​ធ្វើ​អ្វី​ខុស​ទេ។ ដោយ​ជៀស​ពី​ការ​ប្រដៅ អ្នក​ត្រូវ​ប្រាប់​គេ​ថា ចង់​លេង​ឈ្នះ​ជា​រឿង​ធម្មតា​ទេ តែ​កូន​ត្រូវ​លេង​ដោយ​មាន​ភាព​ស្មោះ​ត្រង់ មិន​ត្រូវ​បន្លំ​គេ​នោះ​ទេ។ កូន​ត្រូវ​លេង​វា​ដោយ​ភាព​ស្មោះ​ត្រង់។

លើក​តំកើង​ការ​និយាយ​ការ​ពិត៖ ពេល​ដែល​កូន​អ្នក​និយាយ​ការ​ពិត ត្រូវ​ផ្ដល់​រង្វាន់​ដល់​ពួក​គេ។ ជា​ពិសេស​បើ​សិន​ជា​គេ​ធ្លាប់​បាន​កុហក​កាល​ពី​មុន គេ​នឹង​មានអារម្មណ៍​សប្បាយ​ចិត្ត​ពេល​ដែល​គេ​ឮ​អ្នក​និយាយ​ប្រាប់​គេ​ថា “អរគុណ​កូន​ដែល​ប្រាប់​ការ​ពិត។ ម៉ាក់/ប៉ា​ចូលចិត្ត​កូន​និយាយ​ការ​ពិត។” 

កុំ​ភ្លេច “ការ​កុហក​ក្នុង​ន័យ​ល្អ”៖ អ្នក​ចង់​ឱ្យ​កូនៗ​ក្លាយ​ជា​មនុស្ស​ស្មោះ​ត្រង់ ប៉ុន្តែ ភាព​ស្មោះ​ត្រង់​ខ្លះ​អាច​ប៉ះពាល់​ដល់​អារម្មណ៍​អ្នក​ដទៃ ឧទាហរណ៍ “ម៉ាក់​យាយ! កាដូ​ហ្នឹង​ដូច​ឆ្កួត! ខ្ញុំ​ចាស់​ពេក​ហើយ មិន​អាច​លេង​តុក្កតា​ខ្លា​ឃ្មុំ​ទេ!” អ្នក​ត្រូវ​ពន្យល់​ប្រាប់​ពួក​គេ​ឱ្យ​និយាយ​បែប​វិជ្ជមាន​ទៅ​កាន់​អ្នក​ដទៃ ឬ​ក្នុង​លក្ខណៈ​សាមញ្ញ​ក៏​ដោយ ដោយ​ត្រូវ​និយាយ​ថា “អរគុណ​លោកយាយ​ដែល​ចាំ​ថ្ងៃ​ខួប​កំណើត​របស់​ចៅ!”

បង្រៀន​កូនៗ​ថា​ការ​កុហក​គ្មាន​ប្រសិទ្ធ​ភាព​ទេ៖ ឧទាហរណ៍​ពេល​ដែល​កូន​របស់​អ្នក​បាន​លេង​បាល់​ ហើយ​វា​ក៏​ប៉ះ​ថូ​ផ្កា​បណ្ដាល​ឱ្យ​រលំ និង​បែក តែ​គេ​ព្យាយាម​បដិសេធ​ថា​មិន​បាន​ធ្វើ​ឱ្យ​បែក។ អ្នក​ត្រូវ​ឱ្យ​ពួក​គេ​លាង​កំហុស​វិញ​ដោយ​ឱ្យជួយ​បោស​សម្អាត​កម្ទេច​ថូ​ផ្កា។ នោះ​ពួក​គេ​នឹង​មាន​អារម្មណ៍​ថា​ការ​កុហក​មិន​អាច​ដោះស្រាយ​បញ្ហា​របស់​ពួក​គេ​បាន​ឡើយ។  

រក្សា​ភាព​ស្រស់​សង្ហា​របស់​អ្នក​ឱ្យ​ជាប់​ជានិច្ច៖ ជា​រឿង​សាមញ្ញ​មួយ​ដែល​អ្នក​ខឹង និង​ខក​ចិត្ត​ពេល​ដែល​អ្នក​រក​ឃើញ​ថា​កូន​តូច​របស់​អ្នក​ចេះ​និយាយ​កុហក ហើយ​អ្នក​ចាប់​ផ្ដើម​ស្រែក​ដាក់​កូន និង​ដាក់​ទណ្ឌកម្ម​ដល់​កូន​នោះ។ ប្រតិកម្ម​ដែល​មាន​ហេតុ​មាន​ផល​អាច​ជួយ​អ្នក​ក្នុង​ការ​បង្រៀន​ពួក​គេ​ឱ្យ​ធ្វើ​បាន​ល្អ​ជាង​មុន​។ អ្នក​ស្រី Jane Nelsen បាន​មាន​ប្រសាសន៍​បញ្ជាក់​ថា “តើ​យើង​បាន​គំនិត​មក​ពី​ណា​ដែល​ថា​បើ​ចង់​ឱ្យ​កូន​ធ្វើ​អំពើ​ល្អ ដោយ​ដំបូង​យើង​ត្រូវ​ធ្វើ​ឱ្យ​គេមាន​អារម្មណ៍​តឹង​តែង​នោះ? ភាគ​ច្រើន​នៃ​ទណ្ឌកម្ម​កើត​ចេញ​ពី​កំហឹង ហើយ​បន្ទាប់​មក​យើង​ធ្វើ​ឱ្យគេ​ខ្លាច”។   

ធ្វើ​ជា​គំរូ​ល្អ៖ វិធី​សាស្ត្រ​ដ៏​ល្អ​បំផុត​ក្នុង​ការ​បង្រៀន​ពី​ភាព​ស្មោះ​ត្រង់ គឺ​ត្រូវ​តែ “ស្មោះ​ត្រង់”។ អ្នក​ត្រូវ​ជៀស​វាង​ការ​កុហក​កូនៗ ទោះ​បី​ស្ថិត​ក្នុង​បញ្ហា​អាក្រក់ ឬ​ពិបាក​ក៏​ដោយ ដូច​ជា ជំងឺ មរណភាព ឬ​ការ​លែង​លះ។ កុមារ​ក្នុង​វ័យ​មត្តេយ្យ​សិក្សា​ក៏​អាច​មាន​អារម្មណ៍​ដែល​បង្ហាញ​ពី​ភាព​មិន​ស្មោះត្រង់​ផង​ដែរ។ ហើយ​អ្នក​ត្រូវ​ចាំ​ថា ពួកគេ​នឹង​រៀន​សូត្រ​ពី​អ្នក​បើសិន​ជាពួក​គេ​ឮ​អ្នក​ហៅ​ទូរស័ព្ទ​ទៅ​កាន់​កន្លែង​ធ្វើការ​ក្នុង​សំឡេង​ឈឺ​ទោះ​ជា​អ្នក​មិន​ឈឺ​ក៏​ដោយ ហើយ​ពេល​ដែល​អ្នក​និយាយ​កុហក​ពី​អាយុ​របស់​ពួក​គេ​ពេល​ទៅ​លេង​សួន​កម្សាន្ដ​ដើម្បី​សន្សំ​លុយ​សំបុត្រ​ថ្លៃ​ចូល​ទស្សនា​ជា​ដើម​នោះ។ ភាព​ស្មោះត្រង់​ពិត​ជា​មាន​តម្លៃ​ ហើយ​អ្នក​គួរ​តែ​ចាប់​ផ្ដើម​បង្កើត​វា​កុំ​ឱ្យអស់​តម្លៃ​ឱ្យ​សោះ​៕ 

គន្លឹះក្នុងការបង្កើតទម្លាប់ល្អក្នុងការសិក្សាដល់កុមារ

on Friday, 04 November 2016. Posted in Parenting Tips, Activities

student boy

ខាង​ក្រោម​នេះ​គឺ​ជា​គន្លឹះ​ខ្លះៗ​ក្នុង​ការ​ជួយ​កុមារ​ឱ្យ​បង្កើត​ទម្លាប់​ល្អ​ក្នុង​ការ​សិក្សា និង​ធ្វើ​កិច្ចការ​សាលា​ដោយ​ខ្លួន​ឯង៖

  1. ស្គាល់​គ្រូ​របស់​ពួក​គេ និង​ដឹង​អ្វី​ដែល​ពួក​គេ​ចង់​បាន៖ ការ​ចូលរួម​ក្នុង​ព្រឹត្តិការណ៍​នានា​របស់​សាលា​ដូច​ជា សិក្ខា​សាលា​ជួប​ជុំ​មាតា​បិតា និង​គ្រូ​បង្រៀន លោក​អ្នក​អាច​សាក​សួរ​ពួក​គេ​ពី​គោលការណ៍​នៃ​ការ​ធ្វើ​កិច្ចការ​ផ្ទះ​ដែល​គ្រូ​បាន​ដាក់​ឱ្យ​ធ្វើ និង​តួនាទី​ដែល​លោក​អ្នក​ត្រូវ​ចូល​រួម​ជាមួយ​កូនៗ។
  2. រៀប​ចំ​ទី​កន្លែង​ដែល​ធ្វើ​ឱ្យ​កូនៗ​​ចូល​ចិត្ត​ធ្វើ​លំហាត់ ឬ​កិច្ចការ​សាលា​ដែល​គ្រូ​បាន​ដាក់​ឱ្យ​ធ្វើ​នៅផ្ទះ៖ លោកអ្នក​ត្រូវ​រៀប​ចំ​ទី​តាំង​ដែល​មាន​ពន្លឺ​គ្រប់​គ្រាន់ ស្ងាត់ និង​មាន​ផាសុកភាព​សម្រាប់​កូនៗ​ងាយ​ក្នុង​ការ​សិក្សា។ បន្ថែម​ពី​នេះ ត្រូវ​រៀប​ចំ​សម្ភារ​សិក្សា​ដូច​ជា​ក្រដាស ខ្មៅ​ដៃ កាវ​ស្អិត ឬ​កន្ត្រៃ​ជា​ដើម​ដែល​កូនៗ​អាច​យក​មក​ប្រើ​ដោយ​ខ្លួន​ឯង​បាន​។
  3. កំណត់​កាល​វិភាគ​សិក្សា​ឱ្យ​បាន​ទៀង​ទាត់៖ កុមារ​មួយ​ចំនួន​ចូល​ចិត្ត​រៀន​នៅ​ពេល​រសៀល កុមារ​មួយ​ចំនួន​ទៀត​ចូល​ចិត្ត​រៀន​នៅ​ពេល​ល្ងាច​បន្ទាប់​ពី​ញ៉ាំ​អាហារ​ពេល​ល្ងាច​រួច។ លោក​អ្នក​ត្រូវ​ដឹង​ថា​ពេល​ណា​ដែល​កូន​របស់​លោក​អ្នក​អាច​រៀន​បាន​ដោយ​ប្រសិទ្ធភាព​បំផុត ហើយ​លោក​អ្នក​ត្រូវ​កំណត់​ពេល​វេលា និង​កាល​វិភាគ​រៀន​របស់​ពួកគេ​ឱ្យ​បាន​ទៀង​ទាត់។
  4. ជួយ​ពួក​គេ​ក្នុង​ការ​រៀបចំ​ផែន​ការ៖ លើក​ទឹក​ចិត្ត​កូន​របស់​លោក​អ្នក​ឱ្យ​ចេះ​រៀបចំ​ពេល​រៀន​ដែល​ពួកគេ​អាច​ធ្វើ​បាន។ បង្ហាត់​ពួក​គេ​ឱ្យ​ចេះ​បង្កើត​កាលវិភាគ​ប្រសិន​បើ​ចាំ​បាច់ ព្រោះ​ជំនាញ​នៃ​ការ​រៀបចំ​កាលវិភាគ​នេះ​នឹង​ជួយ​កូនៗ​របស់​លោក​អ្នក​ឱ្យ​ចេះ​គ្រប់​គ្រង​ពេល​វេលា និង​កិច្ចការ​ ហើយ​ពួកគេ​ក៏​អាច​កំណត់​ថ្ងៃ​ត្រូវ​បញ្ចប់​កិច្ចការ​របស់​ពួក​គេ​ផង​ដែរ។
  5. កាត់​បន្ថយ​ការ​រំខាន៖ លោកអ្នក​មិន​ត្រូវ​ឱ្យ​កូនៗ​រៀន​នៅ​ទី​កន្លែង​ដែល​មាន​សំឡេង​រំខាន​ដូច​ជា​ ទូរទស្សន៍ សំឡេង​តន្ត្រី​ឮៗ ឬ​សំឡេង​និយាយ​ទូរស័ព្ទ។ ប្រសិន​បើ​មាន​កុមារ​ដទៃ​ទៀត​នៅ​ក្នុង​ផ្ទះ​ជាមួយ ត្រូវ​ប្រាប់​ពួកគេ​ឱ្យ​រក្សា​ភាព​ស្ងៀម​ស្ងាត់ ឬ​លេង​នៅ​កន្លែង​ផ្សេង​ពី​ទីតាំង​ដែល​មាន​កូន​កំពុង​រៀន។
  6. ត្រូវ​ប្រាកដ​ថា​កូនៗ​របស់​លោក​អ្នក​ធ្វើ​កិច្ច​សាលា​ដែល​គ្រូ​បាន​ដាក់​ឱ្យ​ធ្វើ៖ ពួកគេ​នឹង​មិន​អាច​រៀន​ចេះ​ឡើយ​បើ​សិន​ជា​ពួក​គេ​រៀន​គិត​ដោយ​ខ្លួន​ឯង​នោះ។ ឪពុក​ម្ដាយ​អាច​ផ្ដល់​យោបល់ និង​ជួយ​ណែនាំ ប៉ុន្តែ​វា​គឺ​ជា​ការងារ​របស់​កូនៗ​ក្នុង​ការ​រៀន​សូត្រ។
  7. ត្រូវ​ធ្វើ​ជា​អ្នក​ជំរុញ​ទឹក​ចិត្ត និង​ត្រួត​ពិនិត្យ៖ ត្រួត​ពិនិត្យ​បើ​សិន​ជា​មាន​កិច្ចការ​សាលា​ដែល​គ្រូ​បាន​ដាក់​ឱ្យ។ បង្កើត​ទម្លាប់​ការ​សិក្សា​រាល់​ថ្ងៃ លើក​ទឹក​ចិត្ត​កូនៗ​ឱ្យ​អាន និង​រំឭក​មេរៀន​ជា​រៀង​រាល់ថ្ងៃ។
  8. ធ្វើ​ជា​គំរូ​ល្អ​ដល់​កូន៖ កុមារ​តែងតែ​ធ្វើ​តាម​នូវ​អ្វី​ដែល​ពួក​គេ​បាន​ឃើញ។ បើកូន​របស់​លោក​អ្នក​ឃើញ​រៀបចំ​ពេល​វេលា​ទោះ​បី​ជា​រវល់​យ៉ាង​ណា​ក៏​ដោយ ដូច​ជា​ពេលវេលា​អាន​សៀវភៅ ឬ​ធ្វើ​អ្វី​ដែល​មាន​ប្រយោជន៍ ពួក​គេ​ប្រាកដ​ជា​ធ្វើ​តាម​លោក​អ្នក​ជាង​ការ​ទទួល​យក​នូវ​ការ​ប្រដៅ។
  9. សរសើរ​ពី​អ្វី​ដែល​ពួក​គេ​បាន​ធ្វើ៖ លោក​អ្នក​ត្រូវ​ប្រាប់​ឱ្យ​ពួក​គេ​ដឹង​ពី​ការ​ខិត​ខំ​ព្យាយាម​របស់​ពួកគេ​នៅ​សាលារៀន ដោយ​មាន​ការ​លើក​ទឹក​ចិត្ត និង​សរសើរ​ពួក​គេ។ លោក​អ្នក​អាច​ធ្វើ​តារាង​អំពើ​ល្អ និង​សមិទ្ធិផល​ណា​មួយ ដោយ​បិទ​ជា​រូបភាព​ផ្កាយ​ជា​ដើម ចំពោះ​ទង្វើ ឬ​ការ​ខិត​ខំ​ល្អ​មួយ​។ ឬ​ក៏លោក​អ្នក​អាច​និយាយ​សរសើរ​ពីពួក​គេ​ដល់​ញាតិ​មិត្ត​ជា​ដើម។
  10. ប្រសិន​បើ​មាន​​បញ្ហា​​កើត​ឡើង​ជា​បន្ត​បន្ទាប់​លើ​កិច្ចការ​សាលា ត្រូវ​រក​ជំនួយ៖ និយាយ​ពី​បញ្ហា​នោះ​ជាមួយ​នឹង​គ្រូបង្រៀន​របស់​កូន​អ្នក។ កុមារ​ខ្លះ​មាន​បញ្ហា​មើល​ក្ដារ​ខៀន ហើយ​ត្រូវ​ការ​ពាក់​វែនតា​ ហើយ​កុមារ​ខ្លះ​ទៀត​ត្រូវ​ការ​តាម​ដាន​បញ្ហា​សិក្សា ឬ​ត្រូវ​ការ​ការ​ណែនាំ​ផ្នែក​អាកប្បកិរិយា។

សម្រាប់​កុមារ​តូចៗ​ដែល​កំពុង​សិក្សា​ថ្នាក់​មត្តេយ្យ​កម្រិត​ទាប និង​មត្តេយ្យ កិច្ចការ​ដែល​គ្រូ​បាន​ដាក់​ឱ្យ​ធ្វើ​គ្រាន់​តែ​ជា​ការ​បង្កើត​ទម្លាប់​សិក្សា​ល្អ​ដល់​កុមារ​តែ​ប៉ុណ្ណោះ។ ដូច្នេះ លោក​អ្នក​ដែល​ជា​ឪពុក​ម្ដាយ​គ្រាន់តែ​តាម​ដាន ជំរុញ​ទឹក​ចិត្ត និង​ត្រួត​ពិនិត្យ​កូនៗ ហើយ​មិន​ត្រូវ​ដាក់​សម្ពាធ​ដល់​កូនៗ​ឱ្យ​ធ្វើ​កិច្ចការ​ល្អ​ឥត​ខ្ចោះ​ពេក​នោះ​ទេ៕

English version: FORMING GOOD STUDY HABITS WITH CHILDREN

ជំនាញអានដំបូងសម្រាប់កុមារតូចៗ

on Wednesday, 26 October 2016. Posted in Activities

ជំនាញ​អាន​ដំបូង​សម្រាប់​កុមារ​តូចៗ គឺ​ជា​ជំនាញ​ដែល​កុមារ​ត្រូវ​មាន​ដើម្បី​ជួយ​ពួក​គេ​ឱ្យ​ក្លាយ​ជា​អ្នក​អាន​ម្នាក់​។ ភាគ​ច្រើន​នៃ​ជំនាញ​នេះ​ត្រូវ​បាន​រៀន​ដោយ​ធម្មជាតិ នៅ​ក្នុង​ថ្នាក់​រៀន​របស់​ពួក​គេ នៅ​គេហដ្ឋាន​ និង​នៅ​ក្នុង​បរិយាកាស​ថ្នាក់​រៀន​ថែ​ទាំ​កុមារ​តូចៗ ឬ​ថ្នាក់​មត្តេយ្យ​កម្រិត​ទាប។ ការ​និយាយ និង​អាន​ជាមួយ​កុមារ អ្នក​នឹង​ក្លាយ​ជា​ចំណែក​ដ៏​សំខាន់​ដែល​ជួយ​ពួក​គេក្នុង​ការ​អភិវឌ្ឍ​ជំនាញ​អាន​។

Por Por

រៀន​ផ្គូរ​ផ្គង៖ នៅ​ពេល​អ្នក​អាន អ្នក​ត្រូវ​ធ្វើ​ការ​ភ្ជាប់​អ្វី​ដែល​ទាក់​ទង​នឹង​អត្ថបទ​ឱ្យ​កូន​ដឹង​។ កុមារ​រៀន​ផ្គុំ​រូប​រាង ផ្ទៃ អក្សរ និង​ពាក្យ។

រៀន​តាម​បទ​ចម្រៀង៖ ការ​ស្រាវជ្រាវ​មួយ​បាន​បង្ហាញ​ឱ្យ​ដឹង​ថា​កុមារ​ដែល​អាច​យល់​ពី​បទ​ចម្រៀង​ដែល​មាន​ពាក្យ​ច្រើន គឺ​ជា​កុមារ​ដែល​មាន​ភាព​ឈាន​មុខ​គេ​ក្នុង​ការ​រៀន​អាន និង​ប្រកប​។

ជំនាញ​ផ្នែក​អក្សរ៖ ដូច​គ្នា​ទៅ​នឹង​ការ​សម្គាល់​រាង​អក្សរ រៀន​សំឡេង​ទូទៅ​ដែល​តួ​អក្សរ​នីមួយៗ​ត្រូវ​បញ្ចេញ​ដែល​ធ្វើ​ឱ្យ​កុមារ​រៀន​សូត្រ​បាន​យ៉ាង​ឆាប់​រហ័ស។

ការ​ណែនាំ៖ អ្នក​ត្រូវ​មាន​ក្រដាស ឬ​សៀវភៅ​សម្រាប់​អាន ដោយ​ប្រាប់​កុមារ​តូចៗ​ឱ្យ​ចេះ​អាន​ពី​ឆ្វេង​ទៅ​ស្ដាំ នោះ​ពេល​ពួក​គេ​អាច​អាន​សៀវភៅ​ពេល​អ្នក​មិន​នៅ​ដោយ​មិន​ចាំបាច់​មាន​អ្នក​ប្រាប់​ទៀត​ឡើយ​។

ជំនាញ​នៃការ​ប្រើ​ចលនា៖ ការ​អនុវត្ត​ការ​សរសេរ​អក្សរ និង​ពាក្យ​ពេល​ដែល​ពួក​គេ​រៀន​អាន​អាច​ជួយ​ឱ្យ​ពួក​គេ​ទទួល​បាន​នូវ​ការ​អភិវឌ្ឍ​ជំនាញ​សរសេរ​ព្រម​ជាមួយ​នឹង​ជំនាញ​អាន។ ការ​កាន់​​ខ្មៅ​ដៃ​សរសេរ​អាច​ជួយ​ឱ្យ​ពួក​គេ​ប្រើ​ចលនា​សាច់​ដុំបាន​ប្រសើរ និង​ផ្ដល់​សារប្រយោជន៍​ដល់​ការ​សិក្សា​របស់​​ពួក​​គេ។

គំនិត​សម្រាប់​ការ​ប្រើ​សៀវភៅ៖ លោក​អ្នក​ត្រូវ​ដឹង​ថា​តើ​គួរ​ប្រើ​សៀវភៅ​របៀប​ណា កាន់​សៀវភៅ​ឱ្យ​ត្រឹម​ត្រូវ របៀប​បើក​សៀវភៅ​ពី​ទំព័រ​មួយ​ទៅ​ទំព័រ​មួយ​ទៀត ស្វែង​រក​រូបភាព​ដែល​មាន​ក្នុង​សៀវភៅ និង​ដឹង​ពី​ពាក្យ​ដែល​អាច​អាន​បាន។

ជំនាញ​ភាសា៖ បទពិសោធន៍​ដែល​កុមារ​មាន​ពី​ការ​សិក្សា​ភាសា នឹង​ធ្វើឱ្យ​ពួក​គេ​កាន់​តែ​មាន​ភាព​ងាយ​ស្រួល​ក្នុង​ការ​អាន។ កូនៗ​របស់​លោក​អ្នក​ត្រូវ​តែ​ស្ដាប់ និង​ចូល​រួម​សន្ទនា (មនុស្ស​ពេញ​វ័យ និង​កុមារ​) និង​ស្ដាប់​រឿង​និទាន និង​កំណាព្យ​ផ្សេងៗ​។

លើសពី​សារសំខាន់​នៃ​ជំនាញ​ទាំង​នេះ ការ​ពិត​ដែល​មិន​អាច​គេច​វេស​បាន​ គឺ​ពួក​គេ​នឹង​មាន​ការ​អនុវត្ត​ និង​អភិវឌ្ឍ​ចំណេះ​ដោយ​ការ​រៀន​អាន។ លោក​អ្នក​មិន​ត្រូវ​ពន្យារ​ពេល​ការ​អាន​របស់​កូនៗ​ឡើយ​ ព្រោះ​ថា​ពួក​គេ​នឹង​ត្រូវ​តែ​រៀន។ ប្រសិន​បើ​ពួក​គេ​ចាប់​ផ្ដើម​ធ្វើ​ជា​អាន ឬ​សួរ​សំណួរ​ថា “ពាក្យ​នេះ​គេ​អាន​យ៉ាង​ម៉េច?” “តើ​នេះ​ជា​អក្សរ​អ្វី?” នេះ​គឺ​ជា​សញ្ញា​ប្រាប់​ឱ្យ​ដឹង​ថា​ពួក​គេត្រៀម​ខ្លួន​អាន​ហើយ។ ប៉ុន្តែ ពួក​គេ​ក៏​ប្រហែល​​ជា​មិន​អាច​សួរ​សំណួរ​ផង​ដែរ​ប្រសិន​បើ​ពួក​គេ​មិន​ដែល​ធ្លាប់​ឮ​ពាក្យ ឬ​អក្សរ​ទាំង​នោះ ដូច្នេះ​ហើយ​ការ​អាន និង​ចែក​រំលែក​សៀវភៅ​ជាមួយ​ពួក​គេ រៀប​រាប់​ពី​រូបភាព និងប្រើ​ម្រាម​ដៃ​សរសេរ​ជា​អក្សរ​ពេល​កំពុង​អាន​ជាមួយ​ពួក​គេ។ 

តើ​លោក​អ្នក​អាច​ធ្វើអ្វី​បាន​ខ្លះ​ដើម្បី​ជួយ​កូនៗ​ក្នុង​ការ​អភិវឌ្ឍ​ជំនាញ​អាន​បឋម?

ការផ្គុំ

  • ហ្គេមផ្គុំកាត
  • លេងបោះឡុកឡាក់
  • អានសៀវភៅដែលមានលាយការផ្គុំរូបរាង រូបភាព និងតួអក្សរ
  • រៀបស្រោមជើងជាគូពេលបោកសម្អាតរួច
  • រៀបរូបរាង
  • រៀបរូបផ្គុំ

សូត្រចម្រៀងសម្រាប់កុមារ

  • ច្រៀងចម្រៀងសម្រាប់កុមារតូចៗ
  • ពេល​ច្រៀង ត្រូវ​ទុក​ពាក្យ​ចុង​ក្រោយ​ឱ្យ​កូនៗ​ជា​អ្នក​ច្រៀង​បន្ទរ។ ឧទាហរណ៍៖ "Humpty Dumpty sat on a wall, Humpty Dumpty had a great...?"។
  • ពេល​ដែល​ការ​ច្រៀង​មាន​លក្ខណៈ​ងាយ​ស្រួល​សម្រាប់​ពួក​គេ​ហើយ លោក​អ្នក​អាច​ចាប់​ផ្ដើម​ប្ដូរ​ខ្លឹម​សារ​ចម្រៀង។ ឧទាហរណ៍៖ "Humpty Dumpty sat in a tree, Humpty Dumpty had a cup of ...?"។
  • លើក​ទឹកចិត្ត​កូនៗ​ឱ្យ​ច្រៀង​តាម​ចម្រៀង​នានា ដូច​ជា​ចម្រៀង​សម្រាប់​កុមារ ចម្រៀង​ល្បី ឬ​អ្វី​ដែល​ពួក​គេ​ចូល​ចិត្ត។

ជំនាញអក្សរ

  • ណែនាំតួអក្សរ និងសំឡេងរបស់វាតាមលំដាប់
  • ចាប់​ផ្ដើម​ជាមួយ​នឹង​តួអក្សរ​ដែល​សំខាន់​សម្រាប់​កូន ដូច​ជា​អក្សរ​ដែល​សម្គាល់​ឈ្មោះ​របស់​ពួក​គេ និង​អក្សរ​ដែល​មាន​រូបរាង​គួរ​ឱ្យ​ចាប់​អារម្មណ៍ និង​ធ្វើ​ឱ្យ​ពួក​គេ​ងាយ​សម្គាល់ និង​ចង​ចាំ​បាន​ឆាប់​រហ័ស។
  • ប្រើ​អក្សរ​សំឡេង​ប្រសើរ​ជាង​ប្រើ​ឈ្មោះ។ ឧទាហរណ៍៖ 'a for ant', not 'ay for ape'។ អក្សរ​សំឡេង​មាន​សារសំខាន់​ក្នុង​ការ​រៀន​ជាង​ការ​អាន​ឈ្មោះ។
  • ជាទូទៅ លោកអ្នកអាចប្រើអក្សរតូចដើម្បីចាប់ផ្ដើម លើកលែងតែអក្សរដំបូងនៃឈ្មោះ។

ការបង្ហាញទិស

  • កូន​របស់​អ្នក​មិន​ចាំ​បាច់​ត្រូវ​ដឹង “ឆ្វេង” ឬ “ស្ដាំ” ឡើយ ព្រោះ​មនុស្ស​ពេញ​វ័យ​ក៏​នៅ​តែ​មាន​ការ​ច្រឡំ​ផង​ដែរ។
  • នៅពេលអានសៀវភៅឱ្យកូនស្ដាប់ ព្យាយាមប្រើម្រាមដៃអូសតាមជួរ។
  • បន្ទាប់​មក​ទៀត អ្នក​អាច​សួរ​គេ​ថា​ត្រូវ​ចាប់​ផ្ដើម​អាន​ពីណា​ទៅ​ណា ព្យាយាម​អាន​ពាក្យ​បញ្ច្រាស​ឃ្លា​ដើម្បី​បង្ហាញ​ពួក​គេ​ថា​ឃ្លា​ទាំង​នោះ​ស្ដាប់​ទៅ​គ្មាន​ន័យ ហើយ​ការ​អាន​មិន​បាន​ចាប់​ផ្ដើម​ពី​ចំណុច​ត្រឹម​ត្រូវ​ឡើយ។

ជំនាញនៃការប្រើចលនា

  • លើក​ទឹក​ចិត្ត​កូនៗ​ឱ្យ​មាន​គំនិត​ច្នៃ​ប្រឌិត ចេះ​គូរ​រូប និង​លាប​ពណ៌​ដោយ​ប្រើ​ឧបករណ៍ និង​សម្ភារ​ផ្សេងៗ។
  • ឱ្យ​ពួក​គេ​លេង​ប្រដាប់​លេង​តូចៗ ជា​ពិសេស​ឈុត​ទាក់​ទង​នឹង​ការ​សាង​សង់ ដែល​វា​អាច​ជួយ​ឱ្យ​ពួក​គេ​អាច​ប្រើ​ចលនា​ម្រាម​ដៃ​បាន​យ៉ាង​ប្រសើរ។
  • ការ​ប្រើ​កន្ត្រៃ​សម្រាប់​កុមារ គឺ​ជា​ជំនាញ​ដ៏​មាន​ប្រយោជន៍​មួយ​ដែល​អាច​ចូល​រួម​ចំណែក​ជួយ​ពួក​គេ​ឱ្យ​អភិវឌ្ឍ​ជំនាញ​នៃ​ការ​ប្រើ​ចលនា។

គំនិតនៃការបោះពុម្ព

  • ការ​អាន​សៀវភៅ​ជាមួយ​កូន គឺ​ជាវិធីសាស្រ្ត​ដ៏​ល្អ​បំផុត​ដែល​អាច​ជួយ​ពួក​គេ​ឱ្យ​ចេះ​កាន់​សៀវភៅ​អាន​។
  • លោក​អ្នក​ត្រូវ​រៀប​ចំ​ទូ​ដាក់​សៀវភៅ​មួយ​ដែល​អាច​ឱ្យ​កូនៗ​អាច​យក​សៀវភៅ​មក​អាន​ដោយ​ខ្លួន​ឯង​បាន។
  • នាំ​ពួកគេ​ទៅ​បណ្ណាល័យ
  • ប្ដូរ​សៀវភៅ​ជាមួយ​នឹង​មិត្តភក្ដិ និង​គ្រួសារ​
  • ទិញ​សៀវភៅ​ពី​កន្លែង​លក់​សៀវភៅ​កុមារ​តម្លៃ​មិន​សូវ​ថ្លៃ
  • និយាយ​ពី​សៀវភៅ​ដែល​អ្នក​អាន បង្ហាញ​ចំណង​ជើង សួរ​ពួក​គេ​ថា​តើ​ពួក​គេ​គិត​ថា​សៀវភៅ​នោះ​នឹង​និយាយ​ពី​អ្វី។ល។

ជំនាញភាសា

  • ការ​សន្ទនា​ជាមួយ​កូនៗ គឺ​ជាវិធី​ដ៏​ល្អ​បំផុត​ដើម្បី​ជួយ​អភិវឌ្ឍ​ជំនាញ​ភាសា​របស់​ពួក​គេ។
  • ការអានរឿងឱ្យពួកគេស្ដាប់នឹងធ្វើឱ្យពួកគេចេះពាក្យច្រើន។
  • លោក​អ្នក​ត្រូវ​ប្រាកដ​ថា​កូនៗ​មាន​ឱកាស​គ្រប់គ្រាន់​ក្នុង​ការ​និយាយ​ទៅ​កាន់​មនុស្ស​ធំ និង​កុមារ​ដូច​គ្នា៕

ប្រភព៖ Family Learning

Contact Us

Address

#168, Street 156
Phnom Penh, Cambodia 
This email address is being protected from spambots. You need JavaScript enabled to view it. 
Make appointment or visit school

Telephone

095 712 165 

Early Childhood Education

Teacher Training

Teacher training for those who may wish to follow Liberty Education's  curriculum can be arranged by appointment. Please contact the school for more information.