បញ្ហាដំណេករបស់កុមារ និងដំណោះស្រាយ
ជួយកុមារឱ្យគេងបានគ្រប់គ្រាន់
កុមារចាំបាច់ត្រូវការគេងចាប់ពី 10 ទៅ 11 ម៉ោងជារៀងរាល់ថ្ងៃយ៉ាងហោចណាស់ក៏ក្នុងរយៈពេល 9 ឆ្នាំដំបូងនៃជីវិតរបស់ពួកគេ។ គេងមិនគ្រប់គ្រាន់អាចធ្វើឱ្យកុមារមានអារម្មណ៍ម៉ួម៉ៅ ឆាប់ខឹង និងហត់នឿយពេញមួយថ្ងៃ។ ប៉ុន្តែ ការដាក់ពួកគេឱ្យចូលគេងពិតជាមានភាពពិបាក ដូច្នេះសូមលោកអ្នកដែលជាមាតាបិតារបស់កុមារដែលមិនចូលចិត្តគេងអាននូវដំណោះស្រាយខាងក្រោមដើម្បីទប់ទល់ជាមួយកូនៗដែលមិនចូលចិត្តគេងទាំងនោះ។
បញ្ហាទី 1៖ ម្ដាយ ឬឪពុកត្រូវបញ្ចប់របាយការណ៍ការងារ ដែលជាមូលហេតុក្នុងការដាក់កូនឱ្យចូលគេងក្នុងលក្ខណៈប្រញាប់ ឬរហ័សជ្រុល។
ដំណោះស្រាយ៖ ការផ្ដល់អាទិភាពដល់ពេលគេងរបស់កូនៗពិតជាមានសារសំខាន់ បើទោះបីជាលោកអ្នកត្រូវលះបង់ពេលវេលាគេងផ្ទាល់ខ្លួនក៏ដោយ គឺលោកអ្នកត្រូវរៀបចំកាលវិភាគឡើងវិញ និងត្រូវនៅដល់យប់ជ្រៅដើម្បីធ្វើរបាយការណ៍ ឬការងាររបស់លោកអ្នកប្រសើរជាងធ្វើវាមុនពេលកូនគេង។ ទម្លាប់នៃការគេងទៀងទាត់ និងស្ងប់ គឺជាគន្លឹះធ្វើឱ្យមានការគេងលក់យ៉ាងស្កប់ស្កល់។ លោកអ្នកអាចកំណត់ទម្លាប់នៃការគេងនោះ។ លោកអ្នកអាចងូតទឹកឱ្យពួកគេ ដុសធ្មេញឱ្យពួកគេ អានរឿងនិទានមុនចូលគេង ធ្វើសរសៃ ឬច្រៀងចម្រៀងឱ្យពួកគេស្ដាប់។ លោកអ្នកក៏អាចប្រើពេលវេលានេះដើម្បីលើកសរសើរពីទង្វើល្អដែលពួកគេបានធ្វើនៅពេលថ្ងៃ ឬក៏និយាយប្រាប់ពួកគេពីអ្វីដែលធ្វើឱ្យលោកអ្នកមានមោទនភាពចំពោះពួកគេ។ ប្រសិនបើលោកអ្នកចាក់តន្រ្តីឱ្យពួកគេស្ដាប់វិញ លោកអ្នកត្រូវចាក់ភ្លេងដដែលនោះជារៀងរាល់យប់។ សំឡេងធម្មជាតិ គឺជាជម្រើសដ៏ល្អបំផុតសម្រាប់ធ្វើជាភ្លេងបំពេរពួកគេ។ ព្យាយាមអនុវត្តវិធីសាស្ត្រទាំងនេះ ហើយសង្កេតមើលថាតើវិធីសាស្ត្រមួយណាងាយស័ក្ដិសមបំផុតសម្រាប់លោកអ្នក និងកូន។
បញ្ហាទី 2៖ កូនៗមិនចង់ចូលគេងសោះ។
ដំណោះស្រាយ៖ ប្រសិនបើកូនរបស់លោកអ្នកឮសំឡេងមនុស្សជជែកគ្នា សើច ឬសំឡេងចេញពីកុំព្យូទ័រ ទូរទស្សន៍ ឬទូរស័ព្ទដៃ នោះកូនរបស់លោកអ្នកប្រាកដជាមិនចង់ចូលគេងឡើយ។ ដើម្បីធ្វើឱ្យពួកគេចូលគេកាន់តែងាយស្រួល លោកអ្នកត្រូវធ្វើឱ្យមានបរិយាកាសស្ងាត់ក្នុងអំឡុងម៉ោងចុងក្រោយមុនចូលគេង។ លោកអ្នកត្រូវទុកទូរទស្សន៍នៅក្រៅបន្ទប់គេង ទុករបស់លេង និងហ្គេមដែលមានសំឡេងឱ្យឆ្ងាយ កំណត់សកម្មភាពស្ងប់ស្ងាត់សម្រាប់គ្រួសារទាំងមូល ដូចជាអានសៀវភៅ ឬធ្វើសំណួរល្បងប្រាជ្ញា។ ការគេងនឹងកាន់តែមានភាពប្រសើរជាងមុនប្រសិនបើសមាជិកក្នុងគ្រួសាររក្សាភាពស្ងៀមស្ងាត់មុនពេលចូលគេង។
បញ្ហាទី 3៖ កូនរបស់លោកអ្នកនៅដល់យប់ជ្រៅពេក។ ពេលចូលគេងនៅម៉ោង 8:30 ប៉ុន្តែគាត់មិនដែលចូលគេងតាមម៉ោងទេ។
ដំណោះស្រាយ៖ ប្រសិនបើកូនលោកអ្នកមិនហត់នៅពេលគេងទេ សូមព្យាយាមដាស់ពួកគេឱ្យភ្ញាក់ពីគេងឱ្យលឿននៅពេលព្រឹក ឬក៏ដាក់កាលវិភាគឱ្យពួកគេគេងលេងពេលពាក់កណ្ដាលថ្ងៃជាជាងគេងនៅពេលរសៀល។ លោកអ្នកត្រូវតែរក្សាទម្លាប់ចូលគេងដដែល ដោយព្យាយាមកំណត់ពេលឱ្យកូនចូលគេងជានិច្ច។
បញ្ហាទី 4៖ កូនចេះតែភ្ញាក់ពេលពាក់កណ្ដាលអធ្រាត្រ ហើយមិនព្រមគេងវិញសោះ។
ដំណោះស្រាយ៖ ប្រសិនបើកូនរបស់លោកអ្នកភ្ញាក់ពីគេងនៅពាក់កណ្ដាលអធ្រាត្រ សូមឱ្យពួកគេសម្រួលខ្លួនបន្តិច។ ប្រសិនបើពួកគេនៅតែមិនអាចគេងលក់វិញបាន លោកអ្នកប្រហែលជាត្រូវបំពេរពួកគេ ហើយព្យាយាមប្រាប់ពួកគេថាដល់ពេលគេងហើយ។ លោកអ្នកត្រូវបំពេរពួកគេឱ្យគេងលក់រាល់យប់រហូតដល់ពួកគេអាចគេងលក់ដោយខ្លួនឯងដោយមិនមានការបំពេរ។លោកអ្នកក៏ត្រូវពិនិត្យមើលថាតើពួកគេញ៉ាំអាហារពេលល្ងាចច្រើនប៉ុណ្ណាដែរ ព្រោះថាការឃ្លានអាហារតែងតែធ្វើឱ្យក្មេងៗភ្ញាក់នៅពេលយប់ ដូច្នេះវាពិតជាសំខាន់ខ្លាំងណាស់បើសិនជាកូនៗញ៉ាំអាហារពេលល្ងាចឆ្អែតគ្រប់គ្រាន់។ លើសពីនេះ ប្រសិនបើលោកអ្នកមានទឹកដោះគោក្ដៅឧណ្ឌៗឱ្យពួកគេផឹក គឺជាទង្វើដ៏ប្រសើរបំផុត ព្រោះថាទឹកដោះគោដែលមានសីតុណ្ហភាពឧណ្ឌៗនោះអាចជួយឱ្យពួកគេគេងលក់យ៉ាងស្កប់ស្កល់។
បញ្ហាទី 5៖ អ្នកមានអារម្មណ៍ម៉ួរម៉ៅចំពោះបញ្ហាគេងរបស់កូនៗ។ អ្នកហត់នឹងសំឡេងស្រែកយំ និងត្អូញត្អែររបស់កូន ដូច្នេះហើយអ្នកក៏សម្រេចចិត្តឱ្យកូនៗមើលទូរទស្សន៍ ហើយក៏គេងលក់នៅមុខទូរទស្សន៍តែម្ដងទៅ។
ដំណោះស្រាយ៖ បញ្ហាចូលគេងរបស់កូនៗអាចជាការសាកល្បងការដោះស្រាយឪពុកម្ដាយ ប៉ុន្តែ លោកអ្នកត្រូវតែដោះស្រាយដោយសន្សឹមៗ។ លោកអ្នកត្រូវតែមានការអត់ធ្មត់ច្រើន ហើយលោកអ្នកក៏ប្រហែលជាត្រូវធ្វើព្រងើយខ្លះពេលដែលឮសំឡេងថ្ងូរ យំ ឬក៏ត្អួញត្អែរជាដើម។ បើសិនជាពួកគេធ្វើលើសដែនកំណត់ លោកអ្នកត្រូវប្រាប់ពួកគេពីច្បាប់ទម្លាប់ និងអនុវត្តតាមទម្លាប់៕
English Version: Common Bedtime and How to Solve Them
