វិធីងាយៗក្នុងការបង្កើនការចងចាំដល់កូនៗ

on Monday, 10 October 2016. Posted in Parenting Tips

ការ​ចងចាំ​ធ្វើ​ឱ្យ​ជីវិត​ដល់​កុមារ​មាន​ន័យ និង​អាច​ផ្ដល់​ឱ្យ​ពួក​គេ​នូវ​គំនិត​ជា​ច្រើន​ក្នុង​ការ​និយាយ ដែល​ជា​ការ​ឆ្លើយ​តប​ទៅ​នឹង​ការ​អភិវឌ្ឍ​ជំនាញ​ភាសា​របស់​ពួក​គេ។ ខាង​ក្រោម​នេះ​គឺ​ជា​វិធី​មួយ​ចំនួន​ដែល​អាច​ជួយ​បណ្ដុះ​ការ​ចង​ចាំ​របស់​កុមារ។ 

preschooler with clay 

1. បង្កើតទម្លាប់៖ កុមារ​តូចៗ​ព្យាយាម​ជានិច្ច​ក្នុង​ការ​បង្កើត​ទម្លាប់​នានា ហើយ​ពួក​គេ​ក៏​អាច​អនុវត្ត​វា​បាន​ជា​រៀង​រាល់​ថ្ងៃ​ដើម្បី​បង្កើន​ភាព​ចង​ចាំ។ ប្រសិន​បើ​កូន​អាយុ 1 ឆ្នាំ​ដឹង​ថា​គាត់​បាន​រំកិល​រក​កន្លែង​កក់​ក្ដៅ​បន្ទាប់​ពី​ងូត​ទឹក​រួច នោះ​គាត់​នឹង​ចាប់​ផ្ដើម​ទ្រាំ និង​ទម្លាប់។ នៅ​ពេល​ដែល​គាត់​ចាប់​ផ្ដើម​ធំ អ្នក​អាច​បង្កើន​ការ​ចង​ចាំ​ផ្នែក​ភាសា​ដោយ​ផ្សារ​ភ្ជាប់​ជាមួយ​នឹង​ការ​សួរ​សំណួរ​ងាយៗ​ដូច​ជា “តើ​នឹង​មាន​អ្វី​កើត​ឡើង​បន្ទាប់​ពី​កូន​ងូត​ទឹក​រួច?”។ 

2. លេង​ហ្គេម​ចង​ចាំ៖ សួរ​សំណួរ​នៅ​ពេល​ដែល​អ្នក​ចេញ​ក្រៅ និង​មក​ពី​ក្រៅ។ ឧទាហរណ៍ ប្រសិន​បើ​អ្នក​ធ្វើ​ដំណើរ​ឆ្លង​កាត់​ផ្ទះ​មិត្តភក្ដិ អ្នក​អាច​សួរ​គេ​ថា “តើ​អ្នក​ណា​រស់​នៅ​ផ្ទះ​នេះ?”។ ការ​លេង​ហ្គេម​របៀប​នេះ​បាន​ផ្ដល់​បទ​ពិសោធន៍​ដល់​កុមារ​ក្នុង​ការ​រំឮក​នូវ​ព័ត៌មាន​ដែល​គេ​ដឹង​ឡើង​វិញ។ 

3. បង្ហាញ​ពី​របៀប​អនុវត្ត​កិច្ចការ៖ ទារក​តែង​តែ​ធ្វើ​តម្រាប់​តាម​ឪពុក​ម្ដាយ​របស់​ពួក​គេ។ ប្រសិន​បើ​អ្នក​ចង់​ឱ្យ​ពួក​គេ​រៀន​ធ្វើ​អ្វី​មួយ អ្នក​គួរ​តែ​បង្ហាញ​ពួក​គេ​ពី​របៀប​ធ្វើ ហើយ​ទុក​ឱ្យ​ពួក​គេ​ធ្វើ​វិញ​ម្ដង។ ការ​ដែល​ឱ្យ​ពួក​គេ​អនុវត្ត​ជាង​ការ​មើល​តែ​នឹង​ភ្នែក ព្រោះ​ពេល​ដែល​ធ្វើ​សកម្មភាព ខួរ​ក្បាល​របស់​ពួក​គេ​នឹង​ថត​យក​សកម្មភាព ជំហាន​ដែល​ត្រូវ​ធ្វើ និង​ធ្វើ​ឱ្យ​ការ​ចង​ចាំ​កាន់​តែ​ច្បាស់​ជាង​មុន។ ពេល​ដែល​ទារក​អាច​រៀន​បាន​ពី​ឧទាហរណ៍ ឬ​គំរូ​ណា​មួយ ពួក​គេ​អាច​ចាំ​ល្អ និង​បាន​យូរ​បំផុត​ប្រសិន​បើ​លោក​អ្នក​បន្ត​អនុវត្ត​សកម្មភាព​នោះ​ដដែលៗ​ឱ្យ​ពួក​គេ​ឃើញ​ក្នុង​រយៈ​ពេល​ច្រើន​ថ្ងៃ​ជាប់​គ្នា។

4. និយាយ​ជាមួយ​កូន​ពី​បទ​ពិសោធន៍​របស់​ពួក​គេ៖ អ្នក​ត្រូវ​ផ្ដោត​សំខាន់​លើ​ព្រឹត្តិការណ៍​ណា​ដែល​ធ្វើ​ឱ្យ​កូនៗ​មាន​អារម្មណ៍​រំភើប ដូច​ជា​ពេល​ដែល​ធ្វើ​ដំណើរ​ទៅ​លេង​សួន​សត្វ​ជា​ដើម។ ពេល​ដែល​ពួក​គេ​មាន​វ័យ​កាន់​តែ​ធំ​បន្តិច អ្នក​អាច​ជួយ​ពួក​គេ​រៀប​ចំ​កម្រង​រឿង។ ការ​ចងចាំ​របស់​ពួក​គេ​នឹង​កាន់​តែ​ខ្លាំង​ទៅៗ​ ហើយ​ពួកគេ​នឹង​រៀន​ពី​ការ​ចង​ក្រង​ឱ្យ​ទៅ​ជា​ទម្រង់​មួយ​ច្បាស់​លាស់។ មិន​យូរ​ប៉ុន្មាន ពួក​គេ​នឹង​រំឮក​លោក​អ្នក​ពី​ពេល​វេលា​ល្អ​ដែល​បាន​ឆ្លង​កាត់​ជាមួយ​អ្នក៕

ប្រភព៖ Parents.com

បង្រៀនកូនៗឱ្យក្លាយជាមិត្តភក្ដិល្អ

on Thursday, 06 October 2016. Posted in Parenting Tips

កុមារ​ចាប់​ផ្ដើម​បង្កើត​មិត្តភាព​ដ៏​មាន​ន័យ និង​ពេញ​លេញ​ក្នុង​ចន្លោះ​អាយុ​ពី 4 ទៅ 5 ឆ្នាំ។ ទំនាក់​ទំនង​ទាំង​នោះ​មាន​ដូច​ជា​ទំនាក់​ទំនង​រវាង​មិត្ត​រួម​ថ្នាក់ មិត្ត​ជិត​ខាង បង​ប្អូន​ជីដូន​មួយ និង​មិត្តភក្ដិ​របស់​ឪពុក​ម្ដាយ​ជា​ដើម។ មិត្ត​ភាព​ទាំង​នេះ​ត្រូវ​បាន​រីក​លូត​លាស់​ឡើង​តាម​រយៈ​ការ​ចូល​រួម​ពី​ឪពុក​ម្ដាយ និង​កូនៗ​ ហើយ​ពួក​គាត់​តែង​តែ​ជួយ​ពួក​គេ​ឱ្យ​ក្លាយ​ជា​មិត្តភក្ដិ​ល្អ។ មាន​ជំនាញ​សំខាន់ៗ​ដែល​ពួក​គេ​ត្រូវ​ការ​ដើម្បី​ក្លាយ​ជា​មិត្ត​ល្អ និង​ការ​ណែនាំ​ផ្នែក​សង្គម និង​ស្មារតី​ពី​ឪពុក​ម្ដាយ​នឹង​ជួយ​ឱ្យ​ទំនាក់​ទំនង​របស់​ពួក​គេ​កាន់​តែ​មាន​ផ្លែ​ផ្កា។

good friend

នៅ​ពេល​ដែល​លោក​អ្នក​ជួយ​ណែនាំ​កូន​ឱ្យ​ក្លាយ​ជា​មនុស្ស​រួស​រាយ លើក​ទឹក​ចិត្ត​ពួក​គេ​ឱ្យ​ចេះធ្វើ​ការ​សម្រេច​ចិត្ត​ឆ្លាត​វៃ និង​ចេះ​ឆ្លើយ​តប​ទៅ​កាន់​មិត្តភក្ដិ​ដែល​កំពុង​មាន​សម្ពាធ នោះ​ពួក​គេ​នឹង​កាន់​តែ​មាន​ភាព​ជោគជ័យ​ក្នុង​មិត្តភាព​របស់​ពួក​គេ​ដោយ​សារ​តែ​ការ​ណែនាំ​ទាំង​នេះ។

ភាពដូចគ្នា

នេះ​អាច​ថា​កុមារ​ដែល​នៅ​ក្នុង​ក្រុម​បាល់​ទាត់​ជាមួយ​គ្នា នៅ​ក្នុង​ថ្នាក់​ជាមួយ​គ្នា រស់​នៅ​ផ្ទះ​ក្បែរ​គ្នា ដែល​មាន​អាយុ​ខុស​គ្នា​តិច​តួច ឬ​អាយុ​ស្មើ​គ្នា។ ភាព​ដូច​គ្នា​នេះ​មាន​ចំពោះ​កូន​របស់​លោក​អ្នក និង​មិត្តភក្ដិ​របស់​ពួក​គេ​ដែល​មាន​ការ​ចែក​រំលែក​ចំណង់​ចំណូល​ចិត្ត​ដូច​គ្នា ដូច​ជា​គូរ​រូប តែងចម្រៀង លេង​បិទ​ពួន​ ឬ​ជិះ​កង់​ជា​ដើម ដែល​សុទ្ធ​តែ​ធ្វើ​ឱ្យ​ពួក​គេ​មាន​ការ​ទាក់​ទង​គ្នា។ ដូច្នេះ សូម​លោក​អ្នក​ជួយ​កូនៗ និង​មិត្តភក្ដិ​របស់​ពួកគេ​ស្វែង​យល់​ពី​ចំណង់​ចំណូល​ចិត្ត​របស់​ពួក​គេ និង​ស្វែង​រក​អ្វី​ដែល​ពួក​គេ​មាន​ដូច​គ្នា។

ចេះជួយគ្នា

មិត្តភក្ដិ​តែងតែ​ជួយ​គ្នា​ជានិច្ច​ពេល​ដែល​មិត្តភក្ដិ​កើត​ទុក្ខ ឬ​មិន​សប្បាយ​ចិត្ត។ ពួកគេ​តែង​តែ​ឱ្យ​ស្មា​ផ្អែក​ លើក​ទឹក​ចិត្ត​គ្នា​ឱ្យ​រឹង​មាំ និង​ជួយ​យក​អាសារ​គ្នា​ពេល​លំបាក។ ពួក​គេ​ក៏​តែងតែ​អបអរ​សាទរ​ពេល​ដែល​ជោគ​ជ័យ ឬ​ឈ្នះ​លើ​កិច្ចការ​ណា​មួយ។

មិននិយាយដើមគ្នា

មិត្តភក្ដិ​ល្អ គឺ​ជា​មិត្តភក្ដិ​ស្មោះ​ត្រង់ ហើយ​មិន​ដែល​ចេះ​និយាយ​អាក្រក់​ពី​គ្នា​ទោះ​ក្នុង​លក្ខណៈ ឬ​ស្ថាន​ភាព​ណា​ក៏​ដោយ។ បង្រៀន​កូន​លោក​អ្នក​កុំ​ឱ្យ​និយាយ​ពាក្យ​អសុរស​ពី​មិត្ត​របស់​ពួក​គេ ហើយ​សួរ​ពួក​គេ​ថា​ពួកគេ​នឹង​មាន​អារម្មណ៍​យ៉ាង​ណា​ប្រសិន​បើ​មិត្តភក្តិ​ជិត​ស្និទ្ធ​របស់​ពួក​គេ​និយាយ​អាក្រក់​ពី​គេ​នៅ​ពី​ក្រោយ​ខ្នង ឬ​ក៏​ធ្វើ​អាក្រក់​ដាក់​ពួក​គេ។ នោះ​ពួក​គេ​នឹង​យល់​ពី​អារម្មណ៍​មួយ​នោះ។ ជាមួយ​គ្នា​នេះ​ដែរ ប្រសិន​បើ​កូន​របស់​លោក​អ្នក​ស្ដាប់​ឮ​នរណា​ម្នាក់​និយាយ​អាក្រក់​ពី​មិត្ត​របស់​គេ អ្នក​ត្រូវ​លើក​ទឹក​ចិត្ត​ឱ្យ​ពួក​គេ​ការពារ​សម្ដី​ឱ្យ​មិត្ត​ភក្ដិ។ មិត្តភក្ដិ​ល្អ គឺ​ជា​មិត្តភក្ដិ​ដែល​ស្មោះ​ត្រង់។

ចែករំលែក

មិត្តភក្ដិ​ល្អ​តែង​តែ​ចែក​រំលែក​របស់ បទ​ពិសោធន៍ ផ្ទះ និង​ជីវិត​ជាមួយ​នឹង​មិត្តភក្ដិ។ ប្រសិន​បើ​កូន​លោក​អ្នក​មាន​អារម្មណ៍​ថា​ពិបាក​ក្នុង​ការ​ចែក​រំលែក​ជាមួយ​មិត្តភក្ដិ សូម​លើក​ទឹក​ចិត្ត​ពួក​គេ​ឱ្យ​ចែក​អ្វី​ដែល​គេ​មាន ដូចជា​របស់​លេង ឬ​ចំណី​ជាដើម។

ចេះ​និយាយពាក្យសុំទោស

ជា​មិត្តភក្ដិ​នឹង​គ្នា​តែងតែ​មាន​គំនិត​ខ្វែង​គ្នា​ខ្លះ ឬ​ធ្វើ​ទង្វើ​មិន​គប្បី​ដាក់​មិត្តភក្ដិ ហើយ​វា​ពិត​ជា​សំខាន់​សម្រាប់​ពួក​គេ​ក្នុង​ការ​ទទួល​ស្គាល់​កំហុស និង​សុំទោស​គ្នា​ទៅ​វិញ​ទៅ​មក។ ក្នុង​នាម​ជា​ឪពុក​ម្ដាយ​ លោក​អ្នក​ចាំ​បាច់​ត្រូវ​ជួយ​សម្រប​សម្រួល​ពួក​គេ​ក្នុង​កិច្ចសន្ទនា​ណា​ដែល​អាច​ឈាន​ទៅ​រក​ការ​ខ្វែង​គំនិត​គ្នា និង​ជួយ​ពួក​គេ​ក្នុង​ការ​ប្រើ​សំឡេង ដោយ​ធ្វើ​យ៉ាង​ណា​កុំ​ឱ្យ​មាន​ការ​តម្លើង​សរសៃ​ក​ដាក់​គ្នា។

ត្រូវថែរក្សាមិត្តចាស់ និងមិត្តថ្មីឱ្យគង់វង្ស

ការ​មាន​មិត្តភក្ដិ​ថ្មី​គឺ​ជា​រឿង​ល្អ​មួយ តែ​លោក​អ្នក​ត្រូវ​បង្រៀន​កូនៗ​ឱ្យ​ចេះ​ថែ​រក្សា​មិត្ត​ភក្ដិ​ចាស់ៗ​របស់​ពួក​គេ​ឱ្យ​គង់​វង្ស។ មិត្ត​ល្អ មិន​មែន​ស្ថិត​លើ​មិត្ត​ចាស់ ឬ​មិត្ត​ថ្មី​នោះ​ឡើយ។ ពេល​ដែល​ក្មេងៗ​មាន​មិត្តភក្ដិ​ថ្មី​ ត្រូវ​ឱ្យ​ពួក​គេ​ប្រាកដ​ក្នុង​ចិត្ត​ថា​ពួក​គេ​មិន​បោះបង់​មិត្តភក្ដិ​ចាស់ ឬ​ក៏​ធ្វើ​ឱ្យ​មិត្តភក្ដិ​ចាស់​មាន​អារម្មណ៍​ខ្វះ​ភាព​ជិត​ស្និទ្ធ​ឡើយ។ លោក​អ្នក​អាច​ណែនាំ​ពួក​គេ​ឱ្យ​នាំ​មិត្ត​ចាស់ និង​មិត្ត​ថ្មី​ស្គាល់​គ្នា៕

ប្រភព៖ Living and Life Designed

បង្រៀនកូនៗឱ្យចេះចែករំលែក

on Friday, 23 September 2016. Posted in Parenting Tips

អ្នក​ដែល​ធ្លាប់​បាន​មើល​ថែ ឬ​បង្រៀន​កុមារ​តូចៗ​ពី​សិល្បៈ​នៃ​ការ​ចែក​រំលែក អាច​មាន​ភាព​លំបាក​ក្នុង​ការ​សម្រេច​ឱ្យ​បាន​ជោគ​ជ័យ។ ខណៈ​ដែល​ឪពុក​ម្ដាយ​ខ្លះ​យល់​ថា​ភាព​លំបាក​នេះ​អាច​ជា​សញ្ញាណ​នៃ​ភាព​អាត្មា​និយម ឬ​ក៏​ទម្រើស ប៉ុន្តែ​វា​មិន​មែន​ដូច្នោះ​ទេ។ កុមារ​តែង​តែ​មាន​ភាព​ស្ទាក់​ស្ទើរ​ក្នុង​ការ​រៀន​ពី​ការ​ចែក​រំលែក​ដែល​នេះ​គឺ​ជា​ផ្នែក​អភិវឌ្ឍ​មួយ។

យ៉ាង​ណា​មិញ ការ​ជួយ​ឱ្យ​កុមារ​រៀន​ចែក​រំលែក គឺ​មិន​ចាំ​បាច់​ត្រូវ​ការ​គន្លឹះ​ខ្លាំងៗ​នោះ​​ឡើយ​ប្រសិន​បើ​អ្នក​ដឹង​​ពីអ្វីដែលអ្នកគួររំពឹងបន្ទាប់ពីបង្រៀនពួកគេ។ ចំណុចដំបូងគឺត្រូវដឹងថាគំនិតចែករំលែកពិតជាពិបាកសម្រាប់​កុមារ​តូចៗ​ក្នុង​ការ​យល់។ ដោយ​សារ​តែ​អាយុ​តិច កុមារ​ជឿ​ថា​ពិភព​លោក​ដែល​នៅ​ជុំ​វិញ​ពួក​គេ គឺ​មាន​អ្វីៗ​ដែល​សុទ្ធ​តែ​ជា​កម្មសិទ្ធិ​របស់​គេ​ម្នាក់​តែ​ប៉ុណ្ណោះ។

bc2009 gianetti todd 81 wide

ប៉ុន្តែ មាន​ឪពុក​ម្ដាយ​ជា​ច្រើន​ទទួល​ភាព​ជោគជ័យ​ក្នុង​ការ​ជួយ​ឱ្យ​កូនៗ​របស់​ពួក​គេ​អភិវឌ្ឍ​ជំនាញ​ចែក​រំលែក​ដោយ​ការ​ធ្វើ​ជា​គំរូ​ដ៏​ល្អ​ដល់​ពួក​គេ។ ពិត​ជា​សំខាន់​ណាស់​ដែល​លោក​អ្នក​ត្រូវ​ឱ្យ​ពួក​គេ​ដឹង​ពី​អ្វី​ដែល​លោក​អ្នក​កំពុង​ធ្វើ និង​ធ្វើ​យ៉ាង​ណា​ឱ្យ​ពួក​គេ​យល់​ពី​សកម្មភាព និង​ទង្វើ​វិជ្ជមាន​របស់​លោក​អ្នក។ ពេល​ដែល​ពួក​គេ​សង្កេត​មើល​ភាព​វិជ្ជមាន​របស់​លោក​អ្នក​ជា​ប្រចាំ ពួក​គេ​នឹង​រៀន​តាម​លោក​អ្នក​ដោយ​មិន​ដឹង​ខ្លួន។

ក្នុង​នេះ​ដែរ​ក៏​មាន​ដំណាក់​កាល​អភិវឌ្ឍ​ដ៏​គួរ​ឱ្យ​កត់​សម្គាល់​ជា​ច្រើន​ដែល​លោក​អ្នក​ត្រូវ​ដឹងដូច​ជា៖

អាយុ​ទើប​កើត ដល់ 18 ខែ៖ កុមារ​តូចៗ​ជា​ច្រើន​ត្រូវ​ការ​លេង និង​មិន​ចង់​ចែក​របស់​លេង​ទៅ​នរណា​ម្នាក់​ ហើយ​ក៏​មិន​ងាយ​ទទួល​គំនិត​នៃ​ការ​ចែក​រំលែក​ដែរ​។

អាយុ 2 ឆ្នាំ ដល់ 2 ឆ្នាំកន្លះ៖ ការ​លេង​ជាមួយ​មិត្តភក្ដិ​ គឺ​ជា​រឿង​ទូ​ទៅ ប៉ុន្តែ​វា​អាច​ជា​សញ្ញាណ​នៃ​មូលដ្ឋាន​គ្រឹះ​ក្នុង​ការ​ចែក​រំលែក​ផង​ដែរ។

អាយុ 2 ឆ្នាំកន្លះ ដល់ 3 ឆ្នាំ៖ កុមារ​តែងតែ​រក​គ្នា​លេង​ជាមួយ ហើយ​នេះ​ក៏​អាច​ជា​ចំណុច​ដែល​ពួក​គេ​ចាប់​ផ្ដើម​ចែក​រំលែក​របស់​លេង និង​សម្ភារ​ផ្សេងៗ​បាន​ដោយ​មិន​មាន​ការ​សួរ​ផង​ដែរ។

អាយុ 4 ឆ្នាំ​ឡើង៖ កុមារ​ក្នុង​វ័យ​នេះ​រីករាយ​នឹង​លេង​ជាមួយ​មិត្ត​ភក្ដិ​ច្រើន​គ្នា ហើយ​សិល្បៈ​នៃ​ការ​ចែក​រំលែក​ក៏​ចាប់​ផ្ដើម​មាន​ដោយ​ធម្មជាតិ​ផង​ដែរ។

ប្រសិន​បើ​លោក​អ្នក​ដឹង​ហើយ​ថា​កូនៗ​របស់​លោក​អ្នក​អាច​ចាប់​ផ្ដើម​រៀន​ចែក​រំលែក​ទៅ​អ្នក​ដទៃ​ហើយ​ លោក​អ្នក​គួរ​តែ​លើក​ទឹក​ចិត្ត និង​សរសើរ​ពួក​គេ​ផង​ដែរ​ចំពោះ​ការ​ចែក​រំលែក​នោះ។ បន្ថែម​ពី​នេះ​ដែរ​ លោក​អ្នក​ក៏​គួរ​តែ​ណែនាំ​ពួក​គេ​ថា ការ​ចែក​រំលែក​របស់​លេង​មិន​មែន​សុទ្ធ​តែ​ត្រូវ​ឱ្យ​របស់​លេង​នោះ​ទៅ​មិត្ត​ជា​រៀង​រហូត​នោះ​ទេ គឺ​ពួក​គេ​អាច​យក​របស់​លេង​នោះ​មក​វិញ​បន្ទាប់​ពី​លេង​ចប់។ ទង្វើ​នេះ​អាច​ជម្រុញ​ឱ្យ​ពួក​គេ​ចូល​ចិត្ត​ចែក​រំលែក​ជាមួយ​អ្នក​ដទៃ ព្រោះ​ពួក​គេ​ដឹង​ថា ពួក​គេ​នឹង​ទទួល​បាន​របស់​លេង​មក​វិញ ហើយ​ពួក​គេ​រីករាយ​នឹង​ចែក​រំលែក​ដល់​អ្នក​ដទៃ​ជានិច្ច។

វិធីផ្សេងៗទៀតដើម្បីជួយកូនៗឱ្យចេះចែករំលែក៖

  • បង្កើតស្ថានភាពចែករំលែកនោះឱ្យមានភាពសប្បាយតាមតែអាចធ្វើទៅបាន
  • កុំ​សង្ឃឹម​ថា​កូនៗ​អាច​ចែក​រំលែក​តែ​ម្នាក់ លោក​អ្នក​ត្រូវ​ចាប់​ផ្ដើម​ធ្វើ​ជា​អ្នក​ចែក​រំលែក​មុន​ពួក​គេ
  • គាំទ្រការចែករំលែកដោយផ្ដល់មកវិញនូវការថើប ឱប និងសរសើរ
  • មិន​ត្រូវ​បង្ខំ​ឱ្យ​កុមារ​ចែក​របស់​របរ​របស់​ពួក​គេ​ឡើយ ព្រោះ​វា​អាច​ជា​ការ​ដាក់​ទណ្ឌ​កម្ម​សម្រាប់​ពួកគេ​
  • ជួយ​បង្កើត​ការ​ទាក់ទង​ក្នុង​សង្គម​ឱ្យ​ពួក​គេ​ជាមួយ​នឹង​កុមារ​ដទៃ​ទៀត​ដើម្បី​ឱ្យ​ពួក​គេ​អាច​អនុវត្ត​ជំនាញ​នៃ​ការ​ចែក​រំលែក​បាន

ជា​ការ​ពិត​ណាស់ សូម្បី​ដែល​កុមារ​ដែល​ចូល​ចិត្ត​ចែក​រំលែក​ក៏​អាច​មាន​អារម្មណ៍​ស្ទាក់​ស្ទើរ​ក្នុង​ការ​បោះបង់​របស់​របរ​របស់​ពួក​គេ​ដែរ ដូច្នេះ វា​ពិត​ជា​ចាំ​បាច់​​ណាស់​ក្នុង​ការ​មិន​ធ្វើ​ឱ្យ​ពួក​គេ​មាន​អារម្មណ៍​ខ្មាស់​អៀន​។ លោក​អ្នក​ត្រូវ​ព្យាយាម​ជម្រុញ​ទឹក​ចិត្ត​ពួក​គេ​នៅ​ពេល​ដែល​ពួក​គេ​បាន​ធ្វើ​រឿង​ល្អ​ដើម្បី​ឱ្យ​ពួក​គេ​មាន​ជំនឿ និង​បង្ហាញ​លទ្ធផល​នៃ​ការ​ចែក​រំលែក​រហូត​ដល់​ពួក​គេ​ធំ​ពេញ​វ័យ៕

ប្រភព៖ mom 365 share the love

វិធីបង្រៀនកូនៗអំពីអំពើសប្បុរស

on Tuesday, 20 September 2016. Posted in Parenting Tips

dad and daughter charity article

បណ្ដុះចិត្តឱ្យចូលចិត្តបរិច្ចាគ

អំពើ​សប្បុរស​ធម៌ និង​ទឹក​ចិត្ត​ចូលចិត្ត​បរិច្ចាគ​ត្រូវ​បាន​ផុស​ឡើង​នៅ​ក្នុង​កម្រិត​ថ្មី​មួយ​គួរ​ឱ្យ​កត់​សម្គាល់​ក្នុង​រយៈ​ពេល​ប៉ុន្មាន​ឆ្នាំ​ចុង​ក្រោយ​នេះ ដោយ​សារ​តែ​មាន​គ្រោះ​មហន្តរាយ​ធម្មជាតិ សង្គ្រាម និង​ការ​បំផ្លាញ​ពី​ភេរវករ​នៅ​ជុំ​វិញ​ពិភព​លោក។ បន្ទាប់​ពី​បាន​ឃើញ​ទិដ្ឋភាព​ដ៏​សោក​សង្រេង​នោះ​មក​តាម​រយៈ​ទូរទស្សន៍​ជា​ដើម​នោះ ធ្វើ​ឱ្យ​មនុស្ស​ចាប់​ចេះ​គិត និង​យល់​ពី​ភាព​ខ្វះ​ខាត និង​ទុក្ខ​សោក​របស់​ជន​រង​គ្រោះ ​និង​ចាប់​ផ្ដើម​ចេញ​ថវិកា​ផ្ទាល់​ខ្លួន​ដើម្បី​ជួយ​ដល់​ជន​រង​គ្រោះ​ដែល​កំពុង​ត្រូវ​ការ​ជំនួយ​ទាំង​នោះ។

មាន​ឪពុក​ម្ដាយ​ជា​ច្រើន​បាន​ចាប់​យក​ឱកាស​នេះ​បង្រៀន​កូនៗ​របស់​ពួក​គេ​ឱ្យ​ស្វែង​យល់​ពី​កិច្ចការ​សប្បុរស និង​អត្ថប្រយោជន៍​ដែល​ពួក​គេ​អាច​ជួយ​អ្នក​ដទៃ​បាន​ទាន់​ពេល​វេលា​ក្នុង​ខណៈ​ពេល​ដែល​ជន រង​គ្រោះ​ទាំង​នោះ​កំពុង​ត្រូវ​ការ​ជំនួយ​ជា​បន្ទាន់។ ពួក​គេ​អាច​បង្កើត​គម្រោង​គ្រួសារ​សប្បុរស​ ដែល​អាច​ឱ្យ​កូន​របស់​ពួក​គេ​ជួយ​បាន​ដូច​ជា ប្រើ​ថវិកា​បរិច្ចាគ សរសេរ​សែក និង​រៀប​ចំការ​ផ្ញើ​សំបុត្រ​ជា​ដើម។ ទន្ទឹម​នឹង​នេះ ពួក​គេ​បាន​អនុញ្ញាត​ឱ្យ​កូន​របស់​ពួក​គេ​ចូល​រួម​កែ​ប្រែ​ភាព​ឈឺ​ចាប់ និង​ទុក្ខ​សោក​នៃ​ការ​បាត់​បង់ ឱ្យ​ទៅជា​ក្ដី​ស្រឡាញ់​ពី​មនុស្ស​នានា​នៅ​ពាក់​កណ្ដាល​ពិភព​លោក។

ជា​ការ​ពិត​ណាស់ គ្រោះ​មហន្តរាយ​ក្នុង​ពេល​ថ្មីៗ​នេះ បាន​ផ្ដល់​នូវ​ឱកាស​មួយ​ក្នុង​ការ​បង្រៀន​កូនៗ​អំពី​កិច្ចការ​សប្បុរស។ ចុះ​ប្រសិន​បើ​ឪពុក​ម្ដាយ​មួយ​ចំនួន​ចង់​ឱ្យ​មេរៀន​សប្បុរស​ធម៌​នេះ​កើត​មាន​លើស​ពី​ម្ដង​នោះ ហើយ​ប្រសិន​បើ​ពួក​គេ​ចង់​ឱ្យ​ទឹក​ចិត្ត​បរិច្ចាគ​តែងតែ​មាន​ក្នុង​ចិត្ត​របស់​កូនៗ​ពួក​គេ តើ​ពួក​គេ​ត្រូវ​ធ្វើយ៉ាង​ណា​ដើម្បី​បណ្ដុះ​ទម្លាប់​សប្បុរស​ទាំង​នោះ​បាន?

គម្រោងសប្បុរសសម្រាប់គ្រួសារ

ដើម្បី​ជួយ​កូនៗ​របស់​លោក​អ្នក​ឱ្យ​មាន​ទម្លាប់​បរិច្ចាគ អ្នក​ត្រូវ​អនុវត្ត​តាម​វិធី​ដូច​ខាង​ក្រោម។

1- បរិច្ចាគសម្លៀកបំពាក់

អ្នក​ប្រាកដ​ជា​មាន​សម្លៀក​បំពាក់​ដែល​លែង​ស្លៀក​ពាក់ ហើយ​ទុក​ចោល​ក្នុង​ទូ​ជា​មិន​ខាន។ បើ​មាន​សម្លៀក​បំពាក់​ច្រើន​ដូច​នេះ ហេតុអ្វី​ក៏​មិន​​យក​ខ្លះ​ទៅ​បរិច្ចាគ​ដល់​អ្នក​ដែល​ត្រូវ​ការ​សម្លៀក​បំពាក់ តែ​គ្មាន​លទ្ធភាព​? លោក​អ្នក​អាច​លើក​ទឹក​ចិត្ត​ដល់​កូនៗ​ឱ្យ​ប្រមូល​សម្លៀក​បំពាក់​ដែល​ពួក​គេ​លែង​ស្លៀក​ ឬ​លែង​ត្រូវ​ការ​ដើម្បី​បរិច្ចាគ​បាន។ មិន​ត្រឹមតែ​សម្លៀក​បំពាក់​ប៉ុណ្ណោះ​ទេ​ដែល​អាច​បរិច្ចាគ​បាន ពួក​គេ​ក៏​អាច​ប្រមូល​របស់​លេង​ដែល​ពួក​គេ​ចង់​បរិច្ចាគ​ដាក់​ចូល​ក្នុង​ប្រអប់​សប្បុរស​របស់​ពួក​គេ​បាន​ផង​ដែរ។ គុណ​តម្លៃ​ដែល​ពួក​គេ​ទទួល​បាន គឺ​ពិត​ជា​មាន​ភាព​អស្ចារ្យ។

2- ជួយអ្នកជិតខាង

ការ​ភ្ជាប់​ទំនាក់​ទំនង​ជា​មួយ​អ្នក​ជិត​ខាង​ពិត​ជា​មាន​សារសំខាន់​ខ្លាំង​ណាស់។ ចំណែក​ឯការ​ជួយ​គ្នា​ទៅ​វិញ​ទៅ​មក គឺ​កាន់​តែ​សំខាន់​ទៅ​ទៀត។ លោក​អ្នក​អាច​បង្រៀន​កូនៗ​ឱ្យ​យល់​ដឹង​ពី​ការ​ជួយ​ធុរៈ​អ្នក​ដទៃ​ក្នុង​ពេល​ដែល​គេ​មាន​បញ្ហា។

3- ការបរិច្ចាគឈាម

រាល់​ពេល​ដែល​លោក​អ្នក​ទៅ​បរិច្ចាគ​ឈាម គួរ​តែ​នាំ​កូនៗ​ទៅ​ជាមួយ​ដើម្បី​បង្ហាញ​ពី​គំរូ​ដល់​ពួក​គេ។ លោក​អ្នក​ត្រូវ​និយាយ​ប្រាប់​ពួក​គេ​ពី​អត្ថប្រយោជន៍​នៃ​ការ​បរិច្ចាគ​ឈាម។

4- ធ្វើពិធីខួបកំណើតបែបសប្បុរស

លោកអ្នក​អាច​ប្រារព្ធ​ពិធី​ខួប​កំណើត​មួយ​សម្រាប់​ទទួល​អំណោយ​ក្នុង​ការ​បរិច្ចាគ​ដល់​អ្នក​ដទៃ។ ឧទាហរណ៍ ក្នុង​ពិធី​ខួប​កំណើត​អំឡុង​ពេល​ដែល​កូន​កំពុង​រៀន​ថ្នាក់​ដំបូង លោក​អ្នក​អាច​ស្នើ​សុំ​ដល់​អ្នក​ចូល​រួម​កម្មវិធី​ខួប​កំណើត​របស់​កូន​នាំ​មក​ជាមួយ​នូវ​សៀវភៅ​ថ្មី ឬ​ប្រើ​រួច​ដើម្បី​ដាក់​ក្នុង​ការ​បរិច្ចាគ​ទៅ​កាន់​សហគមន៍​ដែល​ត្រូវ​ការ​សៀវភៅ​សម្រាប់​កុមារ។

5- ជួយដល់សត្វ

លោកអ្នក​ត្រូវ​បង្រៀន​កូនៗ​ឱ្យ​ចេះ​ស្រឡាញ់​សត្វ និង​ឱ្យ​ចំណី​សត្វ។ មាន​សត្វ​អនាថា​ជា​ច្រើន​កំពុង​អត់​ចំណី ដូច្នេះ នេះ​ជា​ពេល​ដ៏​ល្អ​ដែល​ពួក​គេ​អាច​ផ្ដល់​ចំណី​ខ្លះ​ដល់​សត្វ​ទាំង​នោះ។

6- ផ្ដល់អាហារដល់អ្នកដែលខ្វះខាត

លោក​អ្នក​អាច​បង្កើត​កន្ត្រក​អាហារ​ដើម្បី​ឱ្យ​កូនៗ​ដាក់​អាហារ​ចូល និង​បរិច្ចាគ​នៅ​ក្នុង​ពិធី​បុណ្យ ឬ​ថ្ងៃ​ឈប់​សម្រាក​ណាមួយ​ដល់​គ្រួសារ​ដែល​ក្រ​ខ្សត់ គ្មាន​អាហារ​បរិភោគ​គ្រប់​គ្រាន់។ អាហារ​ដែល​ពួក​គេ​អាច​បរិច្ចាគ​បាន​មាន​ដូច​ជា​ម្ហូប បាយ ភេសជ្ជៈ ទឹក​ស្អាត ផ្លែ​ឈើ ឬ​បង្អែម​ជា​ដើម។

7- ផ្លាស់ប្ដូរដើម្បីភាពរីកចម្រើន

លោក​អ្នក​អាច​បង្កើត​ក្រឡ​សប្បុរស​មួយ ដែល​សមាជិក​ក្នុង​គ្រួសារ​ទាំង​អស់​អាច​បរិច្ចាគ​ថវិកា​ផ្ទាល់​ខ្លួន​របស់​ពួក​គេ​បន្តិច​បន្តួច​ដាក់​ក្នុង​ក្រឡ​នោះ។ ពេល​ដែល​ក្រឡ​ពេញ​ហើយ លោក​អ្នក​អាច​យក​ថវិកា​ដែល​មាន​ក្នុង​ក្រឡ​នោះ​ទៅ​បរិច្ចាគ​ឱ្យ​គម្រោង​សប្បុរស ឬ​ជំនួយ​ណាមួយ​ដែល​កូនៗ​ពេញ​ចិត្ត ដូច​ជា គម្រោង​ជំនួយ​ដល់​កុមារ​កំព្រា មនុស្ស​ចាស់​ជរា អ្នក​កើត​ជំងឺ សត្វ​ព្រៃ ។ល។ ឬ​ក៏អាច​យក​ថវិកា​ទាំង​នោះ​ទិញ​ជា​សម្ភារ​ផ្គត់ផ្គង់​ដល់​សហគមន៍​ណាមួយ​ជា​ដើម។

8- ជួយមនុស្សចាស់

លោក​អ្នក​អាច​ណែនាំ​កូនៗ​ឱ្យ​ចេះជួយ​មនុស្ស​ចាស់ ដូចជា​ជូន​ពួក​គាត់​ឆ្លង​ថ្នល់ ស្រោច​ផ្កា ដាំ​ផ្កា ។ល។ អាច​ជួយ​សម្រាល​ភាព​លំបាក​របស់​ពួក​គាត់​ខ្លះ។

ការ​អនុវត្ត​នូវ​គំនិត​ទាំង​នេះ​ អាច​ជួយ​ឱ្យ​កូនៗ​របស់​លោក​អ្នក​យល់​ដឹង​ពី​អំពើ​សប្បុរស គឺ​អាច​កើត​មាន​មិន​ត្រឹម​តែ​ក្នុង​ពេល​មាន​អាសន្ន​ប៉ុណ្ណោះ​ទេ តែ​ត្រូវ​តែ​មាន​ជានិច្ច។ លោក​អ្នក​អាច​ជួយ​ពួក​គេ​ឱ្យ​ចេះ​គោរព​ដល់​ជីវិត និង​តម្រូវ​ការ​របស់​អ្នក​ដទៃ ខណៈ​ពេល​ដែល​ពួក​គេ​កំពុង​បរិច្ចាគ​ធនធាន​ណាមួយ​ដែល​ពួក​គេ​មាន នោះ​ពួក​គេ​អាច​យល់​ពី​សារ​ដ៏​សំខាន់​អំពី​ភាព​ជឿជាក់​របស់​លោក​អ្នក​ចំពោះ​ពួក​គេ​ក្នុង​ការ​ប្រព្រឹត្ត​អំពើ​ល្អ និង​ទឹក​ចិត្ត​បរិច្ចាគ៕

ប្រែសម្រួលពីសៀវភៅ The 10 Commitments: Parenting with Purpose

Learning Management System

LMS - Digital Curriculum Library

DCL Logo 03

Contact Us

Address

#168, Street 156
Phnom Penh, Cambodia 
This email address is being protected from spambots. You need JavaScript enabled to view it. 
Phone/Telegram: 095 712 165
 
Google Maps:
Contact Us

Contact Us

Early Childhood Education

Teacher Training

Teacher training for those who may wish to follow Liberty Education's  international preschool curriculum can be arranged by appointment. Please contact the school for more information.  LMS deployment is also available.