ជំរុញកូនៗឱ្យទទួលទានបន្លែ និងផ្លែឈើឱ្យបានច្រើនដើម្បីទទួលបានជីវជាតិគ្រប់គ្រាន់
តើការទទួលទានបន្លែ និងផ្លែឈើតិចតួចពិតជាមានផលប៉ះពាល់ដល់កុមារតូចៗមែនដែរឬទេ? ទេ! ប៉ុន្តែ ជំងឺរ៉ាំរ៉ៃដូចជា ជំងឺបេះដូង ដាច់សរសៃឈាមខួរក្បាល និងមហារីក ភាគច្រើនកើតលើមនុស្សពេញវ័យ ដូច្នេះហើយទម្លាប់បរិភោគល្អដូចជា ការទទួលទានអាហារមានជាតិខ្លាញ់ទាប អាហារដែលមានកាកសរសៃខ្ពស់ និងការទទួលទានអាហារឆ្អិនស្រាប់តិចតួចជាដើម គឺជាទម្លាប់មួយដែលត្រូវចាប់ផ្តើមពីក្មេង។
ម្យ៉ាងវិញទៀត ជំងឺដូចជាទឹកនោមផ្អែម និងកូឡេស្តេរ៉ូលខ្ពស់ ចាប់ផ្តើមរីករាលដាលបណ្តើរៗលើកុមារដែលលើសទម្ងន់។ ដូច្នេះ ផ្លែឈើ និងបន្លែពិតជាមានវីតាមីន ជាតិរ៉ែ គីមីធម្មជាតិ និងជាតិកាកសរសៃខ្ពស់ដែលមានប្រយោជន៍សម្រាប់សុខភាពរបស់លោកអ្នក។
តើយើងគួរតែបន្ទោសលើភាពមមារញឹករបស់យើងមែនទេ ដែលមិនបានគិតគូរពីបញ្ហាជីវជាតិរបស់អាហារ? ជាការពិតណាស់ ពេលដែលលោកអ្នកត្រូវធ្វើដំណើរកម្សាន្តទៅរមណីយដ្ឋាននានា លោកអ្នកប្រាកដជាខ្ចប់អាហារដែលឆ្អិនស្រាប់ដូចជា ដំឡូងបំពង នំកញ្ចប់ -ល- ទៅតាមដើម្បីឱ្យកូនៗញ៉ាំ ព្រោះថាអាហារវេចខ្ចប់ស្រាប់ទាំងនោះងាយស្រួលយកតាមជាងការចម្អិនម្ហូបអាហារ និងផ្លែឈើ។ នេះគ្រាន់តែជាទម្លាប់ហូបចុកអាហារដែលមិនបានគិតគូរពីផលប្រយោជន៍តែប៉ុណ្ណោះ។ ប៉ុន្តែបើលោកអ្នកមានទម្លាប់ខ្ចប់អាហារដែលសម្បូរដោយបន្លែ និងផ្លែឈើនោះ លោកអ្នកនឹងមានទម្លាប់ក្នុងការយកអាហារសម្បូរដោយសារធាតុចិញ្ចឹម និងជីវជាតិតាមខ្លួនជានិច្ច។ មិនត្រឹមតែប៉ុណ្ណោះ អាហារទាំងនោះមានកាឡូរីទាប និងធ្វើឱ្យឆាប់ឆ្អែតទៀតផង។
បញ្ហាដែលពួកយើងតែងតែបារម្ភនោះ គឺការផ្សាយពាណិជ្ជកម្មអាហារ ដែលច្រើនតែផ្សាយពីអាហារដែលផ្តល់ផលអវិជ្ជមានដល់សុខភាព។ ជាក់ស្តែង កុមារចាប់ពី ០២ឆ្នាំ ដល់១១ឆ្នាំ អាចទស្សនាការផ្សាយពាណិជ្ជកម្មពី១៥០ ទៅ ២០០ម៉ោង ឬវីដេអូពាណិជ្ជកម្ម ២០០០០ ដងក្នុងរយៈពេល ១ឆ្នាំ ដែលភាគច្រើនការផ្សាយពាណិជ្ជកម្មនោះទាក់ទងនឹងការផ្សាយស្ករគ្រាប់ នំ ឬគ្រឿងផ្អែមផ្សេងទៀត។
ដូច្នេះ ឪពុកម្តាយគួរធ្វើជាគំរូល្អដល់កូនៗរបស់ខ្លួនដោយចាប់ផ្តើមការទទួលទានបន្លែ និងផ្លែឈើឱ្យបានច្រើន។ កាលពីឆ្នាំ ២០០១ អ្នកស្រាវជ្រាវរបស់សាកលវិទ្យាល័យ Pennsylvania State បានសិក្សាទៅលើកុមារីអាយុ ៥ឆ្នាំ ចំនួន ១៩១ នាក់ ដោយរកឃើញថាកុមារី ដែលទទួលទានបន្លែផ្លែឈើ គឺមានសុខភាពល្អ និងភាពវៃឆ្លាតជាងកុមារីដែលមិនសូវបានទទួលទានបន្លែផ្លែឈើជាប្រចាំ៕
- Tags: Cambodia, children, education, international school cambodia, Liberty International School, Phnom Penh, pre school, school
