ការអភិវឌ្ឍការនិយាយរបស់កុមារ

on Friday, 10 November 2017. Posted in Parenting Tips, Activities

treatment for rett syndrome

ការ​ស្រាវជ្រាវ​បង្ហាញ​ថា កុមារ​សិក្សា​ថ្នាក់​មត្តេយ្យ​កម្រិត​ទាប ឬ Preschool ប្រហែល 14 ទៅ 20 ភាគរយ និង​កុមារ​ដែល​ចាប់​ផ្ដើម​ចូល​រៀន​ប្រហែល 5 ភាគ​រយ អាច​ជួប​នឹង​បញ្ហា​និយាយ​ស្ដី ឬ​ភាសា​ខ្លះៗ។

ភាព​ពិបាក​ទាំង​នេះ​អាច​ប៉ះពាល់​ដល់​ទំនាក់​ទំនង​របស់​ពួកគេ​ជាមួយ​គ្រួសារ និង​មិត្តភក្ដិ ក៏​ដូច​ជា​ការ​សិក្សា​ផង​ដែរ។

ការ​សិក្សា​ភាសា​ជា​ធម្មតា

ពេល​ដែល​កុមារ​ចូល​ដល់​វ័យ 4 ឆ្នាំ ផ្នែក​មួយ​នៃ​ភាសា​និយាយ​ត្រូវ​បាន​បង្កើត​ឡើង។ អត្រា និង​លក្ខណៈ​នៃ​ការ​អភិវឌ្ឍ​នេះ​មាន​ភាព​ខុស​ប្លែក​គ្នា។ ឧទាហរណ៍ ការ​អភិវឌ្ឍ​របស់​កុមារ​អាច​មាន​លក្ខណៈ​ស្ថិត​ស្ថេរ ដោយ​ការ​អភិវឌ្ឍ​ត្រូវ​បាន​កំណត់​ដោយ​រយៈ​ផ្លាស់​ប្ដូរ​ក្នុង​រយៈ​ពេល​ច្រើន​សប្ដាហ៍ ឬ​ច្រើន​ខែ ដោយ​ធ្វើ​តាម​ដំណាក់​កាល​ដែល​ការ​អភិវឌ្ឍ​មាន​លក្ខណៈ​យឺត​ក្នុង​ការ​ចាប់​ផ្ដើម (អាច​នឹង​ពន្យារ​ពេល​លូត​លាស់​នៃ​ការ​និយាយ​ក៏​ថា​បាន) ប៉ុន្តែ​ពួក​គេ​ក៏​អាច​អភិវឌ្ឍ​ខ្លាំង​ក្នុង​រយៈ​ពេល​ដ៏​ខ្លី​ផង​ដែរ។


កុមារ​តូចៗ​អាច​បង្ហាញ​ភាព​ខុស​គ្នា​រវាង​ការ​អភិវឌ្ឍ​ជំនាញ​និយាយ និង​ជំនាញ​ភាសា។ ការ​និយាយ​សំដៅ​ទៅ​លើ​ការ​បញ្ចេញ​សំឡេង​ច្បាស់​ ហើយ​ភាសា​សំដៅ​ទៅ​លើ​ឃ្លា ឬ​ប្រយោគ​ដែល​ត្រូវ​បាន​ប្រើ ​និង​យល់។ កុមារ​ខ្លះ​មាន​ការ​បញ្ចេញ​សំឡេង​ច្បាស់ តែ​និយាយ​ស្ដី​តិច​តួច ខណៈ​កុមារ​ខ្លះ​និយាយ​ច្រើន​ ប៉ុន្តែ​អត់​ច្បាស់ និង​ពិបាក​យល់។ ភាព​ខុស​គ្នា​ទាំង​នេះ​សុទ្ធ​តែ​ស្ថិត​ក្នុង​ចន្លោះ​នៃ​ការ​អភិវឌ្ឍ​ធម្មតា។ ទោះជា​យ៉ាងណា​ក៏​ដោយ កុមារ​ខ្លះ​ក៏​មាន​ផល​វិបាក​ក្នុង​ការ​និយាយ​ផង​ដែរ។

តើបញ្ហាទាំងនោះមានអ្វីខ្លះ?

ការពន្យារពេលនិយាយ និង/ឬប្រើភាសា

ការ​និយាយ និង​ប្រើ​ភាសា​របស់​កុមារ​ខ្លះ​មាន​លក្ខណៈ​ធម្មតា ប៉ុន្តែ​ជំនាញ​ទាំង​នេះ​មាន​ការ​ពន្យារ ឬ​យឺត​យ៉ាវ​ក្នុង​ការ​ចាប់​ផ្ដើម។ ការ​និយាយ ឬ​បញ្ចេញ​សំឡេង​របស់​ពួកគេ​ប្រហែល​ជា​មិន​សូវ​ច្បាស់ ឬ​ឃ្លា​និយាយ​របស់​គេ​មាន​លក្ខណៈ​ស្មុគ្រស្មាញ​ដូច​ក្រុម​របស់​ពួក​គេ​ទេ។

ភាពពិបាកក្នុងការនិយាយជាក់ស្ដែង
កុមារ​មួយ​ចំនួន​តូច​ជួប​នឹង​ផល​លំបាក​ក្នុង​ការ​រៀន​ប្រើ​សំឡេង​ឱ្យ​បាន​ត្រឹមត្រូវ និង​សមរម្យ ហើយ​ពេល​ដែល​ពួក​គេ​មាន​អាយុ 6 ទៅ 7 ឆ្នាំ ឬ​ច្រើន​ជាង​នេះ ពួកគេ​ប្រហែល​ជា​មិន​អាច​និយាយ​ទៅ​កាន់​អ្នក​ដទៃ​ក្រៅ​ពី​គ្រួសារ​របស់​ពួក​គេ​ឡើយ។

ពិបាក​ក្នុង​ការ​ប្រើ​ភាសា​ត្រឹម​ត្រូវ

កុមារ​ទាំង​នេះ​អាច​ជួប​នឹង​ផល​លំបាក​ក្នុង​ការ​រៀប​ចំ​ពាក្យ ចង​ចាំ​ឈ្មោះ​វត្ថុ​នានា និង​បែង​ចែក​សូរ​ស័ព្ទ​សំឡេង ឧ. “កា” “តា” ជា​ដើម។


ការនិយាយត្រដឹក ឬដាច់ៗ
កុមារ​ក្នុង​ចន្លោះ 2 ទៅ 5 ឆ្នាំ តែងតែ​និយាយ​ពាក្យ​ដដែលៗ និង​ចាប់​ផ្ដើម​និយាយ អឺ ឬ​អឺម ពេល​ដែល​ពួក​គេកំពុង​រក​នឹង​អ្វី​ដែល​ត្រូវ​និយាយ​បន្ទាប់។ 5% នៃ​កុមារ​និយាយ​ត្រដឹក​ក្នុង​រយៈ​ពេល​ណាមួយ​ដែល​ពួកគេ​កំពុង​រៀន​និយាយ។ ហើយ​កុមារ​មួយ​ចំនួន​ធំ​អាច​និយាយ​បាន​ស្រួល​ជាង​មុន​នៅ​ពេល​ដែល​ពួក​គេ​ចាប់​ផ្ដើម​ធំ។ ចំណែក​ឯ កុមារ​ខ្លះ​ទៀត​បន្ត​ការ​និយាយ​ដោយ​ពិបាក និង​ជួន​កាល​មិន​អាច​និយាយ​បាន​តែ​ម្ដង។

ធ្វើយ៉ាងណាទើបអាចជួយពួកគេឱ្យនិយាយបាន

  • លើកទឹកចិត្តកូនឱ្យមើល និងស្ដាប់ពេលនិយាយគ្នា
  • កុំ​ឱ្យ​កូន​និយាយ​ប្រសិន​បើ​ពួក​គេ​និយាយ​មិន​ត្រួវ ដោយ​ព្យាយាម​សួរ​សំណួរ​ដើម្បី​ធ្វើ​ឱ្យ​អ្វី​ដែល​គេ​ចង់​និយាយ​ងាយ​ស្រួល​យល់​ជាង​មុន
  • មិន​ត្រូវ​បន្ត​សុំ​ឱ្យ​កូន​និយាយ​ឱ្យ​ត្រូវ ឬ​និយាយ​ពាក្យ​ដែល​ពួក​គេ​បាន​និយាយ​ឡើង​វិញ​នោះ​ទេ
  • ត្រូវធ្វើជាអ្នកស្ដាប់ដ៏ល្អ

ធ្វើយ៉ាងណាទើបអាចជួយក្នុងការយល់បាន

  • ត្រូវ​ប្រាកដ​ថា​កូន​របស់​អ្នក​កំពុង​ស្ដាប់ និង​មើល​អ្នក​ពេល​កំពុង​និយាយ
  • កំណត់​​ពាក្យ​គន្លឹះ​សំខាន់​ក្នុង​ប្រយោគ តែ​ត្រូវ​រក្សា​សំឡេង​ធម្មតា​
  • ប្រើប្រយោគខ្លីៗជាមួយនឹងន័យសាមញ្ញៗ
  • ប្រើ​ភាសា​កាយ​វិការ ឬ​រូបភាព​ដើម្បី​ជួយ​អ្នក​ក្នុង​ការ​និយាយ​ជាមួយ​កូនៗ

ធ្វើយ៉ាងណាដើម្បីជួយក្នុងការនិយាយ

  • ធ្វើជាគំរូភាសាសម្រាប់កូនអ្នក
  • ជៀស​វាង​ការ​កែ​វេយ្យាករណ៍ ជំនួស​ដោយ​ការ​ប្រើ​ទម្រង់​ប្រយោគ​ត្រឹម​ត្រូវ​ជា​គំរូ
  • ចម្រៀង​កុមារ​សុទ្ធ​តែ​មាន​ប្រយោជន៍​សម្រាប់​ការ​អនុវត្ត​ឡើង​វិញ​សម្រាប់​ការ​ប្រើ​ប្រយោគ
  • និយាយ​ពី​អ្វី​ដែល​អ្នក​កំពុង​ធ្វើ​ពេល​ដែល​អ្នក​កំពុង​ធ្វើ ដើម្បី​ផ្ដល់​ឱកាស​ឱ្យ​កូន​របស់​អ្នក​រៀន​ពាក្យ​ថ្មី និង​ចេះ​ប្រើ​ឃ្លា​ប្រយោគ។

ធ្វើយ៉ាងណាទើបអាចជួយអ្នកនិយាយត្រដឹក?

  • ផ្ដល់​ឱកាស​ឱ្យ​កូន​របស់​អ្នក​ទទួល​បាន​ការ​ចាប់​អារម្មណ៍​ពេញ​លេញ​ពី​អ្នក​ប្រហែល​ជា 3 សប្ដាហ៍។ នេះ​ជា​ការ​ផ្ដល់​នូវ​ពេល​វេលា​ពិសេស​សម្រាប់​ពួក​គេ​ពេល​ដែល​ពួក​គេ​មិន​ព្យាយាម​និយាយ​ជាមួយ​អ្នក​ដទៃ។ ពេល​ដែល​ដល់​វេន​កូន​អ្នក​និយាយ សូម​ផ្ដល់​ពេល​វេលា​ដល់​ពួក​គេ​ក្នុង​ការ​បញ្ចប់​នូវ​អ្វី​ដែល​ពួក​គេ​កំពុង​និយាយ​ដោយ​មិន​មាន​ការ​រំខាន​អ្វី​ទាំង​អស់។
  • និយាយ​យឺតៗ​ពេល​ដែល​អ្នក​និយាយ​ជាមួយ​កូន ដូច្នេះ​ពួក​គេ​នឹង​មាន​ភាព​ងាយ​ស្រួល​ក្នុង​ការ​និយាយ​តាម​អ្នក។
  • បង្ហាញ​កូនអ្នក​ថា​អ្នក​ចាប់​អារម្មណ៍​នូវ​អ្វី​ដែល​ពួក​គេ​កំពុង​និយាយ ហើយ​ព្យាយាម​សំឡឹង​មើល​ពួក​គេ​ពេល​កំពុង​និយាយ៕

អត្ថបទដើម៖ Children’s Speech Development

សារសំខាន់នៃការសិក្សាពីរភាសា

on Wednesday, 08 November 2017. Posted in Classes, Parenting Tips, Activities, Curriculum

ការ​ចាប់​ផ្ដើម​ឱ្យ​កូន​របស់​អ្នក​សិក្សា​ពីរ​ភាសា

ការ​អប់រំ​របស់​កូន​អ្នក គឺជា​ផ្នែក​ដ៏​សំខាន់​មួយ​ដែល​អ្នក​ត្រូវ​ពិចារណា​សម្រាប់​ជីវិត​របស់​ពួក​គេ។ ការ​ជ្រើសរើស​សាលា​ដែល​ពួកគេ​ត្រូវ​ចូលរៀន គឺ​ជា​ការ​សម្រេច​ចិត្ត​ដ៏​ស្មុគ្រ​ស្មាញ និង​ធំ​មួយ។ មាន​អត្ថប្រយោជន៍​ជា​ច្រើន​ដែល​បាន​មក​ពីការ​សិក្សា​ពីរ​ភាសា។ ប្រសិន​បើ​កូន​របស់​អ្នក​ គឺ​ជា​កុមារ​ដែល​អាច​ស្គាល់​ភាសា​ចំនួន​ពីរ​ដែល​កំពុង​ប្រើ​នៅ​ផ្ទះ​ហើយ​ដល់​វ័យ​ចូល​រៀន នោះ​ការ​ជ្រើសរើស​សាលា​ដែល​ផ្ដល់​នូវ​ការ​សិក្សា​ភាសា​ចំនួន​ពីរ​ប្រាកដ​ជា​អាច​ជំរុញ​ភាសា​របស់​ពួកគេ​ឱ្យ​កាន់​តែ​ស្ទាត់​ជំនាញ។ ប្រសិន​បើ​កូន​របស់​អ្នក​អាច​និយាយ​បាន​តែ​មួយ​ភាសា នោះ​ការ​ចុះ​ឈ្មោះ​ចូលរៀន​សាលា​ភាសា​អាច​ជួយ​ពួក​គេ​ឱ្យ​ចាប់​យក​ភាសា​ថ្មី​មួយ​ទៀត​ក្នុង​រយៈ​ពេល​ខ្លី​ផង​ដែរ ហើយ​មិន​ត្រឹម​តែ​អាច​ជួយ​ពួកគេ​ឱ្យ​មាន​សមត្ថភាព​គ្រប់គ្រាន់​ក្នុង​ការ​ប្រើ​ភាសា​នោះ​ទេ តែ​ថែម​ទាំង​អាច​បង្កើត​ឱកាស​ផ្សេងៗ​ឱ្យ​ពួកគេ​នា​ពេល​អនាគត​ផង​ដែរ។

Eric concentrating

 

អត្ថប្រយោជន៍នៃការយល់ដឹងក្នុងការសិក្សាពីរភាសា

ការ​សិក្សា​ពីរ​ភាសា​អាច​បង្កើន​មុខងារ​ប្រតិបត្តិ​របស់​ខួរ​ក្បាល។ ការ​ស្រាវជ្រាវ​មួយ​បង្ហាញ​ថា សិស្ស​ដែល​មាន​ជំនាញ​ពីរ​ភាសា​អាច​ប្រើ​ភាសា​ពីរ​បាន​ក្នុង​ពេល​តែ​មួយ អាច​ផ្លាស់​ប្ដូរ​ភាសា​បាន​ភ្លាម ហើយ​វា​ក៏​អាច​អភិវឌ្ឍ​មុខងារ​ជំនាញ​ផ្សេងៗ​ទៀត​ដូចជា ជំនាញ​ទប់​ស្កាត់ ផ្លាស់​ប្ដូរ​ការ​ផ្ចង់ និង​ការ​ធ្វើ​ការ​របស់​ខួរ​ក្បាល​។ ហេតុ​ដូចនេះ​ហើយ សិស្ស​ដែល​កំពុង​ទទួល​ការ​អប់រំ​ពីរ​ភាសា ច្រើន​តែ​អាច​ធ្វើ​កិច្ចការ​ផ្សេងៗ​ដែល​តម្រូវ​ឱ្យ​ធ្វើ​ច្រើន​ប្រភេទ​ក្នុង​ពេល​តែ​មួយ ការ​ធ្វើ​ការ​សម្រេច​ចិត្ត និង​ការ​ដោះស្រាយ​បញ្ហា​បាន​ល្អ​ប្រសើរ​ បើ​ទោះបី​ជា​ពួកគេ​មិន​ដឹង​ថា​ត្រូវ​ប្រើ​ភាសា​នោះ​ដើម្បី​អ្វី​ក៏​ដោយ។

មានជម្រើសច្រើនសម្រាប់ការសិក្សានាពេលអនាគត

អត្ថប្រយោជន៍​មួយ​ក្នុង​ចំណោម​អត្ថប្រយោជន៍​សំខាន់​ដទៃ​ទៀត​នៃ​ការ​សិក្សា​ពីរ​ភាសា គឺ​ថា​កុមារ​មិន​ត្រឹមតែ​ត្រូវ​បាន​ចិញ្ចឹម​ដើម្បី​ចេះ​ពីរ​ភាសា​នោះ​ទេ តែ​ថែម​ទាំង​អាច​ប្រើ​ភាសា​ទាំង​ពីរ​នោះ​យ៉ាង​ច្បាស់​ផង​ដែរ។ ហេតុផល​នេះ​អាច​ឱ្យ​កូន​របស់​លោក​អ្នក​មាន​ជម្រើស​ច្រើន​ពេល​ដែល​ពួកគេ​ដល់​ពេល​ត្រូវ​ជ្រើស​រើស​ការ​សិក្សា​ផ្ទាល់​ខ្លួន​នា​ពេល​អនាគត​។ ពួកគេ​នឹង​មាន​សេរីភាព​ក្នុង​ការ​ជ្រើសរើស​សាកលវិទ្យាល័យ​ដែល​គេ​ចង់​ចូល​រៀន​នៅ​ប្រទេស​ណា​មួយ​ដោយ​អាស្រ័យ​លើ​ភាសា​ដែល​ពួកគេ​និយាយ។

វា​នឹង​ងាយ​ស្រួល​ជាង​មុន​សម្រាប់​ពួកគេ​ក្នុង​ការ​ចូល​រៀន​សាលា​នៅ​បរទេស ឬ​ក៏​ក្នុង​កម្មវិធី​សិក្សា​ខ្លី​ជា​ដើម​ដែល​ពួកគេ​អាច​សិក្សា​នៅ​ប្រទេស​ដទៃ​ដោយ​មាន​វប្បធម៌​មួយ​ដែល​មាន​ការ​ប្រើ​ភាសា​ទីពីរ​ជា​ជំនួយ​ក្នុង​សមត្ថភាព​យល់​ដឹង​របស់​ពួក​គេ។

ការ​សិក្សា​ពីរ​ភាសា​អាច​ពង្រីក​ឱកាស​អាជីព​នា​ពេល​អនាគត

ការ​ចេះ​ភាសា​ផ្សេង​មួយ​ទៀត​ស្ទាត់ អាច​ធ្វើ​ឱ្យ​បេក្ខជន​លេច​ធ្លោ​ជាង​គេ​​ដោយ​អាច​ឱ្យ​និយោជក​ងាយ​មើល​ឃើញ។ វា​ក៏​អាច​បើក​ទ្វារ​ដើម្បី​ចាប់​យក​ឱកាស​ផ្សេង​ទៀត​លើស​អ្នក​ដែល​គ្មាន​ជំនាញ​ទាំង​នេះ។

នៅ​ក្នុង​កំណើន​សេដ្ឋកិច្ច​សកល​នា​ពេល​បច្ចុប្បន្ន​នេះ ក្រុមហ៊ុន​អន្តរជាតិ​ជា​ច្រើន​កំពុង​ស្វែង​រក​បុគ្គលិក​ដែល​មាន​ជំនាញ​ភាសា​ពីរ។ សម្រាប់​អ្នក​ដែល​ចេះ​ពីរ​ភាសា​ប្រាកដ​ជា​មាន​ឱកាស​ច្រើន។ បេក្ខជន​ដែល​មាន​ការ​អប់រំ​ពីរ​ភាសា​មាន​ភាព​លេច​ធ្លោខ្លាំង​ជាង​បុគ្គលិក​ដទៃ​ទៀត។

កុមារ​ដែល​មាន​ការ​អប់រំ​ចំនួន​ពីរ​ភាសា​អាច​ធ្វើការ​សម្រប​សម្រួល​ខ្លួន​បាន​គ្រប់​កាលៈ​ទេសៈ

ភាសា​មិនមែន​គ្រាន់តែ​ជា​ការ​សិក្សា​ពាក្យ ឬ​វេយ្យាករណ៍​ប៉ុណ្ណោះ​ទេ តែ​វា​ក៏​ជា​ការ​សិក្សា​ពី​វប្បធម៌ និង​ជីវភាព​រស់​នៅ​ក្នុង​លក្ខណៈ​ផ្សេង​មួយ​ទៀត​ផង​ដែរ។ អត្ថប្រយោជន៍​នៃ​ការ​សិក្សា​ពីរ​ភាសា​ផ្ដល់​ឱ្យ​កុមារ​នូវ​ការ​មើល​ឃើញ​កាន់​តែ​ទូលំទូលាយ និង​នាំ​ពួកគេ​ឱ្យ​កាន់​តែ​ជិតស្និទ្ធ​ជាមួយ​នឹង​អ្នក​ដែល​មាន​សញ្ជាតិ​ និង​ជាតិ​សាសន៍​ផ្សេង​ទៀត​ផង​ដែរ។ ក្នុង​ពិភព​មួយ​ដែល​មាន​ការ​ផ្លាស់​ប្ដូរ​ជានិច្ចកាល​នោះ ទំនាក់​ទំនង​កំពុង​កើន​ឡើង​គួរ​ឱ្យ​កត់​សម្គាល់ និង​សំខាន់​។ កុមារ​ដែលអាច​ធ្វើ​ទំនាក់​ទំនង​បាន​ជាមួយ​នឹង​មនុស្ស​ដែល​មាន​វប្បធម៌​ចម្រុះ​គ្នា នឹង​មាន​ផល​ប្រយោជន៍​សម្រាប់​ជីវិត​របស់​ពួកគេ​នា​ពេល​អនាគត។

ការសម្រេចចិត្តនៅពេលពិចារណាក្នុងការសិក្សាពីរភាសា

លោក​អ្នក​ត្រូវ​មាន​ការ​សម្រេច​ចិត្ត​ជា​ច្រើន​ដើម្បី​ពិចារណា​ក្នុង​ការ​សិក្សា​ពីរ​ភាសា។ ជម្រើស​របស់​អ្នក​អាច​ត្រូវ​កំណត់​ដោយ​កត្តា​ជា​ច្រើន​ដូច​ជា ទី​កន្លែង​ដែល​អ្នក​រស់​នៅ និង​សាលា​បើក​ទទួល​ចុះ​ឈ្មោះ​ចូល​រៀន។

តើ​អ្នក​នឹង​បញ្ជូន​កូន​របស់​អ្នក​ឱ្យ​ទៅ​រៀន​នៅ​សាលា​អន្តរជាតិ ឬ​សាលា​ដែល​បង្រៀន​ពីរ​ភាសា?

សាលា​ទាំង​ពីរ​នេះ​ពិត​ជា​ខុស​គ្នា។ សាលា​អន្តរជាតិ នឹង​បង្រៀន​សិស្ស​ទៅ​តាម​កម្មវិធី​សិក្សា​លក្ខណៈ​អន្តរជាតិ ហើយ​សិស្ស​ដែល​បញ្ចប់​ការ​សិក្សា​នឹង​មាន​ការ​ទទួល​ស្គាល់​ជា​លក្ខណៈ​អន្តរជាតិ។ ចំណែក​ឯ​សាលា​ភាសា​វិញ ពួកគេ​នឹង​បង្រៀន​សិស្ស​ទៅ​តាម​កម្មវិធី​សិក្សា​ជាតិ ដោយ​នៅ​ក្នុង​ថ្នាក់​ខ្លះ​វិញ​មិន​មាន​ការ​បង្រៀន​ភាសា​ទាំង​ពីរ​ត្រឹម​ត្រូវ និង​មាន​តុល្យភាព​នោះ​ទេ។

តើភាសាអ្វីខ្លះដែលនឹងត្រូវបង្រៀន?

តើ​ភាសា​អ្វី​ខ្លះ​ដែល​នឹង​ត្រូវ​បង្រៀន​ដល់​កូន​របស់​អ្នក​ដើម្បី​ឱ្យ​ពួក​គេ​ទទួល​បាន​ផល​ប្រយោជន៍​ពី​ការ​សិក្សា​នោះ? គ្រប់​ភាសា​ទី 2 ទាំង​អស់​សុទ្ធ​តែ​មាន​ផល​ប្រយោជន៍។ យ៉ាង​ណា​ក៏​ដោយ ការ​ជ្រើស​រើស​ភាសា​មួយ​ដែល​កូន​អ្នក​អាច​អនុវត្ត​បាន​ក្រៅ​ពី​នៅ​សាលា គឺ​ពិត​ជា​កាន់​តែ​ល្អ។

តើ​អ្នក​នឹង​ត្រូវ​ការ​គ្រូ​បង្រៀន​ភាសា​តាម​ផ្ទះ​ដើម្បី​ជួយ​កូន​ក្នុង​ការ​ធ្វើ​លំហាត់​កិច្ចការ​ផ្ទះ​ដែរ​ឬ​ទេ?

ការ​ផ្ដល់​នូវ​ការ​សិក្សា​ពីរ​ភាសា​ដល់​កូន មាន​ន័យ​ថា​លំហាត់​កិច្ចការ​ផ្ទះ​នឹង​មាន​ពីរ​ភាសា​ដូច​គ្នា។ ប្រសិន​បើ​អ្នក​មិន​អាច​និយាយ ឬ​ប្រើ​ភាសា​ដែល​គេ​កំពុង​រៀន​នោះ​ទេ ធ្វើ​យ៉ាង​ណា​ទើប​អ្នក​អាច​ជួយ​ណែនាំ​កូន​ក្នុង​ការ​ធ្វើ​លំហាត់​នោះ? ការ​ជួល​គ្រូ​បង្រៀន​តាម​ផ្ទះ គឺ​ជម្រើស​ដ៏​ពេញ​និយម​មួយ។

តើ​ការ​សិក្សា​ពីរ​ភាសា​ពិត​ជា​ស័ក្តិសម​នឹង​រៀន​ដែរ​ឬ​ទេ?

ពិត​ណាស់! ការ​សិក្សា​ពីរ​ភាសា​ផ្ដល់​នូវ​អត្ថប្រយោជន៍​យ៉ាង​ច្រើន ហើយ​កុមារ​នឹង​ទទួល​បាន​នូវ​អត្ថប្រយោជន៍​នោះ​យ៉ាង​ច្បាស់​សម្រាប់​ការ​សិក្សា​របស់​ពួក​គេ៕

អត្ថបទដើម៖ The Benefits of a Bilingual Education 

តើការធ្វើទស្សនកិច្ចសិក្សាមានអត្ថប្រយោជន៍អ្វីខ្លះដល់កុមារ?

on Wednesday, 01 November 2017. Posted in Activities

ការ​ធ្វើ​ទស្សន​កិច្ច​សិក្សា​ផ្ដល់​នូវ​បទពិសោធន៍​ផ្នែក​អប់រំ​ដល់​សិស្ស​ពី​កន្លែង​មួយ​ឆ្ងាយ​ពី​សាលារៀន​របស់​ពួក​គេ។ តំបន់​ដែល​មាន​ប្រជាប្រិយ​សម្រាប់​ការ​ធ្វើដំណើរ​ទស្សន​កិច្ច​សិក្សា​មាន​ដូច​ជា សួន​សត្វ មជ្ឈមណ្ឌល​ធម្មជាតិ ទីកន្លែង​នានា​របស់​រដ្ឋ ដូចជា មជ្ឈមណ្ឌល​ពន្លត់​អគ្គីភ័យ មន្ទីរ​ពេទ្យ ទីស្នាក់ការ​រដ្ឋាភិបាល មជ្ឈមណ្ឌល​ពាណិជ្ជកម្ម និង​សារមន្ទីរ​វិទ្យាសាស្ត្រ​ជាដើម។ ការ​ធ្វើ​ទស្សនកិច្ច​សិក្សា​មិន​ត្រឹម​តែ​ផ្ដល់​អត្ថប្រយោជន៍​បន្ថែម​សម្រាប់​ការ​សិក្សា​របស់​ពួកគេ​ប៉ុណ្ណោះ​ទេ តែ​ថែម​ទាំង​អាច​ផ្ដល់​ប្រយោជន៍​ដល់​សង្គម​បាន​ទៀត​ផង ប្រសិន​បើ​ពួក​គេ​មាន​ឱកាស​ចូលរួម​ក្នុង​កិច្ចការ​សង្គម។

17807542 1287228131345313 4958486251927351489 o

ការសិក្សាដោយអនុវត្តផ្ទាល់

សិស្ស​ដែល​ទស្សនា​ទីកន្លែង​អប់រំ​នានា​អាច​សិក្សា​ច្រើន​បាន​តាម​រយៈ​ការ​អនុវត្ត​ដោយ​ផ្ទាល់ និង​ភ្ជាប់​សកម្មភាព​នានា​ជាង​នៅ​សាលារៀន។ ឧទាហរណ៍ សារ​មន្ទីរ​វិទ្យាសាស្ត្រ​ភាគ​ច្រើន​តាំង​បង្ហាញ​វត្ថុ​នានា​ដែល​កុមារ​អាច​ប៉ះ​បាន ដែល​ជួយ​ពួក​គេ​ឱ្យ​យល់​ពី​វត្ថុ​ធាតុផ្សំ​ដែល​ត្រូវ​បាន​ប្រើ​ដើម្បី​ធ្វើ​វត្ថុ​មួយ​នោះ។ ចំណែក​ឯ​សួន​សត្វ មជ្ឈមណ្ឌល​ធម្មជាតិ សួន​រុក្ខសាស្ត្រ​វិញ បង្ហាញ​នូវ​សត្វ និង​រុក្ខជាតិ​ដល់​កុមារ​ក្នុង​ចម្ងាយ​ដ៏​ជិត និង​កៀក ហើយ​ច្រើន​តែ​មាន​តំបន់​ដែល​កុមារ​អាច​ប៉ះ​វត្ថុ​តាង​បាន​ដូច​ជា សត្វ​ចិញ្ចឹម​ក្នុង​សួន​សត្វ និង​កម្មវិធី​កុំព្យូទ័រ​ជា​ដើម។

ប្រភេទផ្សេងៗនៃដំណើរទស្សនកិច្ច

ដំណើរ​កម្សាន្ត​ទស្សនកិច្ច​សិក្សា​ផ្ដល់​ឱ្យ​កុមារ​នូវ​ការ​លំហែ​អារម្មណ៍។ កុមារ​អាច​សង្ឃឹម និង​រៀប​ចំ​សម្រាប់​ដំណើរ​កម្សាន្ត​របស់​ពួកគេ​ក្នុង​រយៈ​ច្រើន​ថ្ងៃ ឬ​ច្រើន​សប្ដាហ៍​ជាមុន។ បន្ទាប់​ទៀត ពួកគេ​ចាប់​ផ្ដើម​ចំណាយ​ពេល​ក្នុង​បរិយាកាស​ប្លែក ហើយ​អាច​បញ្ចប់​មេរៀន​នៅ​ក្នុង​ប្រធានបទ​ដែល​ទាក់ទង​បន្ទាប់​ពី​ដំណើរ​កម្សាន្ត​របស់​ពួកគេ​បាន​បញ្ចប់។ ការ​សិក្សា​ក្នុង​វិធី​ផ្សេងៗ​អាច​បង្ហាញ​ពីវិធី​រៀន​ច្រើន​ប្រភេទ ការ​ជួយ​កុមារ​ដើម្បី​ទទួល​ជោគជ័យ​តាម​រយៈ​ការ​មើល​ឃើញ ការ​ឮ ឬ​ការ​ចាប់​កាន់។

បទពិសោធន៍ថ្មី

កុមារ​សិក្សា​ពី​អាជីព គំនិត និង​ឱកាស​ផ្សេងៗ​ពេល​ដែល​ពួកគេ​ធ្វើ​ដំណើរ​នៅ​ខាង​ក្រៅ។ ដំណើរ​កម្សាន្ត​ទស្សកិច្ច​មួយ​អាច​ធ្វើ​ពញ្ញាក់​កុមារ​ឱ្យ​ដឹង​ពី​អ្វី​ដែល​ពួកគេ​ចង់​បាន​ដោយ​ការ​សាកល្បង​របស់​ថ្មី និង​បន្ត​ចាប់​យក​សុបិន​ដែល​គេ​មិន​ទាន់​បាន​គិត​ដល់។ ដំណើរ​កម្សាន្ត​ទស្សនកិច្ច​ក៏​អាច​បង្ហាញ​កុមារ​ពី​ឱកាស​ការងារ និង​អាច​បង្កើត​នូវ​ចំណាប់​អារម្មណ៍​ថ្មី​សម្រាប់​ពួក​គេ​ផង​ដែរ។

ផ្ដល់សេវាកម្មដល់អ្នកដទៃ

ក្នុង​អំឡុង​ពេល​នៃ​ការ​ណែនាំ​ពី​ការ​ផ្ដល់​សេវាកម្ម​ក្នុង​ដំណើរ​កម្សាន្ត​ទស្សនកិច្ច កុមារ​អាច​រៀន​ពី​ការ​ជួយ​អ្នក​ដទៃ​ក្នុង​សហគមន៍។ សហគមន៍​ក៏​ទទួល​បាន​ផល​ប្រយោជន៍​ពី​ការងារ​ដែល​កុមារ​បាន​ធ្វើ​ក្នុង​ដំណើរ​កម្សាន្ត​នោះ​ផង​ដែរ ហើយពី​ការ​ជួយ​ជ្រោមជ្រែង​ពី​ការ​ស្ម័គ្រចិត្ត​ដែល​កុមារ​បាន​ធ្វើ​ផង​ដែរ។

ទទួលបាននិទ្ទេស និងការយល់ដឹងល្អប្រសើរ

ដំណើរ​កម្សាន្ត​ទស្សនកិច្ច​អាច​ផ្ដល់​លទ្ធផល​ល្អ​ខ្លាំង​ក្នុង​មុខ​វិជ្ជា​សិក្សា​នានា។ ដោយ​ការ​មើល​ឃើញ​ពី​មេរៀន​ដែល​ប្រើ​ក្នុង​ជីវិត​ពិត​ដែល​កុមារ​កំពុង​រៀន​នៅ​ក្នុង​សាលារៀន កុមារ​អាច​យល់ និង​ឱ្យតម្លៃ​លើ​សារ​សំខាន់​ចំពោះ​អ្វី​ដែល​ពួក​គេ​កំពុង​រៀន៕

អត្ថបទដើម៖ What are the benefits of field trips for children

វិធីចិញ្ចឹមកូនឱ្យក្លាយជាមនុស្សជោគជ័យ

on Friday, 20 October 2017. Posted in Parenting Tips, Activities

Happy child playing with toy airplane 600x400

តើ​អ្នក​អាច​ប្រាកដ​បាន​ទេ​ថា​កូន​របស់​អ្នក​នឹង​ក្លាយ​ជា​មនុស្ស​ជោគ​ជ័យ​ក្នុង​ជីវិត​នា​ពេល​អនាគត? នេះ​គឺ​ជា​គុណ​តម្លៃ និង​បំណិន​ជីវិត​ខ្លះៗ​ដែល​នឹង​ក្លាយ​ជា​ចំណែក​មួយ​នៃ​វិថី​ឆ្ពោះ​ទៅ​រក​ភាព​ជោគ​ជ័យ​របស់​ពួក​គេ។

អត្ថបទដើមដោយ វេជ្ជបណ្ឌិត ព្រីស្កាឡា

ពួកយើង​ទាំងអស់​គ្នា​សុទ្ធ​តែ​ចង់​ឱ្យ​កូនៗ​មាន​ភាព​ជោគជ័យ​ក្នុង​ជីវិត​ដើម្បី​សម្រេច​គោល​បំណង​របស់​ពួកគេ​ ដើម្បី​ដឹក​នាំ​ជីវិត​ពួក​គេ​ឱ្យ​មាន​ន័យ និង​មាន​តម្លៃ ហើយ​ប្រហែល​ជា​អាច​បន្សល់​ទុក​នូវ​ស្នាដៃ​ខ្លះៗ​ផង​ដែរ។ ក៏​ប៉ុន្តែ ក្នុង​នាម​ជា​ឪពុក​ម្ដាយ តើ​យើង​បាន​ខិត​ខំ​ធ្វើអ្វី​ខ្លះ​ដើម្បី​ពួក​គេ​ដូច​ជា និយាយ​គ្នា កំណត់​សេចក្ដី​រំពឹង​ឱ្យ​ខ្ពស់ ជំរុញ និង​ណែនាំ​កូន​ឱ្យ​ធ្វើ​កាន់​តែ​ល្អ? ចំណុច​ទាំង​នេះ​សុទ្ធ​តែ​អាច​ជោគជ័យ​ក្នុង​ពេល​ណា​មួយ ប៉ុន្តែ វា​អាច​នឹង​បរាជ័យ​ផង​ដែរ។ សរុប​មក អ្វី​ដែល​យើង​ត្រូវ​ធ្វើ​នោះ​ គឺ​ផ្ដល់​នូវ​គុណ​តម្លៃ​ល្អ និង​បំណិន​ជីវិត​ដល់​ពួក​គេ។

គុណតម្លៃទាំង ៣

  • ស្មោះត្រង់៖

ភាព​ស្មោះត្រង់​ត្រូវ​បាន​ចាត់​ក្នុង​ចំណាត់​ថ្នាក់​ខ្ពស់​បំផុត​ក្នុង​ធាតុ​ផ្សំ​នៃ​ភាព​ជោគ​ជ័យ។ ភាព​ពិត សុចរិតភាព និង​ការ​ប្រព្រឹត្ត​ដោយ​យុត្តិធម៌ និង​ស្មើ​ភាព​នឹង​ផ្ដល់​នូវ​វិថី​នៃ​ភាព​ជោគ​ជ័យ​សម្រាប់​កូន​របស់​អ្នក។

  • សេចក្ដីព្យាយាមក្នុងការងារ៖

“ភាព​ជោគជ័យ​មិនមែន​កើត​ឡើង​ដោយ​ឯកឯង​នោះ​ឡើយ។ វា​ត្រូវ​ការ​ការ​ព្យាយាម ការ​ខិត​ខំ ការ​សិក្សា​រៀន​សូត្រ ការ​លះបង់ និង​ការ​ស្រឡាញ់​នូវ​អ្វី​ដែល​អ្នក​កំពុង​ធ្វើ ឬ​កំពុងរៀន​ធ្វើ។” នេះ​គឺ​ជា​ពាក្យ​សម្ដី​របស់​កីឡាករ​ទាត់​បាល់​ដ៏​ល្បី​លំដាប់​ពិភពលោក ប៉េលេ។ ចូរ​បង្រៀន​កូន​របស់​អ្នក​ថា​គ្មាន​អ្វី​ងាយ​ស្រួល​ឡើយ គឺ​មាន​តែ​សេចក្ដី​ព្យាយាម​ដែល​អ្នក​ខិតខំ​ប៉ុណ្ណោះ​ទើប​អាច​កំណត់​ពី​ភាព​ជោគ​ជ័យ​របស់​អ្នក​បាន​។ ម្យ៉ាង​វិញ​ទៀត ចូរ​បង្រៀន​កូន​កុំ​ឱ្យ​ងាយ​បោះ​បង់ ប៉ុន្តែ​ត្រូវ​បន្ត​ការ​ខិត​ខំ​ជានិច្ច​ដើម្បី​ទទួល​បាន​ផ្លែផ្កា។ ហើយ​ប្រសិន​បើ​កូន​របស់​អ្នក​ធ្វើ​ខុស ឬ​ចាញ់ សូម​បង្ហាញ​គេ​ពី​សុភាសិត​ចាស់ៗ​ថា “បរាជ័យ គឺ​ជា​ជំហាន​ទៅ​រក​ភាព​ជោគ​ជ័យ។” ឱ្យ​គេ​រៀន​បន្ត​ការ​ខិតខំ​ធ្វើ​កិច្ចការ​ដើម្បី​សម្រេច​គោល​បំណង​ឆ្ពោះ​ទៅ​រក​ភាព​ជោគ​ជ័យ​របស់​ពួក​គេ។

  • ការដាក់ខ្លួន៖

បើ​កូន​របស់​អ្នក​រៀន​លះ​បង់​ភាព​អាត្មា​និយម​របស់​ខ្លួន​ឯង​កាន់​តែ​ច្រើន ហើយ​គិត​អ្នកដទៃ​ជា​មុន ពួក​គេ​នឹង​កាន់​តែ​មាន​ភាព​ជោគ​ជ័យ​ក្នុង​ជីវិត​កាន់​តែ​ច្រើន។ មោទនភាព​លើ​ខ្លួន​ឯង និង​ការ​មើល​ងាយ​អ្នក​ដទៃ​នឹង​នាំ​ពួក​គេ​ទៅ​រក​ភាព​បរាជ័យ។

ជំនាញក្នុងជីវិតសំខាន់ទាំង ៥

  • ការគ្រប់គ្រងមនុស្ស៖

អភិវឌ្ឍ​ជំនាញ​ដែល​មនុស្ស​ប្រើ​ដល់​កូនៗ​របស់​ឱ្យ​បាន​ត្រឹម​ត្រូវ​តាំង​ពី​ពួក​គេ​ចាប់​ផ្ដើម​ចូល​រៀន​ថ្នាក់​មត្តេយ្យ​សិក្សា។ បង្រៀន​ពួក​គេ​ឱ្យ​មាន​អត្តចរិត​សុភាព​រាបសា និង​មាន​អាកប្បកិរិយា​ល្អ និង​ថ្លៃថ្នូរ។ ផ្ដល់​ឱកាស​ឱ្យ​គេ​រៀន​គោរព​មនុស្ស​គ្រប់​គ្នា និង​រាប់​អាន​ពួក​គេ​ប្រកប​ដោយ​ភាព​ថ្លៃថ្នូរ។ ភាព​ជោគជ័យ​នឹង​កើត​មាន​ឡើង​ក្នុង​ជីវិត​របស់​ពួក​គេ​ប្រសិន​បើ​អ្នក​បង្ហាញ​ជំនាញ​ល្អៗ​ដែល​ពួក​គេ​គួរ​ប្រើ។ ទំនាក់​ទំនង​ដែល​អ្នក​បង្កើត​ឡើង​ជាមួយ​អ្នក​នៅ​ជុំវិញ​ខ្លួន​ក៏​អាច​សន្មត​ពី​វិថី​នៃ​ភាព​ជោគជ័យ​ផង​ដែរ។

  • ការគ្រប់គ្រងការស្វែងរក៖

អនុញ្ញាត​ឱ្យ​កូន​របស់​អ្នក​មាន​អាទិភាព​ដ៏​ត្រឹម​ត្រូវ។ បង្រៀន​ពួក​គេ​ឱ្យ​ចេះ​កំណត់​គោល​ដៅ និង​សម្រេច​គោល​ដៅ។ ភាគ​ច្រើន ភាព​ជោគជ័យ​បាន​គេច​ចេញ​ពី​អ្នក​ដោយ​សារ​តែ​អ្នក​ស្វែង​រក​វា​មិន​បាន​ត្រឹម​ត្រូវ​តាម​គម្រោង។ អនុញ្ញាត​ឱ្យ​ពួក​គេ​ផ្ដោត​សំខាន់​លើ​វិថី​ដែល​ពួក​គេ​ចង់​ដើរ នោះ​ពួក​គេ​នឹង​អាច​ស្វែក​រក​ភាព​ជោគ​ជ័យ​បាន។

  • ការគ្រប់គ្រងធនធាន៖

ប្រសិន​បើ​នរណា​ម្នាក់​គ្រប់​គ្រង​ធន​ធាន​បាន វា​នឹង​កំណត់​ពី​កម្រិត​ភាព​ជោគជ័យ​របស់​គេ។ ភាព​ខ្សោយ​នៃ​ការ​គ្រប់​គ្រង​ធន​ធាន នឹង​ក្លាយ​ជា​ឧបសគ្គ​សម្រាប់​ភាព​ជោគជ័យ។ ចូរ​បង្រៀន​កូន​ពី​មេរៀន​ដ៏​សំខាន់​នេះ អាច​ថា​ជា​លុយ កម្លាំង​មនុស្ស ពេល​វេលា ឬ​អ្វី​ផ្សេង​ទៀត​ដើម្បី​ឱ្យ​ពួក​គេ​រៀន​ប្រើ​វា​ប្រកប​ដោយ​ភាព​ឆ្លាត​វៃ។

  • ការគ្រប់គ្រងភាពតានតឹង៖

ប្រសិន​បើ​កូន​របស់​អ្នក​មាន​អារម្មណ៍​តាន​តឹង នោះ​ពួក​គេ​ពិបាក​នឹង​សម្រេច​កិច្ចការ​អ្វី​មួយ។ ចូរ​បង្រៀន​ពួក​គេ​កុំ​ឱ្យ​រស់​នៅ​ក្រោម​សម្ពាធ នេះ​ហើយ​ជា​គន្លឹះ​នៃ​ភាព​ជោគ​ជ័យ។

  • ការគ្រប់គ្រងពេលវេលា៖

“ពេល​វេលា​មិន​រង់ចាំ​នរណា​ម្នាក់​ឡើយ។” នេះ​ជា​ប្រយោគ​ដែល​អ្នក​គួរ​បង្រៀន​កូនៗ។ សូម​ផ្ដល់​ឱកាស​ឱ្យពួក​គេ​រៀន​ពី​គុណ​តម្លៃ​នៃ​ពេល​វេលា ហើយ​មិន​ខ្ជះខ្ជាយ​ពេល​វេលា​សូម្បី​មួយ​នាទី។” លើស​ពី​នេះ​ សូម​បង្រៀន​ពួក​គេ​ថា ប្រសិន​បើ​គេ​ធ្វើ​កិច្ចការ​មួយ​ដែល​គ្មាន​គម្រោង និង​​កាល​វិភាគ​ច្បាស់​លាស់​ទេនោះ​ គេ​​ក៏​មិន​អាច​ទទួល​ភាព​ជោគជ័យ​នោះ​ឡើយ។ ហើយ​អ្នក​ត្រូវ​បង្រៀន​ពួកគេ​ឱ្យ​ចេះ​កំណត់​ការ​ធ្វើ​កិច្ចការ​អ្វី​មួយ​ប្រកប​ដោយ​ភាព​ឆ្លាត​វៃ នោះ​គេ​ប្រាកដ​ជា​អាច​សម្រេច​កិច្ចការ​គ្រប់​យ៉ាង​ដែល​គេ​ធ្វើ។

គុណ​តម្លៃ និង​ជំនាញ​ជីវិត ឬ​បំណិន​ជីវិត​ទាំង​នេះ​អាច​ជួយ​ឱ្យ​កូន​របស់​អ្នក​ទទួល​បាន​នូវ​ភាព​ជោគ​ជ័យទាំង​ក្នុង​ជីវិត​ផ្ទាល់​ខ្លួន និង​ជីវិត​អាជីព​របស់​ពួក​គេ៕

អត្ថបទដើម៖ How to Raise Successful Children

អត្ថប្រយោជន៍របស់សិល្បៈ និងហត្ថកម្មនៅក្នុងការអប់រំសម្រាប់កុមារតូច

on Wednesday, 18 October 2017. Posted in Classes, Parenting Tips, Activities

ប្រសិន​បើ​អ្នក​កំពុង​ស្វែង​រក​សកម្មភាព​ថ្មីៗ​សម្រាប់​កូន នោះ​អ្នក​គួរ​តែ​ពិចារណា​លើ​ការ​ធ្វើ​របស់​សិល្បៈ​ ឬ​ហត្ថកម្ម​នានា។

អត្ថបទ​ដើម​ដោយ អាណាន់យ៉ា សាប្រាមេនៀន

craft activities for kids1

អ្នក​អាច​ចាប់​ផ្ដើម​ឱ្យ​យោបល់​ពួកគេ​ឱ្យ​ចាប់​ផ្ដើម​បង្កើត​រូប​ចម្លាក់​តូចៗ​ដោយ​ប្រើ​ដី​ឥដ្ឋ ឬ​លាប​ពណ៌​ដោយ​ប្រើ​គូល័រ​ទៀន​ជា​ដើម បត់​ក្រដាស​ធ្វើ​រូប​សត្វ ឬ​រូបរាង​ផ្សេងៗ ធ្វើ​បណ្ណ​ជូនពរ​ខួប​កំណើត​ដោយ​ដៃ និង​មាន​វត្ថុ​ជា​ច្រើន​ទៀត​ដែល​អាច​ធ្វើ​ឱ្យ​កូន​របស់​អ្នក​មាន​ចំណាប់​អារម្មណ៍​ចង់​ធ្វើ និង​ចង់​បញ្ចេញ​សមត្ថភាព​។ លោក​អ្នក​អាច​បង្ហាញ​កូនៗ​ពី​វត្ថុ​ទាំង​នោះ ឬ​ជំរុញ​ពួកគេ​ឱ្យ​ទៅ​សាលារៀន​ នោះ​អ្នក​នឹង​ឃើញ​ការ​លូត​លាស់​របស់​គេ​ដូច​ជា ការ​លូត​លាស់​ផ្នែក​សរីរាង្គ សង្គម និង​ការ​យល់​ដឹង​ជា​ដើម។ ខាង​ក្រោម​នេះ​ គឺជា​អត្ថប្រយោជន៍​ពី​ការ​ធ្វើ​សកម្មភាព​សិល្បៈ និង​ហត្ថកម្ម​ទាំង​នោះ។

អត្ថប្រយោជន៍សម្រាប់រាងកាយ

អភិវឌ្ឍ​ជំនាញ​ការ​ប្រើ​ចលនា​សាច់​ដុំ៖ ស្ទើរ​តែ​គ្រប់​សកម្មភាព​សិល្បៈ និង​ហត្ថកម្ម​ត្រូវ​ការ​ការ​ប្រើ​ចលនា​ដៃ និង​ម្រាម​ដៃ ពួក​វា​ជួយ​ក្នុង​ការ​អភិវឌ្ឍ​ជំនាញ​ចលនា​សាច់ដុំ។ សូម្បី​តែ​សកម្មភាព​សាមញ្ញៗ​ខ្លះ​ដូច​ជា​ផាត់​ពណ៌​ដោយ​ប្រើ​ខ្មៅ​ដៃ ឬ​ជក់​សុទ្ធ​តែ​ជួយ​ពង្រឹង​សាច់​ដុំ និង​បង្កើន​ការ​គ្រប់គ្រង​សាច់​ដុំ។

បង្កើន​ជំនាញ​ក្នុង​ការ​ប្រើ​ម្រាម​ដៃ ឬ​ដៃ៖ សកម្មភាព​សិល្បៈ និង​ហត្ថកម្ម​អាច​បង្កើន​សមត្ថភាព​ក្នុង​ការ​ផ្លាស់​ទី និង​ជំនាញ​ក្នុង​ការ​ប្រើ​ម្រាម​ដៃ ឬ​ដៃ​របស់​កុមារ។ ប្រសិន​បើ​មាន​ការ​អនុវត្ត​ច្រើន​ដង ការ​អភិវឌ្ឍ​ជំនាញ​នៃ​ការ​ប្រើ​ចលនា​សាច់​ដុំ ជំនាញ​ក្នុង​ការ​ប្រើ​ម្រាម​ដៃ ឬ​ដៃ ជំនាញ​នៃ​ការ​ប្រើ​ល្បឿន និង​សិល្បៈ​នឹង​អភិវឌ្ឍ​ដូច​គ្នា។

អភិវឌ្ឍ​ការ​ប្រើ​ដៃ​ និង​ភ្នែក៖ ការ​ចូលរួម​ក្នុង​សកម្មភាព​សិល្បៈ និង​ហត្ថកម្ម​តាំង​ពី​វ័យ​នៅ​តូចៗ​ អាច​នាំ​ឱ្យ​ពួក​គេ​មាន​ការ​អភិវឌ្ឍ​ការ​ប្រើ​ដៃ និង​ភ្នែក​បាន​ល្អ ហើយ​វា​នឹង​ជួយ​កុមារ​ក្នុង​ពេល​អនាគត​សម្រាប់​ថ្នាក់​បឋមសិក្សា​របស់​ពួក​គេ​ពេល​ដែល​ពួកគេ​សរសេរ​អក្សរ និង​ដកឃ្លា​ពាក្យ​នីមួយៗ។

អត្ថប្រយោជន៍សង្គម និងអារម្មណ៍

ជំរុញ​ឱ្យ​ចេះ​បញ្ចេញ​អារម្មណ៍​ផ្ទាល់​ខ្លួន៖ ការ​ចូល​ក្នុង​សកម្មភាព​ដូចជា​សិល្បៈ និង​ហត្ថកម្ម​ជួយ​កុមារ​ឱ្យ​មាន​ឱកាស​ក្នុង​ការ​បញ្ចេញ​អារម្មណ៍​របស់​ពួក​គេ​នៅ​ក្នុង​វិធី​មួយ​ដែល​មាន​ន័យ​ អាច​មើល​ឃើញ និង​ប្រកប​ដោយ​ភាព​វិជ្ជមាន។ គេ​ក៏​អាច​មាន​អារម្មណ៍​រីករាយ​ចំពោះ​អ្វី​ដែល​ពួកគេ​បាន​ធ្វើ​ដោយ​ផ្ទាល់​ដៃ។ 

ជួយ​បង្កើន​ទំនាក់​ទំនង៖ ការ​នៅ​ជាមួយ​ក្មេង​ដទៃ​ទៀត​នៅក្នុង​ថ្នាក់​សិល្បៈ​ផ្ដល់​ឱ្យ​កុមារ​នូវ​ឱកាស​ក្នុង​ការ​ទាក់​ទង និង​រាប់​អាន​ជាមួយ​នឹង​កុមារ​ផ្សេង​ទៀត​ដែល​មាន​ចំណង់​ចំណូល​ចិត្ត​ស្រដៀង​គ្នា។ ហើយ​នៅ​ពេល​ដែល​ឪពុកម្ដាយ​បង្ហាញ​ចំណាប់​អារម្មណ៍​លើ​អ្វី​ដែល​កូន​កំពុង​ធ្វើ​ ​វា​ក៏​អាច​រិត​ចំណង​សម្ព័ន្ធភាព​រវាង​ឪពុក​ម្ដាយ និង​កូន​ផង​ដែរ។

បង្កើន​ការ​ឱ្យ​តម្លៃ​លើ​ខ្លួន​​ឯង៖ សកម្មភាព​សិល្បៈ និង​ហត្ថកម្ម​បង្កើត​នូវ​អារម្មណ៍​មោទនភាព និង​សមិទ្ធិផល​ដល់​កុមារ ដែល​ជា​ហេតុ​នាំ​ឱ្យ​ពួកគេ​មាន​ការ​ឱ្យ​តម្លៃ​លើ​ខ្លួន​ឯង។

អត្ថប្រយោជន៍នៃការយល់ដឹង

បង្កើន​ការ​បង្កើត​ថ្មី និង​សមត្ថភាព​ច្នៃ​ប្រឌិដ្ឋ៖ ឱកាស​ក្នុងការ​បង្កើត​អ្វី​ដែល​កុមារ​ចង់​បង្កើត​សម្រាប់​ការ​ច្នៃប្រឌិដ្ឋ និង​សមត្ថភាព​ក្នុង​ការ​គិត និង​ដោះ​ស្រាយ​បញ្ហា​ដែល​គេ​អាច​ជួប​ប្រទះ​ក្នុង​ពេល​បង្កើត​អ្វី​ដែល​ថ្មី​នោះ។

បង្កើន​ជំនាញ​ក្នុង​ការ​សម្រេច​ចិត្ត៖ ការ​ប្រឈម​មុខ និង​​ការ​ដោះ​ស្រាយ​បញ្ហា​សិល្បៈ​នឹង​ជួយ​កុមារ​ឱ្យ​រៀន​ក្នុង​ការ​ធ្វើការ​សម្រេចចិត្ត​ប្រកប​ដោយ​ប្រសិទ្ធភាព និង​ត្រឹម​ត្រូវ។ ជំនាញ​នេះ​ជួយ​កុមារ​ក្នុង​ការ​អភិវឌ្ឍ​ឥរិយាបថ​ក្នុង​ការ​ដោះស្រាយ​បញ្ហា​ដែល​នឹង​ជួយ​ពួកគេ​ក្នុង​ការ​សម្រេច​ភាព​ជោគជ័យ​ក្នុង​ជីវិត​របស់​ពួក​គេ​នា​ពេល​អនាគត។

បង្កើន​ការ​សិក្សា និង​ការ​ចងចាំ​ឱ្យ​ប្រសើរ​ឡើង៖ តាម​រយៈ​សិល្បៈ និង​ហត្ថកម្ម កុមារ​មិន​ត្រឹម​តែ​សិក្សា​ពី​រូបរាង និង​ពណ៌ថ្មី​ប៉ុណ្ណោះ​ទេ ប៉ុន្តែ​ក៏​អាច​ក្លាយ​ជា​រូបរាង​ប្លែក​ជាង​នេះ​ទៀត។ សកម្មភាព​ដូចជា​ការ​បង្កើត​គ្រឿង​អលង្ការ ឬ​រូប​សំណាក​​ក៏​ត្រូវ​ការ​ការបង្ហាញ​ជា​រូបរាង និង​ការទន្ទេញ​ឱ្យ​ចាំ​នូវ​ការ​រចនា​ដ៏​សាំញ៉ាំ​នៅ​ក្នុង​ចិត្ត​របស់​ពួក​គេ។

អត្ថប្រយោជន៍​ផ្សេងៗ​នៃ​សិល្បៈ និង​ហត្ថកម្ម​ក៏​អាច​ពង្រីក​ការ​អភិវឌ្ឍ​ការ​យល់​ដឹង​ផ្នែក​វប្បធម៌ និង​លទ្ធផល​ក្នុង​ការ​សិក្សាក៏​មាន​ការ​រីក​ចម្រើន​ផង​ដែរ។ នៅ​ពេល​ដែល​មាន​អត្ថប្រយោជន៍​ដែល​បាន​មក​ពី​ការ​សិក្សា និង​ការ​ធ្វើ​វត្ថុ​សិល្បៈ និង​កិច្ចការ​ហត្ថកម្ម​យ៉ាង​ច្រើន​នេះ​ហើយ រួម​ជា​មួយ​នឹង​ភាព​សប្បាយ​រីករាយ​ និង​រំភើប​ហើយ​នោះ ហើយអី​ក៏​អ្នក​មិន​អនុញ្ញាត​ឱ្យ​កូន​អ្នក​ចូល​រួម​ក្នុង​សកម្មភាព​ទាំង​នោះ? 

អត្ថបទដើម៖ Benefits Of Arts And Craft In Early Education

សារសំខាន់នៃការចូលរួមរបស់ឪពុកម្ដាយក្នុងការសិក្សារបស់កូន

on Tuesday, 10 October 2017. Posted in Classes, Parenting Tips, Activities

ការ​ចូលរួម​របស់​ឪពុក​ម្ដាយ​ត្រូវ​បាន​គេ​ចាត់​ទុក​ថា​ជា​ចំណែក​សំខាន់​មួយ​ក្នុង​ការ​សិក្សា​របស់​កូន។ វា​អាច​បង្កើត​នូវ​ភាព​ខុស​ប្លែក​ក្នុង​ជីវិត​សិក្សា​របស់​កូន​របស់​អ្នក ទាំង​ក្នុង​ភាព​ជោគ​ជ័យ​ក្នុង​ការ​សិក្សា និង​ការ​រីករាយ​នៅ​សាលា​រៀន។

large thumb 001parent teach

ហេតុអ្វីបានជាត្រូវមានការចូលរួម?

ការ​ចូលរួម​របស់​ឪពុកម្ដាយ​ត្រូវ​បាន​គេ​សម្គាល់​ដោយ​មាន​ការ​ផ្សារ​ភ្ជាប់​នឹង​ការ​អភិវឌ្ឍ​ឥរិយាបថ វត្តមាន​ទៀងទាត់​នៅ​សាលា និង​អាកប្បកិរិយា​វិជ្ជមាន។ បន្ថែម​ពី​នេះ​ទៀត ការ​ចូលរួម​របស់​អ្នក​អាច​បង្ហាញ​កូន​របស់​អ្នក​ថា​អ្នក​យក​ចិត្ត​ទុក​ដាក់​ចំពោះ​ការ​សិក្សា​របស់​ពួក​គេ។ មូលហេតុនេះ​ហើយ​ដែល​ធ្វើ​ឱ្យ​កូនៗ​ឱ្យ​តម្លៃ​លើ​សារ​សំខាន់​នៃ​ការ​សិក្សា និង​អាច​ឱ្យ​ពួក​គេ​យល់​ពី​គោល​បំណង​ដែល​ពួកគេ​កំពុង​ធ្វើអ្វី​មួយ​ថែម​ទៀត​ផង។

ការ​ចូល​រួម​របស់​ឪពុក​ម្ដាយ​ផ្ដល់​នូវ​បណ្ដាញ​គាំ​ទ្រ​សម្រាប់​​កូន​ដែល​មាន​សារ​សំខាន់​ពេល​ដែល​ពួក​គេ​ត្រូវ​ជួប​ប្រទះ​នឹង​ឧបសគ្គ​ក្នុង​ការ​សិក្សា ឬ​បញ្ហា​នានា​ទាក់​ទង​នឹង​មិត្តភាព ឬ​ក៏​សកម្មភាព​សិក្សា​បន្ថែម​ជាដើម​។ នេះ​មាន​ន័យថា​អ្នក​ដឹង​ច្បាស់​ថាវិថី​អប់រំ​ណា​ដែល​កូន​លោក​អ្នក​កំពុង​ដើរ និង​អាច​ចូល​រួម​ចំណែក​ពេល​គេ​មាន​បញ្ហា ឬ​ទទួល​ជោគជ័យ​ទៀត​ផង។

សរុប​មក កុមារ​ណា​ដែល​មាន​ឪពុកម្ដាយ​ចូលរួម​ក្នុង​ការ​សិក្សា​អប់រំ​ជាមួយ ច្រើនតែ​មាន​ការ​គោរព​ខ្លួន​ឯង​ច្រើន មាន​វិន័យ​ល្អ មាន​ការ​ជំរុញ​ទឹក​ចិត្ត​ខ្លួន​ឯង​ខ្ពស់ អាច​ទទួល​បាន​និទ្ទេស​ល្អ​ក្នុង​ការ​សិក្សា​ដោយ​មិន​ចាំ​បាច់​ត្រូវ​គិត​ពី​ជីវភាព ស​ង្គម ឬ​សញ្ជាតិ​អ្វី​ឡើយ។

អត្ថប្រយោជន៍សម្រាប់អ្នក

ដូចគ្នា​នឹង​ការ​បង្កើត​កម្លាំង​ជំរុញ​ទឹក​ចិត្ត និង​ការ​ផ្ដល់​នូវ​វិន័យ​ដល់​កូនៗ​ដែរ ការ​ចូលរួម​ចំណែក​របស់​លោក​អ្នក​នឹង​ទទួល​បាន​នូវ​អត្ថប្រយោជន៍​ជា​ច្រើន​សម្រាប់​អ្នក។ ការ​ដែល​អ្នក​ចូល​រួម​ក្នុង​ការ​សិក្សា​របស់​កូន អ្នក​នឹង​ដឹង​ថា​តើកូន​មាន​តម្រូវ​ការ​ផ្នែក​អារម្មណ៍ និង​ផ្នែក​សង្គម​អ្វី​ខ្លះ។

ការ​ចូល​រួម​របស់​ឪពុក​ម្ដាយ​បង្កើត​នូវ​ចំណង​ដ៏​រឹង​មាំ​ជាមួយ​កូនៗ និង​អាច​បង្កើន​ទំនុកចិត្ត​នៃ​ភាព​ជា​ឪពុក​ម្ដាយ​កាន់​តែ​ខ្លាំង ព្រម​ទាំង​អាច​សម្រេច​ចិត្ត​បាន​គ្រប់​រឿង​ពេល​ដែល​ទាក់ទង​នឹង​ការ​សិក្សា​របស់​កូន។

វាក៏​អាច​ធ្វើ​ឱ្យ​ទំនាក់​ទំនង​រវាង​អ្នក​នឹង​ខាង​សាលារៀន​កាន់​តែ​ល្អ អាច​ធ្វើ​ឱ្យ​ទំនាក់​ទំនង​រវាង​គ្រូ ឪពុក​ម្ដាយ និង​សិស្ស​កាន់​តែ​ជិត​ដិត។ ចំណុច​ទាំង​នេះ​ហើយ​ដែល​អាច​ធ្វើ​ឱ្យ​អ្នក​មាន​ជំនឿ​ចិត្ត​ច្រើន​ជាង​មុន​នៅ​សាលា​រៀន​ចំពោះ​ការ​សិក្សា​អប់រំ​របស់​កូន។ សាលា​ដែល​មាន​ទំនាក់​ទំនង​ជាមួយ​ឪពុក​ម្ដាយ​សិស្ស​ក្នុង​កម្រិត​ខ្ពស់​តែងតែ​មាន​ការ​ជួយគាំទ្រ​សហគមន៍​បាន​ល្អ និង​មាន​កិត្តិនាម​វិជ្ជមាន។ ជាង​នេះ​ទៀត​ ពេល​ដែល​កូន​របស់​អ្នក​ឃើញ​អ្នក​មាន​ទំនាក់ទំនង​ជាមួយ​សាលា​ចំពោះ​ការ​សិក្សា​របស់​ពួក​គេ ពួកគេ​នឹង​យល់​ពីសារសំខាន់​នៃ​ការ​សិក្សា​របស់​ពួក​គេ។

អត្ថប្រយោជន៍សម្រាប់កូនរបស់អ្នក

ការ​ស្រាវជ្រាវ​មួយ​បាន​បង្ហាញ​ថា 2/3 នៃ​គ្រូ​បង្រៀន​ជឿ​ថា​ការ​ចូល​រួម​ពី​ឪពុកម្ដាយ​ចំពោះ​ការ​សិក្សា​របស់​កូន​អាច​ឱ្យ​ពួកគេ​ទទួល​បាន​លទ្ធផល​ល្អ​ក្នុង​ការ​សិក្សា។ ដូចការ​រៀបរាប់​ខាង​លើ កុមារ​នឹង​ទទួល​បាន​ពិន្ទុ​ល្អ​ជាង​មុន និង​មាន​ចិត្ត​ចង់​រៀន​ជាង​មុន​ពេល​ដែល​ឪពុក​ម្ដាយ​គេ​មាន​ការ​ចូល​រួម​ជាមួយ​ពួក​គេ។ ក្នុង​នោះ​មាន​ហេតុផល​មួយ​ចំនួន​សម្រាប់​ការ​អះ​អាង​នេះ។

ការ​ស្រាវជ្រាវ​ផ្សេង​ទៀត​ក៏​បាន​បង្ហាញ​ផង​ដែរ​ថា ការ​ចូលរួម​របស់​ឪពុកម្ដាយ​ជួយ​ឱ្យ​កូន​មាន​ស្មារតី និង​អាច​ឱ្យ​ពួកគេ​​យល់​ថា​ការ​សិក្សា​របស់​ពួក​គេ​ គឺ​ជា​ចំណាប់​អារម្មណ៍​ដ៏​មាន​តម្លៃ​សម្រាប់​មនុស្ស​ធំ។ ព្រោះ​តែ​កុមារ​ចូលចិត្ត​ធ្វើ​ត្រាប់​តាម​មនុស្ស​ធំ យើងជា​ឪពុក​ម្ដាយ​ត្រូវ​តែ​ចូល​រួម​យ៉ាង​សកម្ម​ក្នុង​ការ​សិក្សា​របស់​ពួក​គេ ដើម្បី​ឱ្យ​ពួក​គេ​អាច​រៀន​ពី​សារ​សំខាន់​នៃ​ការ​សិក្សា និង​ព្យាយាម​ធ្វើ​តាម​ឪពុក​ម្ដាយ​របស់​ពួក​គេ។ វា​ក៏​អាច​ជួយ​ឱ្យ​កូន​របស់​អ្នក​យល់​ថា​ការ​សិក្សា​របស់​ពួក​គេ​មិន​មែន​សម្រាប់​តែ​ពួក​គេ​ប៉ុណ្ណោះ​ទេ។ វា​ក៏​ជា​កិច្ច​សហការ​របស់​សិស្ស គ្រូ និង​ឪពុក​ម្ដាយ​របស់​ពួកគេ​ផង​ដែរ។ ពេល​ដែល​អ្នក​ទាំង ៣ សហការ​គ្នា​នោះ​នឹង​ទទួលបាន​លទ្ធផល​វិជ្ជមាន​នា​ពេល​អនាគត។ កុមារ​ដែល​មាន​ការ​ជួយ​ពី​ឪពុក​ម្ដាយ គេ​នឹង​មាន​អារម្មណ៍​ចង់​រៀន​ខ្លាំង ហើយ​វត្តមាន​នៅ​សាលា​ក៏​កាន់​តែ​សំខាន់​សម្រាប់​ពួក​គេ។

ការ​ចូលរួម​ពី​អ្នក​ក៏​អាច​ជំរុញ​សុខភាព​ផ្លូវចិត្ត​កូន​ផង​ដែរ។ វា​ជួយឱ្យ​មាន​ទំនាក់​ទំនង​រវាង​កូន និង​ឪពុកម្ដាយ ដែល​អាច​បង្កើត​នូវ​ការ​គោរព​ខ្លួនឯង និង​ភាព​ជឿជាក់​ខ្ពស់។ វា​ក៏​អាច​ជួយ​កុមារ​ឱ្យ​ភ្ជាប់​ទំនាក់​ទំនង​ជាមួយនឹង​មិត្ត​របស់​ពួក​គេ និង​បង្កើត​ជំនាញ​​ទំនាក់​​ទំនង​​ក្នុង​​សង្គម​​ជា​ដើម។

ដោយ​សារ​​តែ​​ការ​​ចូល​រួម​​​ពី​​ឪពុក​ម្ដាយ​​មាន​សារ​សំខាន់​ច្រើន​សម្រាប់​អ្នក គ្រូ​បង្រៀន និង​កូន​ហើយ​នោះ​  អ្នក​ត្រូវ​ជួយ​គាត់​ដោយ​គិត​ថា​អ្នក​អាច​ធ្វើអ្វី​ខ្លះ​ដើម្បី​អាច​ចូល​រួម​ជាមួយ​ពួក​គេ​បាន៕

អត្ថបទដើម៖ The Importance of Parental Involvement in Your Child's Education

កុមារ និងសារសំខាន់នៃមិត្តភាព

on Tuesday, 26 September 2017. Posted in Parenting Tips, Activities

Traits Of Kids Whove Been Disciplined 640x400

យើង​ទាំង​អស់​គ្នា​សុទ្ធ​តែ​ចង​ចាំ​នូវ​មិត្ត​ដំបូង​បំផុត​របស់​យើង។ ពួកគេ​ជា​អ្នក​ដែល​យើង​ចង់​ជួប​ជាង​គេ​ពេល​ភ្ញាក់​ពី​គេង​ភ្លាម​នោះ ជា​អ្នក​ដែល​យើង​ចង់​ជួប​នៅ​ក្នុង​សាលា លេង​ជាមួយគ្នា​ដោយ​ភាព​ជឿ​ជាក់​ និង​សប្បាយ​រីករាយ។ សូម្បី​តែ​ឥឡូវ ខណៈ​យើង​ជា​មនុស្ស​ពេញ​វ័យ​ក៏​ដោយ មិត្តភក្ដិ គឺ​ជា​ផ្នែក​មួយ​ដ៏​សំខាន់​នៃ​ជីវិត​រស់​នៅ​ប្រចាំថ្ងៃ តាំង​ពី​ការ​ចែក​រំលែក​បញ្ហា ការ​សួរ​រក​ដំបូន្មាន ការ​ចែក​រំលែក​សំណើច​ និង​ពេល​វេលា​ល្អៗ ការ​ចែក​រំលែក​ព្រឹត្តិការណ៍​ក្នុង​ជីវិត ព្រឹត្តិការណ៍​ដែល​មាន​មោទនភាព​បំផុត នោះ​មិត្ត​ភក្ដិ​របស់​យើង​ជួយ​កំណត់​ឱ្យ​យើង​ទៅ​វិញ​ទៅ​មក​ថា​យើង​ជា​នរណា។  

សម្រាប់​កុមារ​វិញ ការ​រាប់​អាន​មិត្ត គឺ​ជា​ផ្នែក​សំខាន់​មួយ​នៃ​ការ​លូត​លាស់ និង​ផ្នែក​សំខាន់​មួយ​នៃ​ការ​អភិវឌ្ឍ​ទំនាក់​ទំនង​សង្គម និង​អារម្មណ៍។ លក្ខណៈ​សំខាន់​ផ្សេងៗ​ដូច​ជា ការ​យល់​ដឹង​ផ្នែក​ទំនាក់​ទំនង​សង្គម ការ​ចេះ​គិត​គូរ​ពី​អ្នក​ដទៃ ការ​គោរព​ខ្លួន​ឯង និង​ការ​មាន​ភាព​ជឿ​ជាក់​លើ​ខ្លួន​ឯង​សុទ្ធ​តែ​ត្រូវ​បាន​រក​ឃើញ​ដោយ​មាន​ការ​ទាក់​ទង​នឹង​ការមាន​មិត្ត។ តាម​រយៈ​ការ​សិក្សា​មួយបាន​បង្ហាញ​ថា មិត្តភាព​អាច​ធ្វើ​ឱ្យកុមារ​មាន​សមត្ថភាព​ស្វែង​យល់​ពី​ខ្លួន​ឯង និង​អភិវឌ្ឍ​អត្តសញ្ញាណ​ផ្ទាល់​ខ្លួន។ ជាង​នេះ​ទៀត ភាព​ចាស់​ទុំ​របស់​កុមារ មិត្តភក្ដិ​អាច​ជួយ​អ្នក​កាត់​បន្ថយ​ភាព​តាន​តឹង និង​ចង្អុរ​បង្ហាញ​ពី​បទ​ពិសោធន៍​នៃ​ការ​អភិវឌ្ឍ ជា​ពិសេស​ក្នុង​អំឡុង​ពេល​យុវវ័យ។

ប៉ុន្តែ វា​មិន​ត្រឹម​តែ​ផ្ដល់​អត្ថប្រយោជន៍​ផ្នែក​ទំនាក់​ទំនង​សង្គម និង​អារម្មណ៍​ប៉ុណ្ណោះ​ទេ តែ​មិត្តភក្ដិ​ក៏​អាច​ជះ​ឥទ្ធិពល​វិជ្ជមាន​លើ​សុខភាព​របស់​កុមារ​ផង​ដែរ។ ការ​សិក្សា​មួយ​ចំនួន​បាន​បង្ហាញ​ថា កុមារ​ដែល​លេង​ជាមួយ​មិត្តភក្ដិ​ដែល​សកម្ម​ញឹកញាប់​ហាក់​ដូច​ជា​មិន​មែន​ជា​បញ្ហា​ឡើយ​ពេល​ដែល​ពួកគេ​មិន​បាន​ធ្វើការ​ហាត់​ប្រាណ ឬ​ក៏​បញ្ចេញ​សកម្មភាព​ដែល​បង្ហាញ​ពី​ស្មារតី​ស្វាហាប់ ឬ​ខ្វះ​ភាព​សប្បាយ​រីករាយ​ឡើយ​។

ទោះ​ជា​យ៉ាង​ណា​ក៏​ដោយ វា​មិន​មែន​ងាយ​ស្រួល​រហូត​ឡើយ​សម្រាប់​កុមារ​ក្នុង​ការ​ដឹង​ថា​គួរ​គ្រប់​គ្រង​មិត្តភាព​យ៉ាង​ដូច​ម្ដេច និង​ការ​សិក្សា​ថា​តើ​គួរ​រក្សា និង​រាប់អាន​មិត្ត​ថ្មី ក្នុង​នោះ​រាប់​បញ្ចូល​ទាំង​ជំនាញ​ដែល​កុមារ​ត្រូវ​ការ​រៀន និង​អភិវឌ្ឍ។ សម្រាប់​កុមារ​ខ្លះ ជំនាញ​ទាំង​នោះ​មាន​ស្រាប់​សម្រាប់​ពួក​គេ ដែល​ធ្វើឱ្យ​ពួក​គេ​ងាយ​ស្រួល​ក្នុង​ការ​ផ្លាស់​ប្ដូរ​ទៅ​កាន់​ក្រុម​មិត្ត​ភក្ដិ ការ​ចែក​រំលែកបទ​ពិសោធន៍​ផ្ទាល់​ខ្លួន និង​ការ​បើក​ចិត្ត​ទទួល​មិត្ត​ថ្មី​ជា​ដើម។

សម្រាប់​មនុស្ស​ខ្លះ​ទៀត ការ​បង្កើត​មិត្តភាព​អាច​នឹង​ពិបាក​ក្នុង​ការ​ចាប់​ផ្ដើម។

វា​មាន​សារប្រយោជន៍​សម្រាប់​កុមារ​ដើម្បី​គ្រប់​គ្រង់ និង​បង្កើត​ទំនាក់​ទំនង​ដោយ​ខ្លួន​ឯង ទោះបី​ជា​ឪពុក​ម្ដាយ ឬ​អាណាព្យាបាល​ចង់​ទទួល​ខុស​ត្រូវ ឬ​ជ្រៀតជ្រែក​ក៏​ដោយ។ ប៉ុន្តែ មាន​វិធី​ផ្សេង​ទៀត​ដែល​យើង​​អាច​ជួយ​កុមារ​ឱ្យចេះប​ង្កើត​មិត្តភាព ក្លាយជា​ក្មេង​ដែល​មាន​ភាព​ទុកចិត្ត​លើ​ខ្លួន​ឯង​ជាង​មុន និង​ជួយ​ពួក​គេ​ក្នុង​ការ​កសាង និង​អភិវឌ្ឍ​ជំនាញ​សង្គម​របស់​ពួកគេ។

  • ជួយ​កូន​ឱ្យ​ចេះ​អភិវឌ្ឍ​ជំនាញ​សង្គម​វិជ្ជមាន​តាំង​ពី​តូច។ ជួយ​ពួកគេ​ឱ្យ​យល់​ពី​សារសំខាន់​នៃ​ការ​ចែក​រំលែក ការ​យល់ពី​អារម្មណ៍​របស់​អ្នក​ដទៃ និង​ការ​ចេះ​ស្ដាប់​គ្នា​ទៅ​វិញ​ទៅ​មក។ ទាំង​នេះ​សុទ្ធ​តែ​អាច​ប្រើ​ដើម្បី​រៀប​ចំ​ឱកាស​សម្រាប់​កូន​របស់​អ្នក​ក្នុង​ការ​ជួយ​មនុស្ស​ប្លែកៗ​គ្នា​ជា​ច្រើន។
  • បង្ហាញ​កូន​របស់​អ្នក​ថា​តើ​មិត្តភាព​វា​យ៉ាងម៉េច​ដោយ​ឱ្យ​គេ​ឃើញ​ពី​អ្វី​ដែល​អ្នក​ប្រព្រឹត្ត​ទៅ​លើ​មិត្ត​ភក្ដិ​របស់​អ្នក។
  • ជួយ​កូនៗ​ឱ្យ​ចេះ​ស្វែង​យល់​ពី​កុមារ​ផ្សេង​ទៀត​ដែល​មាន​ចំណង់​ចំណូលចិត្ត​ស្រដៀង​គ្នា ដូច​ជា​តាម​រយៈ​ក្លឹប​ហែល​ទឹក ក្រុម​ទាត់​បាល់ ឬ​ក្រុម​សម្ដែង ដែល​កុមារ​អាច​ជ្រើសរើស​មិត្តភក្ដិ​ដោយ​អាស្រ័យលើ​ទម្លាប់ និង​ចំណង់ចំណូលចិត្ត​ស្រដៀង​គ្នា។
  • សម្រាប់​កុមារ​ធំៗ​ដែល​អាច​មាន​អារម្មណ៍​ខ្មាស់​អៀន ឬ​តាន​តឹង​វិញ​នោះ សូម​ចាប់​ផ្ដើម​បង្កើត​ការ​សន្ទនា​ឱ្យ​ពួក​គេ​ជាមួយ​អ្នក​ដទៃ និង​ការ​សម្ដែង​មួយ​ដែល​បង្ហាញ​ថា​ពួកគេ​នឹង​និយាយ​អ្វី​ទៅ​កាន់​អ្នក​ដទៃ។
  • ជួយ​ពួក​គេ​ឱ្យ​ស្វែង​រក​ចំណង់​ចំណូល​ចិត្ត​ថ្មី ឬ​ជួយ​ពួក​គេ​ឱ្យ​ចេះ​បង្កើត​ភាព​មាន​ទំនុកចិត្ត​លើ​ខ្លួន​ឯង​ក្នុង​ស្ថានភាព​ប្រចាំថ្ងៃ។

មិត្តភាព​របស់​កុមារ​តែងតែ​មាន​ភាព​រង្គោះ​រង្គើ និង​សប្បាយ​រីករាយ។ ជួន​កាល អ្នក​ប្រហែល​ជា​ត្រូវ​ប្រឈម​មុខ​នឹង​កូន​ដែល​បែក​បាក់​ជាមួយ​មិត្តភក្ដិ។ ជម្លោះ​វិញ គឺ​ជា​ផ្នែក​ធម្មតា​មួយ​នៃ​មិត្តភាព ទោះ​បី​ពេល​ខ្លះ​វា​អាច​នឹង​ពិបាក​សម្រាប់​កុមារ និង​មនុស្ស​វ័យ​ក្មេង​ក្នុង​ការ​គ្រប់គ្រង និង​យល់​ពី​វា។ ជួន​កាល​ ជម្លោះ​ទាំង​នេះ​មើល​ទៅ​ដូច​ជា​តូច​ទេ ប៉ុន្តែ វា​អាច​បំបាក់​ភាព​ជឿជាក់​របស់​កុមារ ហើយ​ធ្វើ​ឱ្យ​ពួក​គេ​បន្ទោស​ខ្លួន​ឯង​បាន។

ប្រសិន​បើ​កូន​អ្នក​ឈ្លោះ​ជាមួយ​មិត្តភក្ដិ សូម​រក​ពេល​និយាយ​ជាមួយ​ពួកគេ​ពី​អារម្មណ៍​របស់​ពួក​គេ និង​អារម្មណ៍​របស់​មិត្ត​គេ​យ៉ាង​ណា។ អ្នក​ត្រូវ​ផ្ដល់​យោបល់ និង​ជួយ​ពួក​គេឱ្យ​យល់​ថា​មិត្តភាព​តែងតែ​មាន​ភាព​រង្គោះរង្គើ​ខ្លះ​ហើយ។ អ្នក​ត្រូវ​ប្រាប់​ពួកគេ​ថា​ពួកគេ​ត្រូវ​ធ្វើអ្វី​ទៀត​ពេល​ដែល​ពួក​គេ​ត្រូវ​ចូល​រៀន​វិញ​នោះ។

ក្នុង​ការ​អប់រំ​ជីវិត យើង​ជួយ​កូនៗ​ក្នុង​ការ​អភិវឌ្ឍ​ជំនាញ​ទំនាក់ទំនង ការ​គោរព​ខ្លួន​ឯង សារសំខាន់​នៃ​មិត្តភាព និង​ការ​ជួយ​គាំទ្រ និង​វិធីគ្រប់គ្រប់​ជម្លោះ​រវាង​មិត្ត និង​មិត្ត៕

អត្ថបទដើម៖ Children and the Benefits of Friendship

ជំនាញជីវិតសំខាន់ៗដើម្បីបង្រៀនកូនៗ

on Monday, 25 September 2017. Posted in Parenting Tips

teachersmotivate2

នៅក្នុង​ពិភព​ដែល​មាន​ការ​ផ្លាស់ប្ដូរ​យ៉ាង​ឆាប់​រហ័ស វិធី​ចិញ្ចឹម​កូនៗ​នឹង​ក្លាយ​ជា​បញ្ហា​ខុស​ប្លែក​គ្នា​ពី​វិធី​ដែល​ឪពុកម្ដាយ​យើង​ចិញ្ចឹម​យើង។ អ្វី​ដែល​ខុស​ប្លែកគ្នា​ច្រើន​អាច​ទាក់ទង​នឹង​តម្រូវ​ការ​ក្នុង​ការ​រៀប​ចំ​អនាគត​ក្មេង​ជំនាន់​ក្រោយ​សម្រាប់​រស់​នៅ​ក្នុង​ពិភពលោក​ថាមវន្ដ និង​សាកល​ភាវូបនីយកម្ម​ជាង​មុន។ 

ក្នុង​ពន្លឺ​នៃ​អនាគត​បែប​ថាមវន្ដ និង​មិន​អាច​ទាយ​បាន​នោះ លោកអ្នក​ត្រូវ​ឱ្យ​កូនៗ​មាន​ជំនាញ​សំខាន់​ខាង​ក្រោម​ទាំង ៥ ដើម្បី​ឱ្យ​ពួកគេ​ត្រៀម​ខ្លួន​រួច​ជាស្រេច​ទោះបី​ជា​ពួកគេ​មាន​វ័យ​នៅ​តូចៗ​ក៏ដោយ។

1. វិធីគ្រប់គ្រងលុយកាក់

ដោយ​ផ្អែក​លើ​អាយុ​របស់​កូន​អ្នក អ្នក​ចាំបាច់​ត្រូវ​មាន​ជំនាញ ៣ សម្រាប់​បង្ហាញ​ពួក​គេ​ក្នុង​ការ​គ្រប់​គ្រង​លុយ​ដូច​ជា សន្សំ រក និង​ចំណាយ។

ជាទូទៅ មាន​អ្នក​ជំនាញ​ខាង​ហិរញ្ញវត្ថុ​បាន​ណែនាំ​ថា​អ្នកគួរ​តែ​ឱ្យ​កូនៗ​មាន​ទំនួល​ខុសត្រូវ​លើ​ហិរញ្ញវត្ថុ​ផ្ទាល់​ខ្លួន។ ចូរ​ឱ្យ​ពួកគេ​សិក្សា​ពី​ផលវិបាក​ដែល​ពួកគេ​ទទួល​បាន​ប្រសិន​បើ​ពួកគេ​ចាយ​លុយ​លើស​កម្រិត​ក្នុង​ពេល​ឥឡូវ ដើម្បី​ឱ្យ​ពួកគេ​ជៀសវាង​ក្នុង​ការ​ចាយ​លុយ​ខុស​ក្នុង​ឆ្នាំ​បន្ទាប់​ដើម្បី​ឱ្យ​ពួកគេ​យក​លុយ​ដែល​នៅ​សល់​ពី​ការ​ចាយ​វាយ​ប្រាក់​ប្រចាំ​របស់​ពួកគេ​សន្សំ​សម្រាប់​ដំណើរ​កម្សាន្ត​ចុង​ឆ្នាំ ដែល​នេះ​មាន​ន័យ​ថា ពួកគេ​ក៏​ចូលរួម​ចំណែក​ក្នុង​ការ​ផ្ដល់​ការ​ចំណាយ​ក្នុង​ដំណើរ​កម្សាន្ត។

2. វិធីដោះស្រាយជាមួយនឹងភាពតានតឹង (stress)

ភាព​តានតឹង​មិនមែន​សុទ្ធតែ​អាក្រក់​នោះ​ទេ។ មាន​ភាព​តាន​តឹង​ខ្លះ​បាន​ដើរ​តួ​ជា​អ្នក​ជម្រុញ​ទឹក​ចិត្ត​ក្នុង​ការ​សម្រេច​ភាព​ជោគជ័យ។ ពេល​ដែល​អ្នក​គ្រប់គ្រង​វា​មិន​បាន​ត្រឹម​ត្រូវ ភាព​តាន​តឹង​អាច​នាំ​មក​នូវ​ផល​អវិជ្ជមាន​។

អ្នកគួរ​តែណែនាំ​កូនៗ​ឱ្យ​ចេះ​ហាត់​ប្រាណ និង​ទទួលទាន​អាហារ​ផ្ដល់​នូវ​សុខភាព​ល្អ​ដើម្បី​ឱ្យ​ពួកគេ​មាន​សមត្ថភាព​តបត​នឹង​ភាព​តាន​តឹង។ ត្រូវ​ព្យាយាម​ផ្ដល់​ឧទាហរណ៍​នៃ​គំនិត​ដ៏​វិជ្ជមាន​ជានិច្ច ព្រោះ​ចុងក្រោយ អ្វីៗ​នឹង​មាន​ភាព​ល្អ​ឡើង​វិញ ហើយ​បើ​ទោះ​បី​ជា​គ្មាន​ការ​បញ្ចប់​ដ៏​ល្អ​តាម​ការ​គិត​នោះ ក៏​មិន​មែន​ជា​ថ្ងៃ​បញ្ចប់​នៃ​ពិភពលោក​ដែរ។

3. វិធីសម្របនឹងការផ្លាស់ប្ដូរ

នៅ​ក្នុង​ពិភព​ដែល​មាន​ការ​ផ្លាស់​ប្ដូរ​រហូត​នោះ ការ​ផ្លាស់​ប្ដូរ​ដូច​ជា​មាន​តែ​ការ​ប្រឈម​នឹង​ការ​រីក​លូត​លាស់​របស់​កូនៗ​តែ​ប៉ុណ្ណោះ។ តើ​យើង​គួរ​រៀប​ចំ​ពួក​គេ​យ៉ាង​ណា​ដើម្បី​ឱ្យ​ពួកគេ​សម្រប​ខ្លួន​បាន​នៅ​ក្នុង​ពិភពលោក​ដែល​មាន​ការ​ផ្លាស់​ប្ដូរ​ឥត​ឈប់ឈរ​នេះ?

ចម្លើយ​គឺ​សាមញ្ញ​បំផុត នោះ​គឺ​ការ​ដឹកនាំ​ដោយ​ឧទាហរណ៍។ ជា​ឧទាហរណ៍ ពេល​ដែលមាន​កាល​វិភាគ​ត្រូវ​ផ្លាស់​ប្ដូរ​ដោយ​ជៀស​មិន​រួច​កើត​ឡើង ត្រូវ​ឱ្យ​កូនៗ​បង្ហាញ​វត្តមាន​ក្នុង​កម្មវិធី​នោះ។ មិន​ត្រូវ​ប្រតិកម្ម​ហួស​ហេតុ​ទេ​ពេល​កាល​វិភាគ​កិច្ចការ​ប៉ះពាល់​ដល់​គម្រោង​ប្រចាំថ្ងៃ​នោះ។ គេ​អាច​បង្ហាញ​ភាព​ខក​ចិត្ត​បាន តែ​ត្រូវ​តែ​រក​ដំណោះស្រាយ​ជា​ដាច់​ខាត។ ឧទាហរណ៍ អ្នក​អាច​និយាយ​ទៅ​កាន់​កូនៗ​ថា​ “ម៉ាក់​អត់​សូវ​សប្បាយ​ចិត្ត​សោះ​ដែល​ពិធី​ជប់លៀង​ត្រូវ​បាន​រំសាយ ហើយ​ម៉ាក់​ដឹង​ថា​ពួក​យើង​សុទ្ធ​តែ​រង់​ចាំ​ចូល​រួម​កម្មវិធី​នោះ។ ចឹង​ពួក​យើង​មើល​តុក្កតា ឬ​ទៅ​លេង​ទោង​បាន​ទេ?” ការ​ផ្ដល់​នូវ​ជម្រើស​ដល់​ពួកគេ​ក្នុង​ការ​ជ្រើស​រើស​អាច​អភិវឌ្ឍ​វិន័យ និង​ភាព​បត់បែន​តាម​កាលៈ​ទេសៈ។

ក្នុងនាម​ជា​ឪពុក​ម្ដាយ យើង​អាច​ផ្ដល់​ភាព​ងាយ​ស្រួល​សម្រាប់​កូនៗ​ក្នុង​ការ​សម្រប​នឹង​ការ​ផ្លាស់​ប្ដូរ។ ជំនួស​ពីការ​ជជែក​វែកញែក​ពី​អ្វី​ដែល​កើត​ឡើង​ខុស​ពី​ការ​គ្រោង​ទុក ដោយ​ទទួល​យក​នូវ​អ្វី​ដែល​ជា​ការ​ពិត និង​ត្រូវ​ចង​ចាំ​ជានិច្ច​ក្នុង​ការ​ធ្វើ​ជា​គំរូ​ថា​វា​គ្មាន​អ្វី​កើត​ឡើង​ទេ​ពេល​ដែល​គម្រោង​ត្រូវ​បាន​ផ្លាស់​ប្ដូរ។ វា​គឺ​ជា​ការ​ឆ្លើយ​តប​របស់​យើង​ក្នុង​ការ​ផ្លាស់ប្ដូរ​ដើម្បី​កំណត់​ពី​ភាព​រីករាយ និង​សុភមង្គល​របស់​យើង។

4. វិធីបង្កើតនូវជម្រើសដ៏ត្រឹមត្រូវ

ដូច​ជំនាញ​ដែល​យើង​បាន​រៀបរាប់​ខាង​លើ កុមារ​អាច​ជ្រើសរើស​យក​នូវ​ទម្លាប់​ជា​អចិន្ត្រៃយ៍​ដោយ​ធ្វើ​ចុះ​ធ្វើ​ឡើង​ពី​អ្វី​ដែល​ពួក​គេ​សង្កេត​ក្នុង​ពេល​កំពុង​លូត​លាស់។ ទម្លាប់​ទាំង​នេះ​ក៏​អាច​ទាក់​ទង​នឹង​ការ​ញ៉ាំ​អាហារ​ដែល​ផ្ដល់​នូវ​សុខភាព​ល្អ និង​ការ​បង្កើត​ការ​សម្រេច​ចិត្ត​ដ៏​ត្រឹម​ត្រូវ។ 

ប្រសិន​បើ​កូន​អ្នក​ឃើញ​អ្នក​កំពុង​កាន់​ធុង​ការ៉េម​ទៅ​ញ៉ាំ​ដើម្បី​កាត់​បន្ថយ​ភាព​តានតឹង វា​នឹង​ផ្ដល់​គំរូ​ដល់​កូន​អ្នក​ដើម្បី​ធ្វើ​រឿង​ដូច​គ្នា។ ដូច្នេះ យើង​ត្រូវ​តែ​មាន​ការ​ប្រុង​ប្រយ័ត្ន​សម្រាប់​ខ្លួន​យើង​ផង និង​សម្រាប់​កូន​យើង​ផង។ ដើម្បី​បង្កើត​នូវ​ជម្រើស​អាហារ​ដ៏​មាន​សុខភាព​ល្អ​ដូច​ជា​ការ​ញ៉ាំ​ផ្លែឈើ​ជា​ជាង​ការ​ញ៉ាំ​នំ​ឃុកឃី។ ទម្លាប់ទាំង​នេះ​នឹង​ផ្ដល់​សញ្ញា​ថា​ផ្លែឈើ​ស្រស់ៗ​មាន​ឥទ្ធិពល​ល្អ​សម្រាប់​រាង​កាយ។ សរុប​មក​ នេះ​ជា​ទម្លាប់​ល្អ​បំផុត​ក្នុង​ការ​ចាប់​ផ្ដើម​ទទួល​ទាន​អាហារ​ដែល​ផ្ដល់​នូវ​សុខភាព​ល្អ​កាន់​តែ​ក្មេង កាន់​តែ​ល្អ​។

5. វិធីទទួលយកនូវភាពខុសប្លែកគ្នា

កុមារ​ម្នាក់ៗ​តែង​មាន​ការ​លូតលាស់​ក្នុង​តំបន់​ផ្សេងគ្នា ដែល​ធ្វើ​ឱ្យ​ពួកគេ​មាន​រូបរាង ពណ៌​សម្បុរ និង​ទម្លាប់​ខុស​គ្នា ដែល​អាច​ផ្ដល់​នូវ​ភាព​មិន​សូវ​មិន​ចុះ​សម្រុង​គ្នា ឬ​ក៏​បង្កើត​ជា​ភាព​ភ័យ​ខ្លាច​ភ្ញាក់​ផ្អើល​នៅ​ពេល​ចាប់​ផ្ដើម​ធ្វើ​ការ​ប្រាស្រ័យ​ទាក់​ទង​គ្នា។

ការ​បង្ហាញ​កូនៗ​តាំងពី​តូច​ពី​មនុស្ស​ជុំវិញ​ខ្លួន មិនថា​ពួកគេ​មាន​សាសនា​អ្វី ឬ​ក៏​មាន​សញ្ជាតិ​អ្វី និង​វប្បធម៌​បែប​ណា​នោះ​ទេ។ អ្នក​ត្រូវ​រំឭក​ពួក​គេ​ពី​សារសំខាន់​នៃ​ការ​បើក​ចិត្ត​ទូលាយ​ជានិច្ច។ មិនមែន​គ្រាន់​តែ​មនុស្ស​ម្នាក់​ដែល​មាន​ជំនឿ​ខុស​ពី​យើង មាន​ន័យ​ថា​ពួកគេ​ខុស​នោះ​ឡើយ។ អ្នក​ត្រូវ​បង្ហាញ​ពួក​គេ​នូវ​ភាព​ខុស​ប្លែក​គ្នា​ដែល​អាច និង​គួរ​តែប្រព្រឹត្ត​យ៉ាង​ដូចម្ដេច។ ភាព​ខុស​ប្លែក​គ្នា គឺ​ជា​អ្វី​ដែលធ្វើ​ឱ្យ​ជីវិត​មាន​ភាព​ស្រស់​ស្អាត។

វា​ប្រហែល​ជា​ពិបាក​ដើម្បី​ឱ្យ​ជំនាញ​សំខាន់ៗ​ទាំង​នោះ​អាច​ឱ្យ​កូនៗ​របស់​យើង​ត្រូវ​ប្រើ​ក្នុង​ជីវិត​រ​បស់​ពួក​គេ ដោយ​យើង​អាច​ព្យាយាម​ឱ្យ​អស់​ពី​សមត្ថភាព​ក្នុង​ការ​ជំរុញ​ពួក​គេ​ឱ្យ​ចេះ​គ្រប់​គ្រង​ជីវិត​ដែល​មិន​អាច​ទាយ​បាន និង​ដំណើរ​ជីវិត​ដ៏​ស្រស់​ស្អាត​នា​ពេល​អនាគត៕

អត្ថបទដើម៖ Essential Life Skills to Impart Your Child

Contact Us

Address

#168, Street 156
Phnom Penh, Cambodia 
This email address is being protected from spambots. You need JavaScript enabled to view it. 
Make appointment or visit school

Telephone

095 712 165 / 023 6312 857

Early Childhood Education

Teacher Training

Teacher training for those who may wish to follow Liberty Education's  curriculum can be arranged by appointment. Please contact the school for more information.