អាថ៌កំបាំងធ្វើឱ្យកូនក្លាយជាមនុស្សមានជំនឿចិត្តខ្ពស់
មាតាបិតាគ្រប់រូបតែងចង់ឱ្យកូនរបស់ខ្លួនលូតលាស់ និងក្លាយជាមនុស្សដែលមានជំនឿចិត្តលើខ្លួនឯង មិនចាំបាច់ពឹងពួកគាត់គ្រប់ពេលគ្រប់វេលានោះឡើយ។ ទន្ទឹមនឹងការចង់បានជំនឿចិត្តលើកូនៗ តើធ្វើយ៉ាងណាទើបលោកអ្នកអាចពង្រឹងសមត្ថភាពនៃភាពជឿជាក់នោះដល់ពួកគេ?
ដើម្បទទួលបាននូវលទ្ធផលប្រកបដោយប្រសិទ្ធភាព យើងត្រូវ៖
- មិនត្រូវជួយកូនគ្រប់ពេលឡើយ
ជារឿងធម្មតាទេដែលលោកអ្នកតែងតែជួយកូនៗឱ្យផុតពីគ្រោះថ្នាក់ មុតរបួស កើតទុក្ខ មិនសប្បាយចិត្ត ។ល។ ប៉ុន្តែ លោកអ្នកត្រូវដឹងថាកុមារត្រូវស្គាល់ភាពបរាជ័យ របួសស្នាម ភាពមិនសប្បាយចិត្ត ការខឹងសម្បារ ការខកចិត្ត អារម្មណ៍ច្របូកច្របល់។ ប្រសិនបើពួកគេអាចជម្នះរាល់ឧបសគ្គទាំងឡាយដោយខ្លួនពួកគេផ្ទាល់ នោះពួកគេនឹងមានសមត្ថភាពប្រឈមនឹងឧបសគ្គនៅពេលអនាគតដោយមិនភ័យខ្លាចឡើយ។
- ផ្ដល់ឱកាសឱ្យពួកគេសម្រេចចិត្ត
នៅពេលដែលកូនរបស់លោកអ្នកមានឱកាសក្នុងការសម្រេចចិត្តដោយខ្លួនឯងនៅវ័យក្មេងក្នុងលក្ខខណ្ឌងាយៗជាប្រចាំ នោះពួកគេប្រាកដជាមានភាពជឿជាក់ខ្ពស់ក្នុងការសម្រេចចិត្តប្រកបដោយភាពត្រឹមត្រូវនាពេលអនាគត។ ពួកគេអាចមានសមត្ថភាពថ្លឹងថ្លែងអ្វីដែលខុស និងអ្វីដែលត្រូវ។ ទន្ទឹមនឹងនេះដែរ លោកអ្នកដែលជាមាតាបិតា ឬអាណាព្យាបាល ត្រូវតែបង្ហាត់ពួកគេក្នុងការសម្រេចចិត្តផងដែរ ជៀសវាងការសម្រេចចិត្តខុស។
- លើកទឹកចិត្តចំពោះចំណង់ចំណូលចិត្តពិសេសរបស់ពួកគេ
សូមព្យាយាមបំផុសសកម្មភាពជាច្រើនឱ្យកូនលោកអ្នក ហើយស្វែងរកសកម្មភាពណាដែលពួកគេចាប់អារម្មណ៍ជាងគេ។ មានក្មេងៗខ្លះចូលចិត្តលេងកីឡា ខ្លះចូលចិត្តលេងកូនក្រមុំតុក្កតា ខ្លះចូលចិត្តលេងចម្អិនម្ហូប និងខ្លះទៀតចូលចិត្តគូរគំនូរ ដែលសកម្មភាពទាំងនេះអាចជួយឱ្យពួកគេជោគជ័យក្នុងអាជីពណាមួយនៃជីវិត។ សម្រាប់អ្វីដែលពួកគេពេញចិត្ត ពួកគេនឹងព្យាយាមធ្វើឱ្យបានល្អជាមិនខានឡើយ។
- លើកតម្ដើងការដោះស្រាយបញ្ហា
នៅក្នុងការស្រាវជ្រាវមួយរបស់អ្នកស្រីបណ្ឌិត មៀណា ស្ហឺ (Myrna Shure) បានឱ្យដឹងថា លោកអ្នកអាចបង្រៀនកូនៗទោះបីជាពួកគេនៅក្មេងក៏ដោយឱ្យចេះពីវិធីដោះស្រាយបញ្ហាដោយខ្លួនឯង។ ការដោះស្រាយបញ្ហានេះត្រូវមានការគិតពិចារណាច្បាស់លាស់។ មានកុមារខ្លះមានសមត្ថភាពគិតដូចជាមនុស្សធំពេញវ័យនៅពេលដែលពួកគេជួបបញ្ហា។ ឧទាហរណ៍ មានកុមារម្នាក់បានរត់ទៅប្ដឹងម្ដាយរបស់គេថាមិត្តរបស់គេដណ្ដើមយកតុក្កតារបស់គេ។ ម្ដាយគេក៏សួរគេថា៖ "តើកូនគួរធ្វើយ៉ាងណាដើម្បីបានតុក្កតានោះមកវិញ?" កុមារធម្មតាប្រាកដជាឆ្លើយថា៖ "តុក្កតានោះជារបស់ខ្ញុំទេ! ឱ្យវាមកខ្ញុំវិញមក។" ប៉ុន្តែ គួរឱ្យភ្ញាក់ផ្អើល កុមាររូបនោះបានឆ្លើយទៅម្ដាយថា គេនឹងប្រាប់ទៅមិត្តម្នាក់នោះថា៖ "តុក្កតានេះជារបស់ខ្ញុំ បើសិនជាឯងលេងជាមួយខ្ញុំ នោះយើងអាចលេងវាបានទាំងពីរនាក់។" នេះជាឧទាហរណ៍សាមញ្ញ តែបង្កប់ទៅដោយការគិតរបស់កុមារដែលមានគំនិតចែករំលែក និងចាស់ទុំ៕
ប្រភព៖ Parents
- Tags: Cambodia, children, education, international school cambodia, Liberty International School, Phnom Penh, pre school, school
